1Tinandù i Saulo se pegpengimatay dan ki Esteban. Inlebeng te menge otaw egpenimanem se lawa din. Ontò dan migkelag tandà te lano dan kandin. Lekat te aldaw te pegkematay i Esteban, ontò pinemilang se kedita te otaw egpemenal doton te Jerusalem. Yan nesayo dan aw migbilit-bilit dan doton te menge lonsod te Judiya aw Samarya. Meneng mig-ogpà pa se menge sogounun i Cristo doton te Jerusalem.
3Nemilang si Saulo te menge otaw egpemenal, aw timeped te menge balay dan amon dekepen din dan aw kelebosowen, pengkey meama aw bayi.
4Pegkebilit te otaw egpemenal, migtoladà dan te menge doma otaw tepad ki Jesus pengkey kenan dan pesalo.
5Dimoton si Felipe te sebad lonsod doton te Samarya. Migtoladà sikandin te otaw kidoen te si Jesus se Misiyas insogò te Timanem.
6Migsebad se menge otaw nenenalan kandin, so dinineg dan se intoladà din, aw kinità dan se kepelahan ininang din.
7Doen menge bosaw migpuypuy aw impelowà din lekat te otaw. Pinegolian din heman se menge otaw kenà egpekeiwal aw doma otaw kapig.
8Yan ontò neluba se kedita te otaw kidoen.
9Doen sebad otaw biyasa ekon egdelikmata si Simon. Nenamay den sikandin nepelahan te tege Samarya, so eg-ikagi te sikandin se melangkaw otaw.
10Egpenenalan se kedita te otaw diyà kandin, pengkey sagkep aw melangkaw otaw, so eden dan aw doen tolos te Timanem diyà kandin.
11Yan egpenenalan dan kandin, so nenamay dan nepela te pegdelikmata din.
12Meneng pegtoladà i Felipe kandan tepad te peglowan te Timanem aw si Jesu Cristo, nemenal dan aw binonyagan dan heman, pengkey meama aw bayi.
13Nemenal heman si Simon. Penga te pegbonyag kandin, timaking ki Felipe, aw nepela sikandin diyà te kepelahan ininang i Felipe.
14Pegketaga-taga te menge sogounun i Cristo doton te Jerusalem te nemenal se tege Samarya te kagi te Timanem, insogò dan si Pedro aw si Juan domoton te Samarya amon megtelaban kandan.
15Pegdateng dan doton, migtawal-tawal dan diyà te Timanem amon domateng se Espiritu Santo kandan,
16so pengkey nemenal dan ki Jesus aw binonyagan dan, meneng wedà dateng se Espiritu Santo kandan.
17Pegpemaed i Pedro aw si Juan kandan, dimateng se Espiritu Santo kandan.
18Pegkità i Simon te imbegay se Espiritu Santo pineokit te pegpemaed te sogounun i Cristo kandan, imbegay din se kwarta diyà kandan
19aw minikagi, “Begayi a heman te tolos sìyan amon kebegayan te Espiritu Santo se kedita te otaw pemàdan ko.”
20Minikagi si Pedro, “Kebàtan ka aw kwarta no, so eden no aw kebeyadan se ibowang te Timanem.
21Wedad labut no te eg-inangen day, so wedà kelobos se pedowan no diyà te Timanem.
22Pegselsel ka te salà seini. Pegtawal-tawal ka diyà te Pengolo aw mepakay din pegwedaden se medaet ibeg te pedowan nikaw.
23Netegahan ko te ontò ka pa miningà, aw neallang ka pa te salà.”
24Nemoyò si Simon kandan, kagi din, “Pegtawal-tawal kaw diyà te Pengolo amon wedad ketomanan te kagi niyo.”
25Mig-indan si Pedro aw si Juan te kagi intoladà te Pengolo kandan aw ininang din kinità dan. Penga niyan, minolì dan doton te Jerusalem, meneng migtoladà dan heman te Mèpiya Indan doton te menge lonsod te Samarya inokitan dan.
26Migpekità se anghil te Timanem diyà ki Felipe. Minikagi sikandin, “Doton ka te dalan lekat te Jerusalem pesalo doton te Gasa. Yan se dalan kidoen te kebigtilan.”
27Nayan, timolò si Felipe aw dimoton te dalan intedò kandin. Na, doen sebad otaw tege Etyopya tapay dimoton te Jerusalem amon megsimba kidoen. Melangkaw se gulal din, so sikandin se tesorero te bayi eglowan doton te Etyopya, sìyan egtewalen Kandaki.
28Minolì den se sìyan tege Etyopya lekat te Jerusalem. Pegsakay din te kelisa din, migbasa sikandin te libro insolat te telekeliwat te kagi te Timanem gebii si Isaias.
29Simogò se Espiritu Santo ki Felipe, kagi din, “Egpangi aw tekingi se kelisa sìyan.”
30Kimagnan si Felipe, aw dinineg din se tege Etyopya migbasa te libro insolat te telekeliwat te kagi te Timanem gebii si Isaias. Mig-insà si Felipe, “Nekelabet ka lay te binasa no?”
31Timaba se tege Etyopya, “Eked a pekelabet singed aw doen otaw megtoladà kanak.” Penga niyan, impesakay din si Felipe.
32Nayan, seini se kagi te Timanem binasa te tege Etyopya. “Iling sikandin te karniro inibing amon iyawen. Iling heman sikandin te nati te karniro kenà eg-ikagi aw gontingan se bolbol, so pengkey kelimahan sikandin, meneng wedad palos kagi din.
33Pengkey wedad salà din, meneng pegyèyaen sikandin aw ipelumun. Wedad bowad-bowad din, so imetayan sikandin.”
34Mig-insà se tege Etyopya ki Felipe, kagi din, “Sinu lay se tinedoan te telekeliwat te kagi te Timanem simolat kani? Sikandin aw doma otaw? Indani a den.”
35Nayan, migtebò si Felipe miglebad-lebad diyà kandin te kagi te Timanem sìyan. Migtoladà sikandin te si Jesus se egpelowà te otaw lekat te salà.
36Wedà kenamay, dimateng dan doton te wayeg. Minikagi se tege Etyopya, “Doen wayeg dini. Mepakay lay aw bonyagan a no?”
37Minikagi si Felipe, “Mepakay aw ontò ka den nemenal.” Minikagi se tege Etyopya, “Nemenal a den te si Jesu Cristo se ontò Batà te Timanem.”
38Penga niyan, sinagkà din se kodà. Limanglang dan diyà te wayeg aw binonyagan sikandin i Felipe.
39Peg-anggin dan lekat te wayeg, inabat te Espiritu Santo si Felipe. Wedà den kitai te tege Etyopya si Felipe, meneng dimeleg aw neluba se pedowan din.
40Meneng kenan si Felipe, doton den te lonsod te Asoto. Pengkey kenan pesalo, gayed sikandin migtoladà te Mèpiya Indan tepad ki Cristo kidoen te kedita te lonsod inokitan din lamig dimateng doton te Sesarya.
