LUKU 1:40-54

⁴⁰Wokoya aya weuhau Jekolaeyada numudalauma yoweko menaladama eke loetaiye.

⁴¹Sa-okoya eke noloetaiyokoya, Elisabetida ohumanautima oluhomamo hugili oko momoga iyoko eliye. Sako elekoko, Omaimidana weuna oluhomamo Elisabetida obohalauma lemeko waitoko minokaiyoko,

⁴²ga napauti Meleda maya sa-loko lo miye: Omailimoya muki menakipauti ilime eto okoko makuya emekaiyo, ito oluhoka etadawokiya lusa voetokaiye.

⁴³We napanemidana idola minane. Mena ebili maya minoboya nemotokaya nenaha iyoko nisene.

⁴⁴Elo. Eke adoha nolonetaniyoko ohumaneuti oluhonema momoga oko omola adoha noyowiye.

⁴⁵Ito emoya We napamamo lo mibo ga maya woko letiye loko elewole oko ata elekaniyoko Omailimo maku mekaiye. Yamuya eloyoko wati iye.

⁴⁶Loko liyoko, Melemamoya sa-loko lo miye: Nemoya nukaneya We napamidana epoka noloe.

⁴⁷Ito weuna oluhonedunuya Omaimo lahelametibo nesauti nilimitibo wemuya oli meko epoka noloe.

⁴⁸Ito nemo elekele oluwa lemeko minobo maya olotiya nilime-loko noyowiye. Sa-noinako, alikaya mini-liki yowitabo wewenasi nemodamu Omaimo maku nimibo menae liki likilae.

⁴⁹Sa-onenako, Omaiya elewoleyalaki welimo nemotoka saina ulawa le soto molokaiye. Sa-onenako, emo ulila maya eto okoya ne.

⁵⁰Emoda oli mitabo wewenaya mini-liki yowiki minaboya Omailimoya nasahili obetokaka noiye.

⁵¹Ito edimonipomu eleyoko yowekaka noibo wewenaya eimola elewoleyalaloti dilipe hulokaka noiye.

⁵²Ito duliki wesi sa-inayokoma onowelaki siyaloti dipisoko le hulikaiyoko mohiliki limikaka niae. Sakokoya limiki minabo wewenasida duli maya leko yowekaka noiye.

⁵³Ito uvaminanipo minamibo ito nodemu helikaka niabo wewenasida maya saina ihilawa biyoko niki dohumanipo iki minikaka niae.

⁵⁴Ito uvaminanipoki wewenasidama hulobetokaiyoko yowiki limiki minikaka niae. Omaiya ukala laloki we nenako, lemo Isilaelo wewena elekele oetoko minudawolaya lilime lalo oletaiye.