Luki 1:40-54

⁴⁰apula:, ewa Sekalaya koane suwemi hanapola: Elisapete potapola: ikilale napolo e seya.

⁴¹Au selapita:, Elisapete ta:takamake, sala keaya e kupu suwemi tanewa sipa:kuya. Aputa:, Elisapetewa Ho Napowa woliyeti.

⁴²Elisapeteyewi sowa unuwapo selese, “Kesalela: sopoke Koteyewi potosewamona kewane heneya sosolo seselese napola:takeye. Apula: sala keaya keyewi kesipesa epamokiwala Kote seselese seila:taposakeye.

⁴³Newa itapa. Apula: sena Sosolo yowa ne salo inisewa ko:yawemiye?

⁴⁴Keye selese, ‘Ikilale napolo,’ e seya epamowa ne kena:yewi ta:tapola:, sala keaya ne kupu suwemi taneyawa epelesa: sipa:kulukeye” e seya.

⁴⁵Meli, keyawa nano ketea sopoke auma:na: e seyawa Kote Sosoyawa kema seya amowa aupesakeye esa: seli topu. Epemi ela: keyawa henenapo esa: epelema.

⁴⁶Aputa: Meli selese, “Ne himuwamokeyawa Sosolo unua wapilikeye.

⁴⁷Apula: ne howa epeya sosolo telakeye ko:yewemiye Kote ene ela: newa mene silinase.

⁴⁸Newa ene tima:na: tisene kesale. Ne unua sosomakeye. Alawamona, Koteyawa newa sosolo matana:sela: elakeye. Napuwemiwana sikapewana sena kesale e sola sopoke iyawa au selaposakeye, “Koteyawa epeya sosowa nema mikeye,” e selaposakeye.

⁴⁹Kote Penaiya Ilima Eyawa nano sosolo keayamawa newamopela: timiya. E unua Kalaiya Papalola napolo sopolo elakeye.

⁵⁰Ikila yemiwana sikapewemiwana sena kesaleyewi Kote unua wapilisaleke, Eyawa iwa hauwekilise Sosolo seselesenekeye.

⁵¹Kote ene tiya:yewi talapoiya tima:na: ti alanase, sena kesale eta:wiye matana honosane fa:nemi ene unua sosolo temana esa: matanesene, sena kesale amowa Koteyawa alutaletiye ilikepilisene.

⁵²Sena kini seawemi helesene amowa Koteyawa ewa iya:taposakeye. Alawamona, sena kesale eta:wiye ene ewa me sinapola: elaleke, Koteyawa ewa e unua me tila:taposakeye.

⁵³Sena meina sitalakamawa nano napowa katalo kinanapeyapola: teila:walotiye apolosene, alawamona, sena kesale nano ketea mutalo tela, amowa Koteyawa mokopo ilikepeya.

⁵⁴Eyawa e tima:na: tisene sena Isolaiyawa sesela. Apula:, Eyawa nini kouwa Epalahame ima sepapowa a matanepela: enene. Apula:, Eyawa sena kesale sikape hetetima:na: epamowa kokolo kau tesene kokona ewamokiwa eta: kepoliyetimakeye.