LLUKU 1:40-54

⁴⁰Pupe akuna ye Sekarayanga ulkena suku pupelie ambo Illisapete kanopa “Na okoro.” nirimu kinie kanguluringili.

⁴¹Illisapetene Marianga ungumu pilirimu kinie Illisapete yunge olona ambolangomo pukue topa ola manie terimu pilirimu. Kanu kinie Pulu Yemonga Mini Kake Telimu Illisapetenga konopuna pupe molopa kapola terimu kinie “I siku i siku ni.” nirimu mele

⁴²Illisapetene ungu tondolo tepa nimbelie nimbendo: “Ambo molemelemanga pali nu malo. Ambomanga pali Pulu Yemone nu olandopa tepa konjirimu. Ambolango nu olona monjilinomo kepe yuni tepa konjimbela.*

⁴³Na ambo keri te molonduna nanga Ailimunge anumu nu onumunge na konopu aisili lipu mundukuru. Aku tenumunge na kinie teko peanga sikinu.

⁴⁴Nu ongolie “Na okoro.” ninuna komuni pilindu kinie nanga olona molomu ambolangomo paa konopu sipe pukue topa ola manie temu.

⁴⁵Ailimuni nundu nirimu ungumu pilkulie ‘Sike nikimu. Yuni “Tembo.” nikimu mele sike aku temba.’ ningu tondolo munduku pilirinumunge* yuni nu tepa konjikimu mele tepa konjimbe kene nu konopu siku molani.” nirimu.

⁴⁶Illisapetene nimbe pora sirimu kinie Mariane nimbendo: “Pulu Yemo nanga Lipe Taponjipe, Mindili Nombo Molopo Kenjilio Aulkena Wendo Lipe, Kapola Molopo Molopo Konjimbu Aulkena Lipe Monjimbe Yemo kinie* na konopu paa aili tepo sikirumunge nanga konopumuni Ailimu kapi nimbe imbi ambolopa ola linjikimu.

⁴⁸Pulu Yemo yuni yunge we ambo kendemande kerimu siye naa kolopa konopu lipe mundurumumunge nanga konopumuni aku sipe yu kapi nikimu. Yambomane pe pe kepe kalko lingí yambomane nando “Pulu Yemone nu tepa konjikimu. Nu malo.” ningí.

⁴⁹Tondolo Pulimuni na ulu tondoloma tenjirimumunge nando aku siku ningí. Tondolo Pulimu yu ye kake telimu.

⁵⁰Yu kinie pipili kolko pilku limele yamboma yu kondo kolopa molemo. Enene pe pe kepe kalko lingíme kepe kondo kolopa molopa mindi pumbe.

⁵¹Yuni yuyu ulu tondoloma terimu. Yambo kara puku enenga konopuna eneno kapi ningu molemele yamboma yuni anju anju topa makoropa mundulimo.

⁵²Yamboma nomi molko koleama nokoko molemelema yuni topa manie mundupe, yamboma enenga imbime ene eneno topa manie mundumbema yuni enenga imbime ambolopa ola linjilimo.*

⁵³Engelene kolemele yamboma yuni ‘Olo tepili.’ nimbe langi peangama sipe, yambo kamakoma mele teluri kepe naa sipe “We pai.” nimbe makorolemo.

⁵⁴Yuni olionga pulu pulu anda kolepalimendo “Tembo.” nimbe, nimbe panjirimu ungumu komu naa sipe pilipe molopalie, ⸤anda kolepa⸥ Eporayamo kinie, Eporayamo yuni yandopa yandopa kalopa lirimu yamboma kinie, enendo “Tembo.” nimbe, nimbe panjirimu mele tembando olio Pulu Yemo yunge kendemande Isirele yambo molemolo akuma yuni kondo kolopa lipe taponjimbe tepa molemo.” nirimu.