Joshua 5

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Urngin e pilung rok e pi Amorite ni yad bay ko ngal ko lul’ ni Jordan nge urngin e pilung rok yu Kana’an ni yad bay u to’oben fa gi day ni Mediterranean fithingan e rrung’aged nike chuweg SOMOL e ran u lan e lul’ ni Jordan ko ngiyal’ ni ba’aram ni yib piyu Israel ra th’abed nga baraba’. Me yib e marus ngorad nge mulan’rad ni bochan piyu Israel.

²Me ga’ar SOMOL ngak Joshua, “Mfek e malang nib el ngam ngongliy boch e yar riy ngam maad’adnag piyu Israel ko yay ni l’agruw.”

³Me ngongliy Joshua fa yungi yar nge maad’ad nagrad ko fare burey ni kan tunguy e Burey ko Maad’ad ngay.

⁴I rin’ e ren’em ni bochan e urngin e pumo’on ni kar ilalgad ni yad ra bung ko mael ko ngiyal’ ni rchuwgad u Egypt e karm’ad u kanawo’ u daken e ted ko ngiyal’ ni yad be milekag.

⁵Yugu aram rogon ni urngin e pumo’on ni chuw u Egypt e kan maad’ad nagrad ni bod ni yog e motochiyel rok Moses, ma pi’in nni gargelegrad ko ngiyal’ ni ba’aram nni milekag u daken fa gi ted ngan th’ab nga baraba’ e dariy bagayad ni kan maad’adnag.

⁶Ya girdi’ nu Israel e uranod u daken e gi ted nem ni aningeg i ragag e duw. Nap’an ni taw ko ngiyal’nem ma urngin e pumo’on nike taw nga yangarrad ni ngar uned ko mael nra chuwgad u Egypt e karm’ad ya dar folgad ko tin ni yog SOMOL. Ya yog ngorad ndabi pagrad ngar guyed fare nam ni bfel’ rogon ma ba yong’ol e but’ riy ni fa’ani micheg ngak pi chitamangirad nra pi’ ngorad.

⁷Machane pifakrad ni pumo’on ni yib nga luwrad e da ni maad’ad nagrad ko ngiyal’ ni ba’aram ni yad be milekag u daken e ted. Re mfen nem nib be’ech e Joshua e maad’ad nagrad.

⁸Nap’an nni mu’ i maad’ad nagrad, me par piyu Israel ni yad gubin ko gin kar n’ufed e pi tent rorad riy nge mada’ ko ngiyal’ nike fos e maad’ad rorad.

⁹Me ga’ar SOMOL ngak Joshua, “Daba’ e kug chuweg romed e tamra’ ko sib ni mu ted u Egypt.” Ara’ fan ntunguy fithingan e gin’em ni Gilgal, ni ka bod rogon ni yibe pining fithingan e bin daba’ e rran.

¹⁰Nap’an nike par piyu Israel u Gilgal u daken fa gi tafelfel’ nib chugur nga Jeriko, miyad madnomnag e madnom ko Paluk’af ko re nep’ i n’en ni ragag nge aningeg fen e pul.

¹¹Ma reb e rran riy, ma aram e som’on nra ked e ggan nni yung u Kanaan ni grain ni kan urfiy nge flowa nni lith dariy is riy.

¹²Tomuren e binem me tal e manna ndaki mul u lang nga but’, ma aram e daki kay piyu Israel e re manna nem. Re duw i n’em e ra tababgad i kay e ggan nni yung u Kanaan.

¹³Nap’an ni chugur Joshua nga Jeriko, ma yigi da’da’ nike guy be’ ni pumo’on nib sak’iy nga m’on rok, ni bay ba saydon u pa’. Me yan Joshua ngak nge fith ni ga’ar, “Gur reb e salthaw romad ara gur e to’ogor romad?”

¹⁴Me fulweg fare mo’on ni ga’ar, “Dariy baraba’ ni gu ba’ riy, gu bay u roy ni gag e gireng ko ba’rok SOMOL e salthaw.” Me paraw Joshua nga but’ nike tayfan, me ga’ar, “I gag e tapigpig rom. Mang e ga ba’adag ni nggu rin’?”

¹⁵Me ga’ar fare mo’on ngak ni ir e gireng ko ba’rok SOMOL e salthaw, “Mu lul e sus rom; ya gab sak’iy u daken e but’ nib thothup.” Me rin’ Joshua ni bod rogon nike yog ngak.