Hechos 26:24-32

²⁴Mänitä Festo yaax̱y: ―Pablo, tøø miic̈h jaduhṉ mguhhiṉ̃. Coo hanax̱iä tøø mgapxtaꞌagy, jeꞌe tøø xyajcuhhiṉ̃.

²⁵Mänitä Pablo yhadsooyy: ―Wiindsǿṉ Festo, cábøch nguhhiṉ̃. Jaꞌa tøyhajt, jeꞌec̈h nmädiaacpy. Homiäbǿjnøch jaduhṉ nmädiaꞌagy.

²⁶Mänitä Pablo jaꞌa Agripa ñämaayy: ―Wiindsǿṉ Agripa, cǿx̱iøch cham̱ nmädiaꞌagy maa miic̈h mwiinduumän. Nmǿødhøc̈hä tøyhajt jaduhṉ coo miic̈h jaduhṉ mgøx̱y najuøøbiä nebiátyhøch cham̱ nmädiaꞌagy. Hijxwiinduum jaduhṉ tøø jiadyii tøø tiuñii, caꞌa yhayuꞌuc̈h caꞌa yhameeꞌchä.

²⁷Wiindsǿṉ Agripa, nnajuǿøbiøch jaduhṉ coo miic̈hä mädiaꞌagy mmäbøcy, jaꞌa profetadøjc‑hajxy jecy yhädiúuṉäbä.

²⁸Mänitä Agripa yhadsooyy: ―Ja weenjátyhøch miic̈h xquiaꞌa yajniñähdujcä cooc̈h jaduhṉ nmäbǿgät jaꞌa Jesúscøxpä.

²⁹Mänitä Pablo miänaaṉ̃: ―Hoy jia weenjaty hoy jia møjjaty hajxy mgaꞌa mäbøcyñä, chojpiä Dios jaꞌa jioot jaduhṉ coo jaꞌa miädiaꞌagy hajxy nägøx̱iä mmäbǿjcät jaꞌa Jesúscøxpä nébiøch nmäbøquiän, mäduhṉ̃tiä hajxy yaa mhamädoow̱hity, møød miic̈h Wiindsǿṉ Agripa. Pero cábøch jaduhṉ nmänaꞌañ coo hajxy tsum̱y mhídät nébiøch høøc̈hän.

³⁰Mänitä Agripahajxy tiänaayyøꞌcy, møødä Festo, møødä Berenice, møødä jäyaꞌayhajxy nägøx̱iä.

³¹Mänitä hajxy tiøjpädsøøm̱y. Mänitä Agripahajxy hawiing ñiñämaayyä møødä Festohajxy: ―Caj yøꞌø craa tii cädieey miøødä. Cab jaduhṉ yhahixøꞌøy coo tsum̱y jiaac hídät ni coo yaghoꞌogǿøjät.

³²Mänitä Agripa jaꞌa Festo ñämaayy: ―Coo yøꞌø craa häxøpy tøø quiaꞌa mänaꞌañ coo jim̱ nøcxy yajtøyhajtyegaꞌañii Roma maa jaꞌa gobiernä wyiinduumän, tøø häxøpy yhøxmac̈hii.