Luka 1:40-54

⁴⁰Maria egaꞌina eꞌagai ekoko Elisabeta epamegonia.

⁴¹Ke Elisabeta Maria ega pamego aꞌo elogonia aisama, gua alogai imoi isafa alo egama egopokae, ke Elisabeta Deo ega Spiritu alo epogu.

⁴²Ega aisama alo egama alogaina eifa akaikiꞌa einaka, “Papie maꞌoai epoꞌiai Deo ega gafegafe akaikiꞌa epeniio, ke imoi oi alopamauga auga isafa Deo ega gafegafe akaikiꞌa epeniia!

⁴³Kai kapa puo lau papie akaikiꞌau koa iꞌopoga lamia, eꞌu Lopia ina emai eisau?

⁴⁴Lau ega laifa oma, gome oi emu pamego aꞌo lalogonia mo aisama, fiakoa mo guau alogai imoi alo egama egopokae.

⁴⁵Oi Lopia ega iifa loafia auga lopakoꞌania Lopia agekapa paisa looma aumu, Deo eegai kapa feloꞌi loafiꞌi,” eoma.

⁴⁶Ega aisama Maria isafa alo egama alogaina puo eifa einaka: “Lau alou koꞌagai Deo laau afagaina.

⁴⁷Ke Deo kaniau isagamauga Auga eegai alou egama alogaina.

⁴⁸Gome lau Deo ega pinauga ikapa papieu, akaikiꞌau laaꞌi kai papie mainiu. Kai Deo lau eopolaniau ega gafegafe epeniiau. Ega kainai papiau pau keague auꞌi ke muni akemai auꞌi aoniamo akeifaniau, Deo ega gafegafe akaikiꞌa epeniiau papieu akeoma.

⁴⁹Gome Deo Isapu Akaikiꞌa Auga kapa maꞌoai agekapa agekaina auga, kapa akaikiꞌaꞌi lau faagauai ekapaiꞌi. Isa aka elolofa.

⁵⁰Ke kaisau Deo kemaniꞌiaina, ega iifa muninai kepea auꞌi guaꞌi eania. Ke pau keague auꞌi ke muni akemai auꞌi isafa eeꞌiai ega koa agekapa aoniamo.

⁵¹Isa ega isapu akaikiꞌa epapinauga, kapa akaikiꞌaꞌi ekapaꞌi, papiau kapaꞌi opoꞌiai keainaꞌau auꞌi euokaiꞌi.

⁵²Ke keainaꞌau auꞌi epoꞌiai, papiau keꞌimaꞌi lopiaꞌi auꞌi eꞌi lopia eafaniꞌi. Kai akeainaꞌau auꞌi, au akaikiꞌaꞌi epamiaꞌi.

⁵³Ke inaeꞌi ekimu keulalu auꞌi, amu feloꞌi epagafuniꞌi kai, paꞌamuꞌamu auꞌi imaꞌi maini epalaoꞌi.

⁵⁴Deo ufainagai lau apau Abraham, ke okogai kemai auꞌi eeꞌiai pakoꞌa niniꞌanina ekapaisa. Egaꞌina iifaga afaeꞌagege, aoniamo guaꞌi ageania. Ega koa iꞌopoga, Isa ega pinauga ikapa Israel papiauꞌi guaꞌi eaniia aeꞌagegeainiꞌi,” eoma.