Luk ma Peba 1:40-54

⁴⁰Ngɨrpu ton b'ɨgaronj Jakariyamna met wa dɨde Elisabetɨnd simesime womnonj.

⁴¹Ɨ re Elisabet utkundonj Mariyamna simesime yɨtkak, odenja tina kom borand b'ɨga b'arurkitonj, ɨ ket God Yɨnayɨna Wɨngawɨnga ke Elisabetɨnd yɨndangɨr womnonj.

⁴²Sɨ Elisabet ket ukoi ara kɨma obailitonj gar sam kɨma, ɨ ket Mariyand womnonj da, “Man re b'ogɨl omni kongga et komkesa kongga wa wɨngɨrɨnd. Dɨde moina komɨnd b'ɨga toda kwa b'ogɨl omni e.

⁴³Nangga pae onggɨtyam b'ogɨljog mɨle awɨk kor pɨlɨnd, ɨte re kor Yonggyamɨmna mog tik kor pɨlwa ken esmaram?

⁴⁴Mop nokɨp re moina simesime nonykok b'ɨgar koina yɨpya bora wa, odenja komɨnd b'ɨga ma sobijog sam kɨma na b'arurkis.

⁴⁵Sɨ ton b'ogɨl omni omb jɨ yeto re yɨtkak gar ke akateniny rɨna re Yonggyam tin wumɨr womnonj, mop nokɨp opimemb Tina yɨtkak opima ɨmɨnjogɨm taukanj.”

⁴⁶Ɨ ket Mariya windonj da, “Koina kukɨpɨt kor Yonggyamɨnd nyɨ pumb wa yurowateneny.

⁴⁷Ɨ koina wɨngawɨngat ɨta koina yɨrkokar okawayam Godɨm pɨlɨnd ukoi sam yomnɨkeneny.

⁴⁸Mop nokɨp kon re goujog wɨko kongga en, ajɨ Godte b'obogɨl yɨr ɨpka niyeny. Ɨ mop nokɨp kwa komkesa rɨga yepim re yu wekeny dɨde tekenkeneny warɨtawarɨta onggɨt gowukoyɨnd, ton opima ken b'ogɨl notɨnenenyi yu ke dɨde naska nya wa.

⁴⁹Mop nokɨp dandayam God kea ukoijog gasa nomnɨkainonj. Ɨ Tina nyɨ re yɨnayɨna e.

⁵⁰Ɨ God tena kear amnɨkeneniny yepim re Tin moga kɨma yesourenenyi komkesa yunɨm dɨde warɨm b'usmureni rɨga wa wɨngɨrɨnd.

⁵¹God Tina yɨm ke danda wɨko amnɨkeneniny, sɨ Ton ket b'asourena rɨga erenjaeneniny yepim re towaina garɨnd b'asourena nony menamena amnɨkenenanj.

⁵²God ukoi wɨp iyoi rɨga gou wa amnɨkeneniny towaina pɨpmet ke, ajɨ Ton rɨga pumb wa urowateneniny yepim re towalenggyam gou wa aukenenanj.

⁵³God owoupa rɨga ngor amnɨkeneniny b'ogɨl gasa ke, ajɨ jogjog gasa kɨma rɨga yɨmkak nena etmɨkeneniny.

⁵⁴God kea yɨm akaeneninonj Tina wɨko rɨga Israelɨnd, odede na ɨt re rɨngmena re Ton tɨrɨr yɨt amninonj mera b'uwar. Sɨ onggɨt penaemb Ton ngɨrpu kesa nonyɨnd awameneninonj kear omnenam Abraamɨm pɨlwa dɨde tina komkesa b'usmureni b'ɨgawar wa pɨlwa.”