Aposol 26:24-32

²⁴Paulu tani in iwetewete pang di tooltool tina ngan nen go, inbe Pestus isulukati a iwete nen. Iyei ne, “Paulu! Ong in kuyei kapa! Lo galanga kiong yo mai mata i, in la iyei ong a le kuyei kapa ye i.”

²⁵Motong la Paulu iraua betanga ki nen, “Atoo, tool mai Pestus, au i nga ayei kapa tiap. Betanga yo awete nga, ngan moolmool, inbe lok galanga ben nga betanga dook mata ngan la awete nga.

²⁶Ngan tool kuto mai Agiripa in lon galanga dook ye so le imot yo awetewete ye nga. Ngan nanga, au i atattadai tiap, bong awete pobe panga, yesoo au i lok galanga nen, so tina le imot yo awetewete ye nga, ngan sa yo iko le lon galanga ye tiap, ngan tiap. Inbe ya in lon galanga ye betanga kiau nga le imot, yesoo so tina ngan pombe sollono tiap.”

²⁷Motong la Paulu iwete pang Agiripa nen, “Tool kuto mai, ngan kutara lom medana ye betanga kidi Maro koonoo lapau, too tiap? Au i lok galanga nen, be ong in ngan kutara lom medana ye.”

²⁸Paulu tani in iwete nen, motong la Agiripa itoru nen, “Ai, nga yelei? Lom tar be ye manga modono kasin leu nga, ngan ole kuyei au le ayei ben tool ke Kirisi, too?”

²⁹Motong la Paulu iraua betanga ki nen, “Ngan dookoot, be manga modono nga too manga mooloo, bong ole apatarau pang Maro nen, be kuye di tooltool yo nookoot katai ngan kalongo betanga kiau nga, ngan ang le imot ole katara lomim medana panga lapau le kayei dawa ben au i. Bong au i lok be tipau kemim le baemim ye ooroo medana, inbe titarang lo kayepe rumu dook tiap kidi talnga dikidiki lono be.”

³⁰Paulu iwete nen, motong la tool kuto mai tani yo Agiripa i, in iye tool mai Pestus ye Benaisi, inbe di tooltool yo tiye di tiwurur nga, ngan di le imot timadit,

³¹inbe tiyege rumu lono tani in a tila. Le nga tipa a tila, motong la di tapdi tiwetewete nen, “Tool ni iyei touo so sa dook tiap yo ke be tiraumate ye a imata, too ke be titaru lo iyepe rumu dook tiap kidi talnga dikidiki lono ye, ngan tiap lapau.”

³²Motong la Agiripa tani in iwete pang Pestus nen, “Nga dook mata ke be kupadu tool ni si tana a ila, bong ki la ya taunu iwete be ole nen ngan Sisa ilongo betanga ki nga.”