Godigo Sęba Tagala Palai Bidigo Po 26:24-32

²⁴Te bidi Pol aga digi tau sabo po tama obadi, te bidi Festus agai agabolo i bomonama weyu, te po wali, “Pol, nage wabo pobao. Nage hauwa sogo skul wai bidi dao. Tama te genuai kolesaga sai bidi dao. Tibaso, nage wabo pobao,” wali.

²⁵Tama Pol agai te po wali, “Festus, nage dago gavman tobolu bidi dao. Ena wabo pabo bidi menio. Eno dwagi yai homu elalu, te po eno mu obao.

²⁶E moni gavman bidi Agripa agai me ena e wabo po koneani. Tama te sę yali po pusubo eno wi ebo menio. Te tigidali yali sę agai gedude yai sę dao, te dualama me yai sę menio.

²⁷Moni gavman bidi Agripa, nage Godigo pedauwalide po selama pusali bidigo asęani po nago homugo mu konebawe, te poba naga homu maniwe? Eno homugo naga homu te poba mu muani,” Pol agai te po wali.

²⁸Te bidi Agripa agai Polbolo te po wai, “Nago homugo te nago dwasianu wabo pogo ena Jisas wali pabo hani tomoba kegasa paibawe?” te po hanalu wali.

²⁹Tama Pol agai agabolo te po wali, “Dwasianu pogo ma, te bobobage pogo ma, te usu dao, magigo menio. Tiali goli, eno Godibolo po olama, nage dali, e po mibo bede bidibo we bidi me tigidali ena yaligia emainu ebao. Tiali goli, eno homugo dage ena kalabuside bidibo tiwai bididalio,” Polgo te po wai.

³⁰Te Pol agai po wabo silibo si, te moni gavman tobolu bidi Agripa me, te gavman tobolu bidi Festus me, te genuai nogi we Bernaisi me, te augwali sela dali bidali bidi me, augwali tigidali doligiluama, augwaligo te po tų ebo be tagalama, pali.

³¹Tama te be tagalama, augwa hasi tomode po miai, “Te bidi agai kalabus yabo dwai kolesaga me deli ebeo. Tama aga augwaligo elabo dwai kolesaga me ebeo,” wali.

³²Tama Agripa agai te Festusbolo te po wai, “Te bidi agai ‘Te Sisar agai eno po tų odomainao’ wabo po wagi menigi sogo da, teda dago aga olo tagala paligi da,” te po wai.