ROMANOS 4:13-24

¹³Loꞌo juaꞌa̱ ngua chaꞌ ngüiñi chaꞌ jiꞌi̱ ycuiꞌ Ndyosi loꞌo jyoꞌo Abraham, loꞌo ñati̱ jiꞌi̱ Abraham nu ñaa chalyuu ca tiyaꞌ la; nacui̱ Ni chaꞌ tyucui ñaꞌa̱ chalyuu caca jiꞌi̱ nguꞌ biꞌ ca tiyaꞌ la. Pana bilya ta Ni chaꞌ loꞌo jyoꞌo Moisés nu ngua liꞌ, chaꞌ bilya cala nu Moisés biꞌ; biꞌ chaꞌ ná ndaquiyaꞌ jyoꞌo Abraham jiꞌi̱ cña nu ngulo Moisés, chaꞌ tya lyiji caja chaꞌ biꞌ jiꞌi̱ nguꞌ. Ngua tsoꞌo cresiya jiꞌi̱ nguꞌ biꞌ cuentya jiꞌi̱ ycuiꞌ Ndyosi xquiꞌya chaꞌ jlya tiꞌ nguꞌ jiꞌi̱ chaꞌ nu nchcuiꞌ Ni, biꞌ chaꞌ ngüiñi chaꞌ jiꞌi̱ Ni loꞌo nguꞌ.

¹⁴Ná ntiꞌ ycuiꞌ Ndyosi chaꞌ tsa lo cua ti nguꞌ caja chalyuu cucui jiꞌi̱ nguꞌ, nguꞌ nu taquiyaꞌ jiꞌi̱ lcaa chaꞌ nu nda jyoꞌo cusuꞌ loꞌo nguꞌ; tya ntiꞌ Ni chaꞌ xñi cua ñaꞌa̱ ca ñati̱ chaꞌ jiꞌi̱ Jesús, chaꞌ juaꞌa̱ ti taca quiñi chaꞌ jiꞌi̱ ycuiꞌ Ndyosi loꞌo nguꞌ liꞌ.

¹⁵Xcuiꞌ na xcubeꞌ ti Ni jiꞌna, nu loꞌo caca cuayáꞌ jiꞌna slo ycuiꞌ Ndyosi cuentya jiꞌi̱ chaꞌ cusuꞌ biꞌ; pana ná caja ñiꞌya̱ nu sta Ni quiꞌya jiꞌna si ná nscua sca chaꞌ nu ndacaꞌa jiꞌna juaꞌa̱.

¹⁶Ngüiñi chaꞌ jiꞌi̱ Ni loꞌo jyoꞌo Abraham loꞌo ngusñi ti yu chaꞌ jiꞌi̱ Ni, chaꞌ caca cuayáꞌ tiꞌ lcaa na chaꞌ xcuiꞌ chaꞌ tsoꞌo ntsuꞌu tyiquee Ni; biꞌ chaꞌ nda Ni chaꞌ biꞌ loꞌo na. Ndyanu chaꞌ biꞌ jiꞌi̱ lcaa ñati̱ jiꞌi̱ Abraham nu cala chalyuu ca nde loo la. Ni siꞌi tsa lo cua ti ñati̱ nu taquiyaꞌ jiꞌi̱ chaꞌ cusuꞌ ti laca nu tyanu chaꞌ tsoꞌo biꞌ jiꞌi̱, la cuiꞌ juaꞌa̱ tyanu chaꞌ biꞌ jiꞌi̱ lcaa ñati̱ tyaꞌa na nu xñi na chaꞌ jiꞌi̱ ycuiꞌ Ndyosi ñiꞌya̱ ngusñi ycuiꞌ Abraham chaꞌ jiꞌi̱ Ni; juaꞌa̱ ntiꞌ na loꞌo nacui̱ na chaꞌ sti lcaa na ngua jyoꞌo Abraham biꞌ cuentya jiꞌi̱ ycuiꞌ Ndyosi.

