13Ɩsɔ kɑ heelɑ Apǝlɑhɑm nɑ ɩ piyɑ sɩ kɑteŋɑ kɑnɛ kɑ tǝnɑ kɑɑ tɛ nɑ kɑ́ pǝsɩ pɑ nyǝm tǝkpɑtɑɑ. Ɩlɛ pǝ tɑɣɑ kʋsǝsɩɩtʋ tǝŋʋɣʋ tɔɔ kɛ́ pɑ heelɑ Apǝlɑhɑm kɛ mpʋ. Amɑ ɩ tɛmnɑ Ɩsɔ kɛ́ ɩ tɑɑ nɑ ɩ́lɛ́ ɩ́ mʋ-ɩ sɩ yʋlʋpɑŋ tɔɣɔ.
14Ye kɑteŋɑ ŋkɛ kɑɑ tɛ nɑ kɑ́ pǝsɩ kʋsǝsɩɩtʋ tǝŋlɑɑ tike nyǝŋkɑ, ɩlɛ tɑɑ tɛmnɑʋ kɛ Ɩsɔ ɩɩ wɑɑsǝɣɩ pʋlʋɣʋlɛ, nɑ mpi Ɩsɔ tɔŋ sɩ ɩ kɑ́ lɑ tɔ pǝlɛ pǝ mǝlɑ yem.
15Kʋsǝsɩɩtʋ yekinɑ nɑ Ɩsɔ pɑ́ɑ́nɑ́ kɔŋ, nɑ kʋsǝsɩɩtʋ wɛnnɑ nɑ tǝ pǝntʋɣʋ wɛɛ tɔtɔ.
16Mpi Ɩsɔ kɑ sɩɩwɑ sɩ ɩ kɑ́ lɑ tɔ, tɑɑ tɛmnɑʋ tɔɔ kɛ́, ɩlɛnɑ pǝ́ pǝsɩ pʋlʋ mpi Ɩsɔ hɑɑ fɑɑlɑɑ tɔ, pǝ tɑɑ wɛɛ kʋsǝsɩɩtʋ tǝŋlɑɑ tike nyǝm. Amɑ nɑ pɑ tǝnɑ mpɑ pɑ tɛŋ pɑ tɑɑ nɑ Ɩsɔ kɛ́ teitei ɩsɩɩ Apǝlɑhɑm lɑpʋ tɔ pɑ nyǝm tɔtɔɣɔ. Apǝlɑhɑm kɛ́ tɑ́ tǝnɑ tɑ́ cɑɑ kɛ́.
17Hɑlɩ pɑ ŋmɑɑwɑ ḿpʋ́ɣʋ́ Ɩsɔ Tɔm tɑɑ sɩ: Mɑ lɑpɑ nɑ ń pǝsɩ piitimnɑɑ pɑɣɑlɛ cɑɑ. Ɩsɔ wei Apǝlɑhɑm tɛmnɑ ɩ tɑɑ kɛ́ mpʋ tɔ, ɩ́lɛ́ ɩ ɩsɛntɑɑ Apǝlɑhɑm ɩnǝɣǝlɛ tɑ́ cɑɑ. Ɩsɔ ɩnɩ ɩ feesiɣinɑ sǝtɑɑ nɑ ɩ́ lɑkɩ nɑ mpi pǝ tɑɑ wɛɛ tɔ pǝ́ wɛɛ.
18Nɑ pɑɑ nɑ pɩɩ tɛɛ pǝ tɔɔ tɔ, Apǝlɑhɑm tɛmɑ-tɩ nɑ ɩ tɑɑ nɑ ɩ́ tɛɛlǝɣɩ. Pǝ tɔɔ kɛ́ ɩ pǝsɑ piitim pɑɣɑlɛ cɑɑ, ɩsɩɩ Ɩsɔ kɑ yɔɣɔtʋɣʋ tɔ sɩ: Nyɑ́ piyɑ nyʋɣʋ kɑ́ wɛɛ mpʋ.
19Pɑɑ nɑ ɩ pɩɩsɩ kɑ wʋsǝnɑ ɩsɩɩ nɩɩnʋwɑ (100) nɑ ɩ́ kpɑtǝlɑ tǝkuŋkuŋku, nɑ Sɑɑlɑ nɑ́ tɑɑ fɛɩ lʋlʋɣʋ tɔm tɑɑ tɔ, ɩ tɑ nyǝnnɑ tǝnɑ. Amɑ ɩ tisɑ ɩ yuŋ kɛ Ɩsɔ tɔɔ kɛ́ tɑm.
20Ɩ tɑɑ tɛm mpɩ pǝ tɑ pɑsɑ. Pǝyele ɩ tɑ lɑ sikɑ nɑ mpi Ɩsɔ tɔmɑ sɩ ɩ kɑ́ lɑ tɔ. Hɑlɩ ɩ nɑɑni sɔɔsɑ kʋsɔɔsʋ kɛ́, nɑ ɩ́ nyɔɔ toŋ, nɑ ɩ́ tɔŋnɑ Ɩsɔ kɛ́ sɑm.
21Ɩ kɑ tɛmɑ ɩ tɑɑ tǝkpɑtɑɑ sɩ Ɩsɔ pǝsǝɣɩ nɑ ɩ́ lɑ pǝ tǝnɑ mpi ɩ kɑ tɔmɑ sɩ ɩ kɑ́ lɑ tɔ.
22Mpi pǝ tɔɔ Ɩsɔ mʋ-ɩ sɩ ɩ kɛ́ yʋlʋ kʋpɑŋ kɛ ɩ tɑɑ tɛm tɔɔ tɔɣɔlɛ.
23Ɩlɛ pǝ tɑɣɑ ɩ nyʋɣʋ tɔɔ tike kɛ pɑ ŋmɑɑ mpʋ sɩ: Pɑ mʋ-ɩ sɩ ɩ kɛ́ yʋlʋ kʋpɑŋ.
24Amɑ nɑ tɑ́ mpɑ tɑ́ tɑɑ tɛmnɑ wei ɩ kʋsɑ Tɑcɑɑ Yesu kɛ sǝtɑɑ tɑɑ nɑ pɑɑ mʋ-tʋ sɩ kʋpɑmɑ kɛ mpʋ tɔtɔ tɔ, tɑ́ tɔɔ kɛ́ pɑ ŋmɑɑwɑ tɔtɔ.
Lom 4
Lom 4:13-24