Menge Ininang 26:24-32

²⁴Telobo pa minikagi si Pablo, migbelobansag si Festo, kagi din, “Migkebook ka den. Migkebook ka so pelaban dakel se pig-ilingan nikaw.”

²⁵Minikagi si Pablo, “Sir, wedà a pegkebook, so ontò benal se inikagi ko kenyo,

²⁶so netegahan te selotan se kedita niyan. Wedà a pegketalaw te peg-ikagi ko kandin, so netegahan din te benal se kedita te inikagi ko, so wedà iyan keinang doton te kesikmihan.

²⁷Indà, Agripas? Nemenal ka lay te inikagi te menge telekeliwat te kagi te Timanem? Netegahan ko te nemenal ka kenyan.”

²⁸Minikagi si Agripas ki Pablo, “Te eked kenamay, meinang a no peden sakop i Cristo.”

²⁹Minikagi si Pablo, “Pengkey menamay aw eked kenamay, ibeg ko meinang ka iling kanak, pengkey kedita niyo nenenalan kanak te aldaw seini. Meneng eked a keibeg aw geposen kaw heman iling kanak.”

³⁰Penga niyan, timindeg se selotan aw gobirnador aw si Bernice aw kedita dan kidoen.

³¹Pegkesayo dan, migpebelaw-belaway dan, kagi dan, “Wedad salà din mepakay ikeleboso aw iimatay kandin.”

³²Minikagi heman si Agripas diyà ki Festo, “Simpana wedà din pemoyoi te si Cesar se meg-osay kandin, yan mepakay aw ipelowà nikaw.”