Luk 1:40-54

⁴⁰Okwok kwanak kwatogur kwawish Sekaraia ananit urupat aria kwonekumok yopuhi nyumnah Elisabet.

⁴¹Aria douk Elisabet kwomnek um agundok Maria kwonekumok yopuhi nyumnah um, aria batowin nyor okwokwihw apahw iri nyanagugwanam. Aria Iruhin ananin Mishin nyawish Elisabet abom aria nyapenyok shukunik.

⁴²Douk nyawishok aria nyakuhur kweyagwreh debeihi mah kwakri, “Nyak nyeshagrakuk ihiyumorim armago um agundok Iruhin nenekumen yopunyi um. Aria shopunek, enyudok batowin nyak nyunyubuki iri, Iruhin ta nunekumen yopunyi atin.

⁴³Aria enyudok douk nyatogrume um agundok eikin Debeini ananik amakek kwanaki kwatiwe um? Eik douk madae debeikwi armatok uwe.

⁴⁴Aria abudok atub nyutob abom eik yemnek agundok nyak nyenekume yopuhi nyumnah obi nyutob, batowin nyor eikihw apahw iri nyanadudareh aria nyanagugwanam.

⁴⁵Nyak douk nyenek bilip um Debeini ananin baraen aria nyak douk nyanadudareh. Debeini ta nuneken nyutogur kabi douk riguk anan nakripenyum!”

⁴⁶Aria Maria kwakri, “Eik yanadudareh abom aria yatuk Debeini ananin nyeigur nyato iruhw.

⁴⁷Eikin mishin douk nyanadudareh um Iruhin douk nutaurume naraowe yatanamori yape wosik atin iri.

⁴⁸Um maresh? Anan urkum morum eik nyeigur woke iri douk yasuhw ananin mour iri. Douk arigaha kweipon, ihishmorim arpesh ta shukri eik douk Iruhin nutaurume aria neneke yanadudareh atin iri.

⁴⁹Eshesh ta shukri yanadudareh um enyudok debeinyi yopunyi mour abom douk Debeini Iruhin nenekenyume iri. Aria ananin nyeigur douk nyenek holi abom aria yopuyopunyi.

⁵⁰Anan douk nenek giha abom um eshudok arpesh douk shape shakamum anan shagipeshan iri. Anan ta nenek gihaumesh arigaha shugokuk aria esheshish batowish shugiguk shukitaki iri shopunek. Anan ta nunekesh namudok atin.

⁵¹Aria anan dodogowin nenek mour um, anan apa nabo eshudok arpesh douk shanahur esheshish nyeiguhw shato iruhw aria esheship urkwip porum shunek yoweishi inahos iri nahiyahesh sharuwok shanak atin atinyuk.

⁵²Anan neyatakuk amam king nam habuhuk aria natuk nyeiguhw wokeshi arpesh shato iruhw.

⁵³Aria nekesh sabaishi yopishi eneshenesh eshudok yaruhish arpesh iri. Aria arpesh douk shatik sabaishi eshudok eneshenesh iri neshopokesh shanak wis wohis.

⁵⁴Ananim urkum douk wata morum enyudok adurin atinyi baraen douk seiwok nakripaguk apakish yamehesh-enyi. Aria nanaki um nutaurum ananish arpesh eshesh Israel douk shasuhw ananin mour iri.