1Pegkepenga te samok doton te Efeso, migtipon si Pablo te menge otaw egpemenal. Inantag din se pedowan dan, aw simabi kandan te mesayo den sikandin. Penga niyan, dimoton si Pablo te Masidonya.
2Peg-okit din diyà te menge lonsod kidoen, ontò din inantag se pedowan te menge otaw egpemenal. Pegdateng din doton te Gresya,
3mig-ogpà kidoen te telo se bolan. Sagwa agpet den somakay si Pablo te dakel belangay pesalo doton te Sirya, doen ekon menge Judiyo kenà egpemenal mengimatay kandin. Yan minipanaw si Pablo limikò doton te Masidonya.
4Doen menge otaw timaking kandin pesalo doton te Jerusalem, yan se batà i Piro si Sopater tege Berya, aw si Aristarco aw si Segundo didowa dan tege Tesalonika, aw si Gayo tege Derbe, aw si Tikico aw si Trofimo didowa dan tege Asya, aw si Timoteo.
5Minonà se kedita dan simakay te belangay pesalo doton te Troas, aw migtagad dan kenami kidoen.
6Inapit a i Pablo doton te Filipos. Mig-ogpà kay kidoen taman te pegkepenga te pista te pegpengaen te pan kenà eglebag. Penga niyan, simakay kay te dakel belangay. Penga te lima se delem, nengonsaeb kay kandan doton te Troas. Mig-ogpà kay kidoen te sebad simana.
7Pegkedelem te Sebado, netipon se kedita day amon megbelà-belà te pan iling te pegtoladà i Jesus kedengan. Timetoo si Pablo migtoladà lamig te tengà te delem, so ibeg din mesayo te keeldawan niyan.
8Medita se solò kidoen te gibelayan pigtiponan day.
9Doen sebad telaki si Eutico nenenoo doton te bintanà. Pegtoladà i Pablo te nenamay, ontò nepilot si Eutico. Pegketedogi din, nedagdag doton te tanà lekat te iketelo kunsad te balay. Pegdateng dan doton kandin, nematay den.
10Timenà si Pablo, aw limongken kidoen te dapag din. Kinelesan din, aw minikagi diyà te menge doma otaw, “Ikà niyo egketetana, so neantay den sikandin.”
11Neantay se telaki aw inibing dan doton te balay din. Ontò neluba se kedita te otaw. Pegpenayit i Pablo doton te balay, pigbelà-belà din se pan aw kimaen kay. Nenamay kay migsempetanun lamig te peglibtak te aldaw. Penga niyan, nesayo kay si Pablo.
13Ibeg i Pablo, mipanaw doton te Asos. Yan simoway kay kandin. Simakay kay te belangay pesalo doton te Asos amon somongon kay kandin doton.
14Pegkità day doton te Asos, simakay si Pablo te belangay sinekayan day. Migpesalo se kedita day doton te Mitilene.
15Peglowà day lekat te Mitilene, dimateng kay te Kiyos te keeldawan niyan. Penga niyan, minapit kay doton te polò iningedanan Samos te ikedowa te aldaw. Penga te peg-ogpà day doton te Trogilyom, dimateng kay doton te Mileto te iketelo te aldaw.
16Wedà kay apit doton te Efeso, so eked keibeg si Pablo aw menamay kay doton te Asya. Nesasaw sikandin amon domateng kay doton te Jerusalem te eked pa dateng se aldaw te pista iningedanan Pentekostes.
17Pegdateng day doton te Mileto, insogò i Pablo se otaw domoton te Efeso amon engayen se kedita te egpengibing te simbahan kidoen.
18Pegdateng dan doton te Mileto, minikagi si Pablo, “Netaga-taga kaw den te eg-inangen ko doton kenyo lekat te pegdateng ko doton te Asya.
19Measeb a timolò te Pengolo tadon. Migpedanà a te kanak pegkeotawun. Migkelag a so dakel se pedowan ko kenyo. Nelimahan a so ibeg te menge Judiyo kenà egpemenal mengimatay kanak.
20Wedà a pegketalaw te pegtoladà ko kenyo te mèpiya, pengkey doton te simbahan aw doton heman te teg sebad-sebad balay.
21Mig-indan a te benal diyà te kedita niyo, pengkey Judiyo aw kenà Judiyo. Migpunù a kenyo te megselsel kaw diyà te Timanem aw memenal kaw diyà te Pengolo tadon si Jesu Cristo.
22“Na, domoton a den te Jerusalem, so yan se ibeg te Espiritu Santo kanak. Wedà ko ketegahi aw eden se domateng kanak kidoen.
23Meneng melikit a eg-indanan te Espiritu Santo te pemilangen a aw kelebosowen a kidoen.
24Meneng aneng-aneng ko, wedad beloyan aw imetayan a, so ibeg ko ipengahen ko olò se eg-inangen ko. Meluba a aw mebatog ko tomanen se insogò i Jesus kanak, so insogò a din megtoladà te Mèpiya Indan tepad te tabang te Timanem kenitadon.
25Lamig seini, miglegeb a amon megtoladà a kenyo tepad te peglowan te Timanem. Meneng mesayo a den, aw eked a den palos likò dini.
26Yan eneng-enengi niyo ini. Aw doen pa otaw wedà pa pemenal, wedad salà ko kandin,
27so ontò a migtoladà kenyo te kedita te ibeg te Timanem.
28Pekeimanday kaw. Pegtonggò kaw te kedita te otaw egpemenal, so Espiritu Santo se miggulal kenyo egpengibing amon mengibing kaw kandan. Ininang kidon din sakop din pineokit te pegkematay i Jesus.
29Netegahan ko te doen kwani otaw domateng dini kenyo amon meg-akal dan kenyo, aw kebàtan dan se pegsalig niyo diyà te Timanem.
30Doen heman menge doma niyo megtoladà te kagi kenà benal amon tomaking se menge otaw diyà kandan.
31Yan peg-ahà kaw. Ikà niyo egkelibel kani. Gayed a migtoladà kenyo te aldaw aw delem dalem te telo se omay. Migkelag a heman so dakel se pedowan ko kenyo.
32Ibeg ko, Timanem se megtonggò kenyo. Ibeg ko, tomolò kaw te kagi te Timanem, so mèpiya iyan aw meketabang kenyo. Aw tomolò kaw te kagi din, begayan kaw din heman te ibegay din diyà te kedita te sakop din.
33“Wedà a palos ingà te kwarta aw penenaktun niyo.
34Netegahan niyo te gayed a migterbaho amon doen ibayad ko te kepulukan ko aw kepulukan te menge doma otaw timaking kanak.
35Yan se ininang ko amon ketegahan niyo te mèpiya aw measeb kidon megterbaho, amon meketabang kidon te menge doma otaw nelimahan. Ikà niyo egkelibel te inikagi te Pengolo si Jesus, ‘Pengkey meluba se otaw tebangan te doma, meneng labi pa meluba se otaw egpenabang te doma.’”
36Penga niyan, limongken dan aw migtawal-tawal si Pablo diyà te Timanem.
37Ontò dan migkelag, aw kimeles dan ki Pablo, aw nengadek dan kandin.
38Ontò dan nepuluk, so minikagi si Pablo te eked den palos likò doton kandan. Penga niyan, timaking dan kandin doton te dakel belangay sekayan day.
