Luku 1:40-54

⁴⁰Pao pyakamatala baa Sakatayanya andaka kolandatala baanya kaiingi Ilisapeta kandao, “Auu pyoo petelepe?” lao pisia-pyaa.

⁴¹Matiame baa pisiamo doko Ilisapetame siamo gii dokopaka Ilisapetanya ingi dokonya wane peteamo doko ema pia-pyaa. Dokopa Oli Sipitisa dokome ipao Ilisapetanya mona sakatasoo tumbalu pia-pyaa.

⁴²Dokopa Ilisapetame pii mende puu lao dapa lea-pyaa: “Goteme emba auu pisipumosa embame enda dupa pitaka ita minilino. Embanya inginya wane tee pilyamo doko Gotenya auu pipae.

⁴³Namba enda epe api kaita nambanya Kamongo dokonya endangi dokome namba kanja epepe?

⁴⁴Embame namba kandao pii lapino doko kaleme sipupa nambanya wane inginya pitipumu dokome mona etete yaepao ema pyuu petelyamo.

⁴⁵Kamongonya pii emba-kisa epeamo dupa tenda kiningi jetana lao masoo minapino dokonya emba mona yaepao pilyenona,” Ilisapetame dopa lea-pyaa.

⁴⁶Dokop Matiame lao pituu, “Nambanya moname Kamongo doko lao tama pilyo. Goteme namba pyoo nyilyamo doko lao masetala mona etete yaepelyo.

⁴⁸Namba baanya kendemane enda kenge nasingi doko kondo kaya. Indupapi tangapi endakalinya mandipaenya mandipae dupa pitakame namba Goteme mona yaepasiana latami.

⁴⁹Gote etete pupu lapae dokome namba-kisa kalai andake doko piana baa eteteaka epe.

⁵⁰Endakalinya mandipaenya mandipae baa andanda semaiyoo paliuu pelyami dupa baame kondo kayao katenge.

⁵¹Baa pupu lapae dokome kalai andake mende pia. Nyakama tangeme alyasale joo kalyamano lao masingi endakali dupa baame watao nepa nepa pia-pyaa.

⁵²Baame kiŋi pupu lapae dupa isa pyandatala, kenge nasingi endakali dupa minalyia.

⁵³Opale daa jilya endakali dupa epeme kapa pisetala, opale longo silya endakali dupa mee pena lao watao pingi.

⁵⁴Baame naimanya yumbange dupapi, Apotakame dokopi, Apotakamenya mandipaenya mandipae palitami dupa pitakapi dupa nisotona leamoli pyoo, baanya kondo kaenge mana doko kame sala nayao kalai akali Isataele dupa nisoo kateana,” lao Matiame wee joo lea-pyaa.