Text copied!
CopyCompare
Makhuwa-Meetto do Novo Testamento - Mphattuwelo

Mphattuwelo 12

Help us?
Click on verse(s) to share them!
1Nkwaha mmoca Mwaneene Nluku ahomwiirela Aparamu: Ukhume ilapo aa iyo, iriyari ya alokwaa ni wapuwani wa athumwana, ni urwee ilapo inhalaka wuthonyera.
2Kinawuvaha atthu enci ookhuma mwirutthuni mwa mmo ni kinawuvaha iparakha, ni kinawunnuwiha ncina naa nno ni we unhala ukhala iparakha.
3Kinawareeriha anhala wureeriha ayo ni watapaniha anhala wulaphakaca ayo. Vano mwanlattu wo we, atthu othene omwiilaponi anakhala ooreerihiya.
4Vaavale Aparamu ahokhuma toko Mwaneene Nluku camwiirenlyawe, ni warwawe va ahontthukana ikwaha Loti. Ukati wakhumawe uHarani, Aparamu ahaana myakha sapini na mithanu.
5Wakhumawe va ahonkusa Sarayi mwaarawe, Loti mwana amunnawe, mihakhu cawe cothene caphwanyilyawe ni ipottha cawe cathumilyawe uHarani. Yahokhumaca arwaka ilapo yo Kanaa ni yahophiyaca salama.
6Aparamu ahottupulaniha ilapo eyo mpaka uphiya nipuro no Sikeni. Yooyo ukati uyo annakanaa phakhala ilapo eyo.
7Mwaneene Nluku ahonkhumelela Aparamu phimwiirelaka: Ipyo aa iyo kinaahala uvaha ila itthaya ela. Vano ahoteka ikhilompi yoonalapelela Mwaneene Nluku ankhumelenle.
8Vaavale aheetta arwaka myako ciri ncoko woohitto wo Peteli. Wonwo ahonkhurutula heema awe, akakhelaka uPeteli moono unkela ncuwa ni Ayi unkhuma ncuwa. Vano ahontekela ikhilompi Mwaneene Nluku ni ahonlapela Mwaneene Nluku.
9Wahoolo Aparamu ahokhuma arwaka mphantte wo Nekepi.
10Yooyo ukati uyo ilapo iyo yahovola itala yinci. Vano Aparamu ahokhuruwela ilapo yo Wiciipitu wiira akhale ukati vakani kontha itala eyo yanatepa mwilaponi mmo.
11Ukati wattamenryawe Wiciipitu, ahomwiirela Sarayi mwaarawe: Yoowe! Mi kihocuwela wiira we uri nthiyana ooreera venci.
12Phimaana annaciipitu ayo yakela yawoonaka, ankocuwela wiira: Ala amwaarawe! Vano ankokiiva ni wuhiya we nkumi.
13Sontte weere mwanrokoraka wiira yakipanke nnema mwanlattu wo we ni commo khanhala ukiivaca.
14Khweeli Aparamu uphiya wawe Wiciipitu, annaciipitu yahoonaca wiira amwaarawe ayo ari ooreera venci.
15Asuulupale a Farawoo yahomoonaca Sarayi nunttottopela venci, mpaka Sarayi yahonkusaca uhano wa Farawoo.
16Vano mwanlattu wa Sarayi, Aparamu ahopankiya nnema. Ule ahovahiya ikhontwaa, imope, apuuru, ipottha cilopwana ni cithiyana, apuuru onthiyana ni inkamela.
17Nanso Mwaneene Nluku ahonrakaliha Farawoo na akhuulupale awe othene ni iretta cowoopiha mwanlattu wa Sarayi, amwaara a Aparamu.
18Phimaana Farawoo ahomwiihana Aparamu, ni ahomwiirela: Isiyani yeeyo ikipankilyaa iyo? Wahakihimyacenryaa wiira ala mi amwaaraka?

19Weerelani wiira ula mi mwanrokoraka? Hapo mi kahonthela! Pahi, yakhala amwaaraa wakuseke ni urweke.
20Farawoo ahomwiirela Aparamu na amwaarawe wiira akhume mWiciipitu mmo ni ahaaruma anakhotto awe wiira anvelele mpaka umpikani ni citthu cothene carinawe.