ẔWA 11:5-16

⁵Jesusen' nži'ile' Martan', na' no'le bile Martan', na' Lásaron'.

⁶Ḻa'kze Jesusen' nži'ile' ḻégake', kate' benle' de' Lásaron' yižwé', bga'ne' gan zoe' yechóp ža ka'.

⁷Wdé chope ža ka', Jesusen' gože' benne' wsedle chie' ka', na' wnné': —Le cho'o da' yoble gan nbab Judea.

⁸Naž benne' wsedle chie' ka' belyi'e Ḻe', na' wnnágake': —Benne' Wsedle, gónegekle benne' judío wnná bia' ka' wžé'egake' Le' yej. ¿Chejo' da' yoble ga na'?

⁹Bechebe Jesusen', na' gože' ḻégake': —Zej de chežinno hora te ža. No benne' ẕde' te ža, bi chejchegwe', dan' ẕḻe'ele', dan' baní' da' zoan yežlyó nga zóaḻenen ḻe'.

¹⁰Cha' bennen' ẕde' žel, na' chejchegwe', dan' bi zoaḻen banín' ḻe'.

¹¹Kate' Jesusen' beyóž bchaḻje' da' ni, naž gože' ḻégake': —Ẕtas Lásaro, benne' lježžon', na' cha'a neda' ga na' nich yesbana'-ne'.

¹²Naž benne' wsedle chie' ka' belyi'e Ḻe', na' wnnágake': —X̱an, cha' ẕtase', yeyake'.

¹³Jesusen' wnné' ki dan' ba got Lásaron', san ḻégake' žékgekle' wnné': “Ẕtasze Lásaron'.”

¹⁴Naž Jesusen' gože' ḻégake' kwáselo, na' wnné': —Ba got Lásaron'.

¹⁵Žebela' dan' bi wzóa' ga na', dan' gak na'a to da' gon chawen' ḻe'e, dan' gonen ga chejḻe'le chia'. Le cho'o na'a gan de Lásaron'.

¹⁶Naž Mas, to benne' žónḻene' Jesusen' tẕen, bennen' ḻezka' lie' Benne' Kwach, gože' yezika' benne' wsedle chie' ka', na' wnné': —Le cho'o, gátḻenžo Ḻe' tẕen.