Lukase 1:40-54

⁴⁰Akwɔ́négé, akpɛ mmu gepúgé Sakariya, atamé mendée wuú Ɛlisabɛt.

⁴¹Gébégé Ɛlisabɛt awuú matame Mɛri, maá yi alú ji unɛ akwilé melu ujwɔ́lé ne ɛshyɛ, ne Mendoó Ukpea ɛchwɔ́ gbée Ɛlisabɛt metɔɔ́.

⁴²Ji ado ɛlúlú ajɔɔ́ ne mɛri aké, “Wɔ ɔwya ɛ́fwɔ́ ɔpwɔ andée ako, ne mejé Ɛsɔwɔ ɛ́bɛ́ ne maá yi wɔ ɔbyɛ́ne nyɛ.

⁴³Nlu kpɛ́ waá ayi Ɛsɔwɔ anógé me ne mmá Ata wa achwɔ gɛ́ me uŋkɛɛ́?

⁴⁴Wyɛ ɔké ɔtamege me mbɔ, nechɔ́chɔ́ népyɛ maá akwilé né melú ujwɔlé.

⁴⁵Méjé Ɛsɔwɔ ɛ́bɛ́ ne ji yi akamé nnó mechɔ́ ɛwé Ata ajɔɔ́ mbɔ, ɛbɛ nyɛ́ wáwálé.”

⁴⁶Mɛri aké: “Metɔɔ́ wa ɛgɔ́ɔ me ne Ata.

⁴⁷Ne metɔɔ́ wa ɛlú ne nechɔ́chɔ́ gétúgé Ɛsɔwɔ Mempoó wa.

⁴⁸Ji ate me yɛ ɛlé nlú lé meŋkpané defwɛ́ wuú. Lɔ nána ɔjyɛ́gé mbɛ, bɔɔ́ ako akúu nyɛ́ me nnó muú yi abɔɔ́ nebɔ,

⁴⁹nendé Ɛsɔwɔ yi awya uto uko, apyɛ me gekpɛ́kpɛ́gé mechɔ́. Ɛ́nógé ɛ́bɛ́ ne ji kpaá tɛ kwyakwyá,

⁵⁰agɛ́ne meshwɛ mbaá bɔɔ́ bi anóge ji, ɛlɔ́ né antɛ bwɔ́ ɛkwɔ́né né upyáne.

⁵¹Alɛré ɛshyɛ ne ɛbwɔ wuú mantyá bɔɔ́ nepá ne ufɔɔ́ unó bí ɛbwɔ́ áfɛ́rege.

⁵²Aferé afwa né malú ujwɔ́lé bwɔ́, ne afyɛ́ ubyá bɔɔ́ né malu bwɔ́.

⁵³Achyɛ́ menyɛɛ́ mbaá bɔɔ́ bí alú mesa, ne abú afwa áfɛ́ amu máwa.

⁵⁴Ate menomenyɛ ɛwé ji abɔ́ anyɛɛ́ ne ukwéne antɛ sé, ne náná achwɔ́ mampoó baá Isrɛli, bɔɔ́ utɔɔ́ bií. Apyɛ wyɛ ndɛre ji abɔ́ anyɛ́meno nnó agɛne Abraham meshwɛ, ne upyáne bií tɛ kwyakwya!”