ዬሱሲ ኪቴዳዋንቱ ኦሱዋ 26:24-32

²⁴ጳዉሎሲ ባሬንቱባ ሃዋዳን ያጊዴ ዛሪሺን፥ ፒስፆሲ ኮሻ ꬎቁ ኡዲዴ ኣ ሃሳያ ꬉባናው፥ «ጳዉሎሳ፥ ኔኒ ጎያ፤ ኔኒ ዳሪ ታማሬዳዌ ኔና ጎሻና ሃኔ» ያጌዳ።

²⁵ሺን ጳዉሎሲ ሃዋዳን ያጌዳ፤ «ቦንቼቴዳ ፒስፆሳ፥ ታኒ ቱማቴꬃን ሎዖ ዬዉዋኔ ዎዛና ቆፋ ሃሳዪያዋፔ ኣቲን ጎዪኬ።

²⁶ታኒ ካቲያ ኣግሪጳሲ ሃ ዬዉዋ ቆንጪያን ኦዲያዋ ኢ ኤሬ፤ ኣዪሲ ጎፔ፥ ሃ ዬዉ ጌማን ኦሴቲቤና ዲራው፥ ሃዋፔ ኢቱኔ ኣፔ ጌሜናዋ ታኒ ጌሻዴ ኤራይ።

²⁷«ካቲያ ኣግሪጳ፥ ኔኒ ናባቱ ጌዳዋ ኣማናይ? ኔኒ ኡንቱንቱ ጌዳዋ ኣማኒያዋ ታኒ ኤራይ» ያጌዳ።

²⁸ካቲያ ኣግሪጳይ ጳዉሎሳ፥ «ሃዒ ሃ ቃንꬃ ዎዳቲንካ ታና ኣማንꬃናው ኮያይ?» ያጌዳ።

²⁹ሄዋፔ ጉዬ ጳዉሎሲ፥ «ዳሮ ዎዴ ጊዲና፥ ጉꬃ ዎዴ ጊዲና፥ ኔ ፃላላ ጊዳካ፤ ሺን ሃቼ ታኒ ኦዲያዋ ሲሲያ ኡባይ ቃሲ ታዋዳን ቃሼቶፒኖ ኣቲን፥ ታ ማላ ጊዳናዳን ፆሳ ዎሳይ» ያጌዳ።

³⁰ሄዋፔ ጉዪያን ካቲ፥ ሞዲያ ፒስፆሴ፥ ባሪኒቄኔ፥ ኡንቱንቱና ዴዒያ ኡባይ ዴንዲ፥

³¹ኢቲ ባጋ ሲሚዴ፥ ኢቱ ኢቱዋና፥ «ሃ ቢታኒ ሃይቁሳይ ኣቶ ሺን፥ ቃሹዋሲካ ቤሲያባ ኦꬂቤና» ያጊ ሃሴዬዲኖ።

³²ኣግሪጳይ ፒስፆሳ፥ «ሃ ቢታኒ፥ ‹ቄሳሪ ታባ ፒርዶ› ጊቤኔንቶ፥ ቢሌታናው ዳንዳዬ ሺን» ያጌዳ።