LLUKU 1:40-54

⁴⁰Pumba akuna ye Sekarayanga ulkana sukundu pumbale ambo Ellisapete kanopa “Na okoro.” nirimu kinia kanguloringili.

⁴¹Ellisapetene Marianga ungumu pilierimu kinia Ellisapete yunga olona bolangomo pukua topa ola mania serimu pilierimu. Kanu-kinia Pulu Yemonga Mini Kake Sélimu Ellisapetenga konopuna pumba molopa manda serimu kinia “I-siku i-siku ni.” nirimu mele

⁴²Ellisapetene ungu tondolo sepa nimba nimbale: “Ambo molemelemanga pali nu maloya. Ambomanga pali Pulu Yemone nu olandopa sepa peanga sirimu. Bolango nu olona mondolenomo kepe yuni sepa peanga simbala.

⁴³Na ambo kiri se molonduna nanga Ye-Awilimunga anumu nu onumunga na konopu awisili kimbu sikiru. Aku senumunga na-kinia seko peanga sikinu.

⁴⁴Nu ongole “Na okoro.” ninu-na komumuni piliendu kinia nanga olona molomu bolangomo paa konopu sipa pukua topa ola mania semu.

⁴⁵Ye-Awilimuni nundu nirimu ungumu pilkuli ‘Sika nikimu. Yuni “Sembó.” nikimu mele sika aku sembá.’ ningu kuru mondorunumunga yuni nu sepa peanga sikimu mele sepa peanga simba kene nu konopu siku molani.” nirimu.

⁴⁶Ellisapetene nimba pora sirimu kinia Mariane nimbale: “Pulu Yemo nanga Lipa Tapondopa, Mindili Nombo Molopo Kinjiliu Aulkana Wendo Lipa, Manda Molopo Kondombo Aulkana Lipa Mondomba Yemo kinia na konopu paa awili sepo sikirumunga nanga konopumuni Ye-Awilimu kape nimba imbi ambolopa paka tondokomo.

⁴⁸Pulu Yemo yuni yunga we-ambo-kendemande kirimu siye naa kolopa konopu kimbu sirimumunga nanga konopumuni aku sipa yu kape nikimu. Yombomane pe pe kepe kalko lingí yombomane nando “Pulu Yemone nu sepa peanga sikimu. Nu maloya.” ningí.

⁴⁹⸤Ye⸥ Tondolo Pulimuni na ulu tondoloma senderimumunga nando aku siku ningí. ⸤Ye⸥ Tondolo Pulimu yu ye kake sélimu.

⁵⁰Yu-kinia pipili kolko pilku limili yomboma yuni kondo kolopa molemo. Onone pe pe kepe kalko lingíma kepe kondo kolopa molopa mindi pumbá.

⁵¹Yuni yuyu ulu tondoloma serimu. Yombo kara pungu ononga konopuna onono kape ningu molemele yomboma yuni anju anju topa makoropa mundulimú.

⁵²Yomboma yombo-kamako molko koleama nokoko molemelema yuni topa mania mundupa, yomboma ononga imbima ono onono topa mania mundumbama yuni ononga imbima ambolopa paka tondolemo.

⁵³Gelene kololemele yomboma yuni ‘Olo sepili.’ nimba kere-langi peangama sipa, yombo kamakoma méle seluri kepe naa sipa “We paa.” nimba makorolemo.

⁵⁴Yuni olionga pulu-pulu anda-kolepalimando “Sembó.” nimba, nimba panjerimu ungumu komu naa sipa pilipa molopale anda-kolepa Eporayamo kinia, Eporayamo yuni yandopa yandopa kalopa liltimu yomboma kinia, onondo “Sembó.” nimba, nimba panjerimu mele sembando olio Pulu Yemo yunga kendemande Isirele yombo molemolo akuma yuni kondo kolopa lipa tapondomba sepa molemo.” nirimu.