San Juan 11:5-16

⁵Yepe osaɨsú iteanga Marta icupɨhɨr reseve iyavei iquɨvrɨ Lázaro viña,

⁶oyanduse rumo Lázaro mbaherasɨsa, opɨta vɨteño ité ñuvɨrío arɨ güecosave.

⁷Ipare omombehu ore supi oroico vahe upe: —Yayevɨ iri ɨvɨ Judea rupi —ehi.

⁸Ore rumo aipo orohe chupe: —Ore mbohesar, cuesemi tẽi acoi judío rerecuareta ahe pendar nde yuca pota ita pɨpe yuvɨreco; ¿cũritei co ereso pota iri aheve? —orohe chupe.

⁹Oreu rumo aipo ehi: —Ñepei arɨ niha vɨreco doce hora. Supi eté acoi oguata vahe arɨ pɨpe ndoyepɨapi eté. Esepia, osepia ité co ɨvɨ resapesa;

¹⁰acoi oguata vahe rumo pɨ̃tu pɨpe, oyepɨapi eté. Esepia, ipane tesapesa chupe —ehi oreu.

¹¹Ipare aipo ehi: —Yande mborɨpar Lázaro oque tẽi. Che rumo amomahera —ehi.

¹²Evocoiyase ore aipo orohe chupe: —Ore Yar, oque tẽise, ocuerara —orohe.

¹³‘Omano ité’ oyapave tẽi aipo ehi. Ore rumo orepɨhañemoñeta: “Oque tẽi revo” orohe chupe viña.

¹⁴Ipare rumo omombehu tuprɨ ité aipo ehi oreu: —Lázaro omano ité.

¹⁵Avɨharete che ndaicoise aheve. Esepia, ẽgüe ehise ité avɨye catura pẽu pe che reroya ãgua. Yaso ru catu sepia —ehi oreu.

¹⁶Evocoiyase Tomás, Gemelo serosa vahe, aipo ehi ore imboetasa oroico vahe upe: —Yaso avei ru yande yamano vaherã supi —ehi.