ROMA 4:13-24

¹³Gwauhamata na Abraham e henia, ia garana ida tanobada idounai bae abia; taravatu dainai se henia, to ena abidadama amo e varava karamaoromaorodia daidiai e henia.

¹⁴Badina be taravatu ibadinana taudia na dihi ai bema halaodia, abidadama taudia edia abidadama bema asi anina, gwauhamata danu asi anina.

¹⁵Taravatu ese badu e havaraiamu; badina be taravatu bema lasi, itata-utuna danu bema lasi.

¹⁶Benaini, abidadama dainai e abiamu, harihari ḡauna na heto; dia taravatu ibadinana taudia mo, a Abraham ena abidadama e tohotohoamu taudia iboudiai danu. Ia na ita iboudai tamada;

¹⁷buka ai e torea heḡereḡerena eto, Bese loḡora tamadia ai baina halaomu. Mase taudia e hamauridiamu bona do asie vara ḡaudia e havaradiamu Diravana na Abraham ese e abidadama henia.

¹⁸Ena helaro na e kara asi badina na heto, to abidadama dainai e helarova; taunabunai ia na bese loḡora tamadia ai ela, gwauhamata herevana heḡereḡerena eto, Garamu na unu bae hoho toma.

¹⁹Ena abidadama na se manokava. Ena be tau-anina e haeroava mase tauna na heto (laḡanina na sinahu-ta sisivana) bona Sara danu mase hahinena na heto,

²⁰to Dirava ena gwauhamata e laloa taova, bona e abidadama henia tutuka-tutukava, bona e heatolaiava;

²¹badina be dibana ena gwauhamata baine hamomokania.

²²Una dainai maorona e gwauraia.

²³Dia ia mo sibona herevana unu se torea toma;

²⁴a ita danu, Iesu, eda Lohiabada, mase amo e hatorea isi Diravana ta abidadama heniamu tauda, maoroda e gwaurai.