Jon 11:5-16

⁵Jisasgo te Marta dali, aga ama dali, Lasarus dali augwali Jisasgo godolo mu yai goli,

⁶agai te Lasarus gasi ebo po odama digi, tama Jisas aga polo pisąbadi, si sogo te bidibo bulude ma bidai.

⁷Nosali si sogo silama, Jisas aga wali pabo bidi dabebolo te po wai, “Da Judia tǫba ma pebelainao,” wai.

⁸Aga wali asobo bage augwali noma selama, tama te po wai, “Po ola mabo bidi, polobadu gana Juda bagego nage masigi sąnama elai hagede te homu yai. Nage teba ma pelamuo,” te po wai.

⁹Jisasgo te Godigo bodolu mani sogo naga te aga isaibao po augwalibolo ola momainogo agai po nogo habu sugunama te po wali, “Te giliga nanobadi yaide, te ula elalubao. Tama siade bilibo bidi tulamubo menio. Magi basowe? Te ulade dao, agai aga pabo tų bugagia suagameo.

¹⁰Tiali ma, bidi hulide bilibo bidi, aga tulamubo dao. Magi basowe? Ula menio, te aga te pabo tų hulia sai elalubo,” Jisasgo te po wai.

¹¹Jisasgo te po ma wadolama, te po wai, “Dago abagi Lasarus godege pibao. Tialima, eno aga hodoligi paibao,” Jisasgo te po aga wali pabo bidi dabe dali wai.

¹²Augwaligo te po wai, “Genuai Bidi, aga piyu da, te aga usu ma yaibao.”

¹³Jisasgo wali po “Lasarus godege pibao,” te po page aga isai dao wali. Tialima, geda muyu, augwaligo homugo aga olo godege piali, te homu yai.

¹⁴Tama tibaso, Jisasgo augwalibolo hanilama, te po wai, “Lasarus mu isalio,” te po wai.

¹⁵“Aga isali sogode ena aga dali bidibeo. Dage tobade ena agaba pabeo. Magi basowe? Nosali dagego enaba duga homu mumainogo ena tama tiwai. Te sę ebode eno dwagi yai homu ebao. Megi da aga bidibo digi pinao,” Jisasgo te po wai.

¹⁶Tomas, augwaligo aga nogi me Didimus wabo, te nogi page aga ama name dali deli sogo ame nai bidi, te bidi te Jisas wali pabo bidi me deli dao. Agai te Jisas wali pabo bidi mebabolo te po wai, “Da aga dali pinao, da me aga dali isimainogo pinao,” Tomasgo te po wai.