Iwata Ari 26:24-32

²⁴Ango edo Paul imo akuta bere jiari ge site isiri Festus aoro ikanade gatedo sisina, “Ito kotembari idegesira giyo! Imo jirogari bajinabé buriteta ami eiri jiro beyae eira!”

²⁵Edo Paul mi sisina, “Gisijiari darigabé Festus, na jiro beyae aera giyo! Ata ge ro nane tena awa gebé edo moka dave.

²⁶Edo daotari daedo, nane ainda dombuda do jinenegedo ge eiwa tena, awa garibé. Buro ro Yesu da yai idegesisina awa onjigedo ae. Awatedo, na gebé ena, embo awa bino eiwa matu gosisina.

²⁷Daotari Agrippa, imo peroveta manemi ge ro gaguritera awa gebé esita? Na gotena, imo ge awa gebé eta.”

²⁸Ango tesiri Agrippa mi Paul de mina sisina, “Imo kotembedo iji tupo na ato Keriso da embo anita?”

²⁹Edo Paul mi sisina, “Edo iji tupo o ribori awa rorae bajina ae. Ata nane God da yai benunu tena, imo akuta ae, ata embo berari boroko nato ge ingera, awamane daedo Keriso da embomai ara, dá nane itena ango. Ata dabé, na bundari embo ango awa eovekae, jipapa ae ena.”

³⁰Edo inemi ge awa tesiri ainda amboda, daotari ae gisijiari de Bernice de erido pepositera, edo embomai awamanede daedo anumbedo isite awa erido pepositera.

³¹Edo awamane idegedo demonda maundo awamaneda doda ge mina tara edo tedo sitera, “Embo emi ro esira, ainda rirowa betari ango ko bundari awa itae.”

³²Ango edo Agrippa mi Festus de sisina, “Ine embo eiwa udegato aimaina, ata imo akuta tedogotara awa, Caesar mi ainda katari awa barate siutara.”