Hechos 26:24-32

²⁴Pablo saynata defiendekuyta tukuruqtinmi, gobernador Festoqa altomanta qaparispa niran: —¡Pablo, qanqa locoñamá kashanki! Qanqa nishuta estudiasqaykiwanmi locomanña tukurunki, nispa.

²⁵Chaymi Pabloqa gobernador Festota contestaran khaynata: —Ancha respetasqa wiraqocha Festo, manan noqaqa locochu kani. Hinaspapas kaykunataqa allin yuyayniypi kaspaymi, cheqaqtapuni rimashani.

²⁶Rey Agripapas chaykunataqa yachanmi. Chayraykun noqapas paypa yachasqankunata yachasqayrayku, paypa ñawpaqninpi mana manchakuspay, iman kaqta rimashani. Hinaspapas chaykunaqa manan pakallapichu pasaran. Aswanqa llapallan runakunapa ñawpaqninpin pasaran, nispa.

²⁷Saynata niruspanmi Pabloqa niran rey Agripata: —Rey Agripa, ¿qan creenkichu profetakunapa escribisqanpirí? Yachanin creesqaykitaqa, nispa.

²⁸Hinaqtinmi rey Agripaqa Pablota contestaspa niran: —Qanqa yaqachallan convencerachiwanki Jesucristopi creenaypaq, nispa.

²⁹Chaymi Pabloqa niran: —Noqaqa Diosmantan mañakushani, qanpas hinallataq llapallan kaypi kaq runakunapas, chaylla Jesucristopi noqa hina creenaykichispaq. Ichaqa ama khayna cadenasqachu, nispa.

³⁰Saynata Pablo niqtinmi, rey Agripapas, gobernador Festopas, Berenicepas, hinallataq paykunawan kaqkunapas, tiyasqankumanta sayariranku.

³¹Hinaspan chaypi kasqankumanta lloqsispanku, sapallankupi parlanakuranku khaynata: —Kay runaqa manan ni imatapas wañunanpaq hinaqa ruwasqachu. Chaymi payqa mana carcelasqaqa kanmanchu, nispanku.

³²Saynata rimanakuspa kutimuspankun, rey Agripaqa Festota niran: —Kay runataqa kacharipusunmanmi karan, sichus paypuni mana mañakunmanchu karan: “Rey Cesaryá juzgawachun nispa”, niqtinqa.