Leemiso Maxaafaa 5:1-19

¹Ta na7au, ta aadhdhida eratettaa ezgga; ne haittaa ta akeekaakko yegga.

²Yaatikko, adussa qofai neessi de7ana; ne haasayaikka ne eratettaa qonccissana.

³SHaaramuxa maccaasee inxxarssaappe eessaa ililoi xokkees; i haasayai zaitiyaappekka aadhdhi looxigees.

⁴SHin a wurssettan - godare uttaadan cammausu; naa77u baggan qanxxiya mashshadan qara;

⁵i tohoti haiquwaakko duge boosona; i hemetai sitti oottidi, duufuwau efees.

⁶A de7uwaa ogiyaa qoppukku; i ogeti geella; shin geella gidiyoogaakka a erukku.

⁷Ta na7au, ha77ikka taani odiyoogaa siya; taani giyoogaappe kiyoppa.

⁸SHaaramuxa maccaasee heeri booppa; i keettaa penggiyaakko shiiqoppa.

⁹Hegee xayikko, neeni ne bonchchuwaa haratuyyo aattada immana. Neeni ne yelagatettan meqetti bainna asatu kushiyan haiqqana.

¹⁰Ne aquwaa allaga asati ekkana. Ne daafurada shiishshidobai haraassa gidana.

¹¹Wurssettan ne ashoinne ne asatettai gilqqin, neeni oolana.

¹²Qassi hagaadan yaagana; “Taani timirttiyaa aissi ixxidanaashsha! Ta wozanaikka seeraa aissi karideeshsha!

¹³Taani tana tamaarissiyaageeti odidobaa ekkabeikke; tana zoriyaageetu zoriyaakka ezggabeikke.

¹⁴Hegaa gishshau, taani deree shiiqido yaa7an, akeekennan kauyyanau de7ais” yaagana.

¹⁵Neeni ne pulttuwaappe haattaa uya; ne keettaayee xalaalaa siiqa.

¹⁶Ne pulttuwaa dabaaban, ne ollaa haattaakka dembban aissi gussai?

¹⁷Eta neeni ne xalaalau buzotta; hara allaga uraara koxxoppa.

¹⁸Ne pulttoi neeyyo anjjetto; yelagatettan neeni ekkido ne maccaaseera ufaitta.

¹⁹Lo77iya gaareedaaninne ufaissiya genesseedan, i xanttai ubba wodekka nena alo; ubbatoo i siiqoi nena omooddo.