1Minikagi si Agripas diyà ki Pablo, “Mepakay aw mikagi ka.” Penga niyan, intakyaw i Pablo se belad din aw minikagi,
2“Sir, Agripas. Ontò a neluba so sikona se otaw menenalan kanak seini, amon ketegahan no te kenà benal se dimanda te menge doma Judiyo tepad kanak,
3so ontò ka netaga-taga tepad te ketanem tadon Judiyo aw gayed tadon egdindilan. Yan keleyati se pedowan no aw menenalan ka kanak.
4“Netegahan te kedita te Judiyo se keogpà ko kedengan lekat te pegketelaki ko doton te Tarso aw penga niyan doton te Jerusalem.
5Aw meg-insà ka kandan, mekeindan dan te benal, so netegahan dan te ontò a egtolò te ketanem te menge Judiyo, so siaken se migpelenged te menge Parisiyo.
6Nayan, neopalan a den dan so egpeliman a te metoman se impakang te Timanem diyà te kemonaan tadon.
7Yan heman se egpelimanan te kedita te sempolò teg dowa pongan tadon te Judiyo, aw yan se doun te gayed dan egsimba te Timanem te aldaw aw delem. Sir, neopalan a den te menge doma ko Judiyo so yan se pinelimanan ko.
8Ikà niyo eg-aneng-aneng te eked pekebatog se Timanem meg-antay te otaw lekat te nematay.
9“Pengkey siak, kedengan eden ko aw mèpiya se pegpemilang ko te menge otaw egpemenal ki Jesus tege Nasarit.
10Yan se ininang ko kidoen te Jerusalem, so siak se migkeleboso te medita otaw sinakop te Timanem, so insogò a te menge pengolo te simbahan te Jerusalem. Peg-osay day kandan, sipat siak minikagi te imetayan dan.
11Melikit ko dan ipegpelumun doton te kedita te simbahan te Judiyo, so ibeg ko peden, lomengà dan te pegpemenal dan ki Jesus. Ontò a neopal kandan, aw pinemilang ko dan pengkey doton te mediyò lonsod.
12“Yan se doun te dimoton a te Damasko, so inibing ko se papil sinolatan te menge pengolo te simbahan te Jerusalem te mepakay aw megdakep a te menge otaw egtaking ki Jesus.
13Meneng pegkealas dosi te wedà a pa dateng doton, doen anyag lekat te langit kinità ko labi pa melowa diyà te aldaw. Neenyagan heman se doma otaw timaking kanak.
14Pegkelangkeb day diyà te tanà, doen dinineg ko minikagi te kagi te Hebreo, ‘E Saulo, nengà lay egpemilang ka kanak? So sikona olò se elegen te ininang nikaw.’
15Yan mig-insà a, ‘Sir, sinu ka lay?’ Yan timaba se Pengolo, ‘Siaken si Jesus se egpemilangen nikaw.
16Tindeg ka den, so migpekità a den kamno amon inangen ta sogounun ko meg-indan te doma otaw te kinità no te aldaw seini aw sìyan ipekità ko diyà kamno te modi aldaw.
17Tonggoan ta amon eked ka imetayi te menge Judiyo aw otaw kenà Judiyo, so isogò ta doton kandan
18amon ketegahan dan se kebenalan, amon tomanan dan te kengitngit aw megpesalo dan diyà te kelowahan, amon mekelowà dan lekat te belad i Satanas aw megpesakop dan diyà te Timanem, aw pegwedaden din se salà dan pineokit te pegpemenal dan diyà kanak, amon kinewaen dan heman se ontong ibegay te Timanem diyà te kedita te batà din.’
19“Sir, penga niyan, tinolò ko se impekità din kanak lekat te langit.
20Migtoladà a doton te Damasko aw Jerusalem aw menge lonsod te Judiya aw doton heman te menge otaw kenà Judiyo. Migtoladà a diyà kandan te keilangan megselsel dan aw tomaking dan te Timanem, aw keilangan ipekità dan te kaling se pedowan dan pineokit te eg-inangen dan.
21So yan se intoladà ko, dinakep a te menge doma Judiyo doton te dakel simbahan kidoen te Jerusalem amon imetayan a dan.
22Meneng gayed a egtebangan te Timanem lamig te aldaw seini, aw yan timayod a migtoladà te kedita te otaw pengkey sagkep aw melangkaw. Migtoladà a olò te netoman den se pakang ingkeliwat te menge telekeliwat te kagi te Timanem aw kemonaan tadon si Moises,
23so kagi dan, keilangan pemilangen se Misiyas aw imetayan. Sikandin son dan se tagnà meantay eked palos todà kematay, aw pineokit kenyan, ipetaga-taga din te doen kelowaan te kedita te otaw lekat te salà, pengkey Judiyo aw kenà Judiyo.”
24Telobo pa minikagi si Pablo, migbelobansag si Festo, kagi din, “Migkebook ka den. Migkebook ka so pelaban dakel se pig-ilingan nikaw.”
25Minikagi si Pablo, “Sir, wedà a pegkebook, so ontò benal se inikagi ko kenyo,
26so netegahan te selotan se kedita niyan. Wedà a pegketalaw te peg-ikagi ko kandin, so netegahan din te benal se kedita te inikagi ko, so wedà iyan keinang doton te kesikmihan.
27Indà, Agripas? Nemenal ka lay te inikagi te menge telekeliwat te kagi te Timanem? Netegahan ko te nemenal ka kenyan.”
28Minikagi si Agripas ki Pablo, “Te eked kenamay, meinang a no peden sakop i Cristo.”
29Minikagi si Pablo, “Pengkey menamay aw eked kenamay, ibeg ko meinang ka iling kanak, pengkey kedita niyo nenenalan kanak te aldaw seini. Meneng eked a keibeg aw geposen kaw heman iling kanak.”
30Penga niyan, timindeg se selotan aw gobirnador aw si Bernice aw kedita dan kidoen.
31Pegkesayo dan, migpebelaw-belaway dan, kagi dan, “Wedad salà din mepakay ikeleboso aw iimatay kandin.”
32Minikagi heman si Agripas diyà ki Festo, “Simpana wedà din pemoyoi te si Cesar se meg-osay kandin, yan mepakay aw ipelowà nikaw.”
