Hechos 26:24-32

²⁴Ku veꞌe je̱ Pablo veꞌem kya̱jts, vanꞌit tseꞌe je̱ Festo ma̱kk vyaajñ: ―¡Kaꞌa xa mitseꞌe mvija, Pablo! Je̱ꞌe̱ veꞌe ku veꞌe o̱o̱y mtunna̱ku̱toonka, je̱ꞌe̱ ka̱jx tseꞌe mko̱o̱ꞌkvíjini.

²⁵Vanꞌit tseꞌe je̱ Pablo yꞌatsa̱a̱jv: ―Kaꞌa xa a̱tseꞌe nkavija, ñu̱má̱jiva Festo, juuꞌ xa a̱tseꞌe nka̱jtsp, o̱y payo̱ꞌo̱yani je̱ts tyú̱vamts je̱ꞌe̱ veꞌe.

²⁶U̱xyaja xa ya̱ꞌa̱ veꞌe ya̱ yakkutojkpa Agripa juuꞌ ya̱ꞌa̱ veꞌe nu̱jom du̱nu̱jaꞌvika̱jxp, je̱ꞌe̱ ka̱jxts a̱tseꞌe toꞌk aaj toꞌk jo̱o̱t yaja ya̱ꞌa̱ vyinkujk nka̱ts, vinjávani xa a̱tseꞌe je̱ts nu̱jom ya̱ꞌa̱ veꞌe du̱nu̱jaꞌviva, ku̱x kaꞌa ya̱ꞌa̱ veꞌe yꞌayuꞌutspú̱ma.

²⁷Yakkutojkpa Agripa, ¿mjaanchjaꞌvipts mitseꞌe juuꞌ veꞌe kyo̱jtstu je̱ Nteꞌyam je̱ yꞌayook ko̱jtsnajxpata̱jkta? Nnu̱jaꞌvip xa a̱tseꞌe je̱ts mjaanchjaꞌvip mits je̱ꞌe̱ veꞌe.

²⁸Vanꞌit tseꞌe je̱ Agripa yꞌatsa̱a̱jv: ―Veꞌem xa mitseꞌe xnasjava je̱ts tun jatyji a̱tseꞌe njaanchjávat je̱ts je̱ Jesús je̱ꞌe̱ veꞌe je̱ Cristo, ¿veꞌem xaja, kadi?

²⁹Vanꞌit tseꞌe je̱ Pablo yꞌatsa̱a̱jv: ―Pa̱n jatyji, uk pa̱n kaꞌa tun jatyji, je̱ Nteꞌyam xa veꞌe vaꞌanup je̱ts ka mítsjyapeꞌe, veꞌempa veꞌe nu̱jom pa̱n pa̱n jaty a̱tseꞌe u̱xyam xꞌamo̱tunajxtup, veꞌemts je̱ꞌe̱ veꞌe ku̱yꞌijttuva ax joꞌn a̱ts, je̱ꞌe̱jyji veꞌe ku veꞌe cadena tsum kyaꞌíttat.

³⁰Ku veꞌe veꞌem je̱ Pablo vyaajñ, vanꞌit tseꞌe tyénidi je̱ yakkutojkpa Agripa ma̱a̱t je̱ Festo je̱ts je̱ Berenice ma̱a̱t nu̱jom pa̱n pa̱n jatyeꞌe je̱m tsu̱u̱nidup vyeꞌna.

³¹Apu̱k tseꞌe ña̱jkxti je̱tseꞌe du̱ko̱jtsmojkti. Jidu̱ꞌu̱m tseꞌe ñavyaajnjidi: ―Kaꞌa xa ya̱ꞌa̱ veꞌe ya̱ jayu tu̱du̱titún juuꞌ veꞌe kyuꞌo̱o̱ꞌkap ukpu̱ juuꞌ veꞌe kyupoxu̱nta̱ktsa̱a̱nap.

³²Vanꞌit tseꞌe je̱ Agripa du̱nu̱u̱jmi je̱ Festo: ―Ku̱yakmasa̱a̱k xa ya̱ꞌa̱ veꞌe ya̱ jayu pa̱n viinmeꞌe ku̱du̱kahꞌamo̱tu je̱tseꞌe je̱ yakkutojkpa César tyo̱kimpayo̱ꞌo̱yju̱t.