¹⁷Ndiꞌya̱ nchcuiꞌ chaꞌ nu nda Ni loꞌo Abraham, nu nscua lo quityi: “Cua nda naꞌ chacuayáꞌ chaꞌ caca nuꞌu̱ sti tyu̱u̱ lo tyaꞌa ñati̱ nu catu̱ chalyuu nde loo la”, nacui̱ Ni jiꞌi̱ Abraham. Cua ngüiñi chaꞌ jiꞌi̱ ycuiꞌ Ndyosi loꞌo jyoꞌo Abraham saꞌni, chaꞌ ngusñi yu chaꞌ nu cua nchcuiꞌ ycuiꞌ Ndyosi loꞌo yu, la cuiꞌ Ni nu ndyuꞌni chaꞌ tyuꞌú jyoꞌo chaca quiyaꞌ. Loꞌo juaꞌa̱ ngulo Ni cña chaꞌ tyuꞌu tucua lcaa chaꞌ nde loo la, chaꞌ nu cua nacui̱ Ni jiꞌi̱ yu loꞌo nchcuiꞌ Ni ñiꞌya̱ si cua laca ndiꞌi̱ chaꞌ biꞌ jiꞌi̱ yu nu ngua liꞌ.

¹⁸Masi ngua tiꞌ jyoꞌo Abraham chaꞌ ná caja sñiꞌ, ná ndube tiꞌ yu; jlya tiꞌ yu jiꞌi̱ ycuiꞌ Ndyosi, ntajatya yu ni jacuaꞌ caja sñiꞌ yu. Biꞌ chaꞌ ngua jyoꞌo Abraham sti tyu̱u̱ tyaꞌa ñati̱ nu ndyatu̱ lo yuu ca nde loo la, ñiꞌya̱ nu cua nchcuiꞌ Ni loꞌo yu: “Quiñaꞌa̱ tsa ñati̱ tyuꞌu jinuꞌu̱ tyempo nde loo la”, nacui̱ Ni jiꞌi̱ yu.

¹⁹Ná ngujlyaa tiꞌ Abraham chaꞌ biꞌ; ñaꞌa̱ ti jlya tiꞌ yu chaꞌ nu cua nda ycuiꞌ Ndyosi loꞌo yu, masi ndube tiꞌ yu chaꞌ ngusuꞌ tsa yu, chaꞌ cua tyalaa ti sca siyento yija̱ ntsuꞌu yu. Jlo tiꞌ yu chaꞌ cua ngulala ti cajaa tyucuaa nguꞌ, loꞌo ycuiꞌ, loꞌo maꞌ Sara clyoꞌo yu; ngaꞌaa ntsuꞌu tyempo chaꞌ caja sñiꞌ Sara, ngua tiꞌ yu.

²⁰Pana ná ngutaꞌa̱chu̱ꞌ yu, ná ngujlyaa tiꞌ yu chaꞌ nu cua nchcuiꞌ Ni loꞌo yu; jlya tsoꞌo tiꞌ yu chaꞌ biꞌ. Nguaꞌni tlyu yu jiꞌi̱ ycuiꞌ Ndyosi,

²¹chaꞌ jlo tiꞌ yu chaꞌ taca jiꞌi̱ Ni cuaꞌni lyiji Ni jiꞌi̱ chaꞌ nu ngüiñi jiꞌi̱ Ni loꞌo yu.

²²Biꞌ chaꞌ nda Ni chacuayáꞌ chaꞌ caca tsoꞌo cresiya jiꞌi̱ yu, xquiꞌya chaꞌ jlya tsa tiꞌ yu jiꞌi̱ Ni.

²³Juaꞌa̱ nscua lcaa chaꞌ biꞌ lo quityi nu nchcuiꞌ chaꞌ ngüiñi chaꞌ jiꞌi̱ Ni loꞌo nu Abraham biꞌ, chaꞌ ngua tsoꞌo cresiya jiꞌi̱ yu loꞌo ngusñi ti yu chaꞌ jiꞌi̱ ycuiꞌ Ni. Siꞌi cuentya jiꞌi̱ jyoꞌo Abraham ti nscua chaꞌ biꞌ,

²⁴masi loꞌo cuentya jiꞌna nscua chaꞌ caca juaꞌa̱; loꞌo jiꞌna cua nchcuiꞌ ycuiꞌ Ndyosi chaꞌ caca tsoꞌo cresiya jiꞌna cuentya jiꞌi̱ ycuiꞌ Ni si xñi na chaꞌ jiꞌi̱ Ni, la cuiꞌ Ni nu nguaꞌni chaꞌ ndyuꞌú Jesús nu Xuꞌna na chaca quiyaꞌ loꞌo ngujuii yu.