ᤕᤢᤜᤢᤴᤏᤠ 11:5-16

⁵ᤕᤧᤛᤢᤖᤧ ᤔᤠᤷᤌᤠ. ᤂᤧᤸᤗᤧ ᤁᤢᤴᤛᤠ᤹ ᤔᤖᤡᤕᤔ ᤏᤢ ᤗᤠᤈᤖᤛ ᤗᤢᤱᤔᤠ᤹ ᤋᤢᤰᤋᤢᤛᤡᤀᤠᤱ ᤘᤕᤧᤛᤠᤱ

⁶ᤗᤠᤈᤖᤛᤧᤴ ᤋᤢᤰᤁᤠᤱ ᤏᤧ ᤁᤧᤗ᤹ᤒᤠ ᤀᤡᤱᤄᤱᤅᤡᤴ ᤂᤧᤵᤛᤢᤀᤠᤱᤛᤠᤱ ᤂᤢᤏᤧ᤹ ᤏᤡᤕᤧᤴ ᤌᤠᤖᤡᤰ ᤘᤕᤧᤒᤠ ᤋᤧᤴᤏᤥᤀᤣ ᤕᤠ᤺ᤰᤋᤧᤖᤥ॥

⁷ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤀᤠᤸᤗ ᤀᤠᤏᤡ᤹ ᤕᤠᤶᤔᤥ ᤕᤜᤢᤍᤡᤕᤠ ᤌᤢᤶᤔᤥ ᤏᤢ᤺ᤰᤂᤡ ᤐᤡᤃᤡᤖᤥ॥”

⁸ᤁᤖ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤛᤡᤰᤛᤠᤶᤒᤣ. ᤂᤧᤳᤌᤥᤃ ᤕᤜᤢᤍᤡᤜᤠ᤹ᤖᤧ ᤁᤢᤓᤠ ᤕᤧᤴ ᤋᤃᤡ ᤗᤢᤱᤅᤡᤸᤗᤧ ᤗᤧᤵᤔᤠ ᤛᤧᤵᤔᤠ ᤁᤧᤶᤃᤥ᤺ᤳᤋᤧᤀᤠᤱ ᤘᤕᤧ. ᤜᤧᤰᤁᤣᤛᤠᤱ ᤂᤧᤏᤧ᤹ ᤕᤠᤶᤔᤥ ᤂᤧᤳᤌᤥᤀᤣ ᤐᤣ᤺ᤰᤔᤠ ᤏᤡᤱᤘᤠ᤹ ᤁᤧᤈᤥᤃᤢᤒᤡ᥅”

⁹ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤌᤡᤰ ᤗᤧᤴᤍᤡᤰᤁᤥ ᤁᤢᤔᤢᤰ ᤌᤡᤰ-ᤏᤧᤳ (᥇᥈) ᤔᤧᤒᤥ᤺ᤱᤏᤧᤴᤒᤡ᥅ ᤀᤠᤳᤋᤡᤴ ᤔᤏᤠ᤺ᤴ ᤗᤧᤴᤍᤡᤰ ᤗᤠᤱᤄᤣ᤺ᤰ ᤂᤧᤸᤗᤧ ᤁᤢᤗᤠᤱᤅᤡᤴ ᤔᤧᤍᤥ᤺ᤰᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤂᤠᤀᤥ᤺ᤵᤔᤠᤀᤥ ᤔᤡᤰ ᤏᤡ᤺ᤖᤥ॥

¹⁰ᤁᤖ ᤀᤠᤳᤋᤡᤴ ᤔᤏᤠ᤺ᤴ ᤛᤧᤴᤍᤡᤰ ᤗᤠᤱᤄᤣ᤺ᤰ ᤂᤧᤸᤗᤧ ᤁᤢᤗᤠᤱ ᤋᤥ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤂᤠᤍᤠᤶᤔᤥ ᤂᤧᤸᤗᤧ ᤌᤥ᤹ᤛᤡᤱᤔᤠ ᤀᤥ᤺ᤳᤋᤡ᤺ᤴ ᤔᤧᤃᤳᤋᤢᤴᤗᤥ॥”

¹¹ᤀᤰᤂᤣ ᤐᤠ᤺ᤳᤋᤢ ᤛᤢᤖᤢᤀᤠᤱ ᤕᤧᤛᤢᤖᤧ ᤕᤠᤶᤔᤥ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤏᤡ᤹ ᤆᤢᤶ ᤗᤠᤈᤖᤛᤧᤴ ᤔᤢᤖᤢᤰ ᤂᤢᤖᤢᤰ ᤀᤡᤵᤛᤧᤀᤠᤱ ᤏᤧᤖᤥ. ᤁᤖ ᤂᤢᤏᤧ᤹ ᤁᤢᤓᤥ᤺ᤱᤛᤧ ᤐᤣ᤺ᤰᤁᤠᤖᤥ॥”

¹²ᤜᤧᤰᤁᤣ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤂᤢᤏᤧ᤹ ᤀᤡᤵᤛᤧᤀᤠᤱᤗᤰ ᤏᤧᤏᤧ ᤑᤠ᤹ᤃᤪ ᤐᤥ᤺ᤰᤗᤥ॥”

¹³ᤕᤧᤛᤢᤖᤧ ᤂᤧᤱᤜᤠ᤹ ᤗᤠᤈᤖᤛᤖᤧ ᤁᤢᤛᤡ᤺ᤔᤧᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤧᤳᤋᤢᤛᤡᤀᤠᤱ ᤘᤕᤧ. ᤁᤖ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤗᤠᤈᤖᤛᤧᤴ ᤀᤡᤵᤛᤧᤀᤠᤱᤗᤰ ᤏᤧ᤹᤺ ᤗ᤹ᤖᤡᤰ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤖᤥ॥

¹⁴ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤁᤢᤍᤥ᤺ᤵᤔᤠᤀᤣ ᤔᤧᤳᤋᤢᤛᤡ. “ᤗᤠᤈᤖᤛᤧᤱᤃ ᤛᤩᤧᤖᤥ.

¹⁵ᤁᤖ ᤀᤠᤸᤗᤛᤠᤱ ᤂᤡᤏᤡ᤹ ᤕᤖᤡᤰ ᤕᤠᤵᤔᤡ ᤏᤛᤠ᤺ᤴ ᤀᤠᤃᤧᤈᤥᤃᤡᤖ ᤑᤠ᤹ᤀᤠᤱ ᤀᤡᤱᤃᤠ᤹ ᤂᤧᤳᤏᤠ ᤜᤥ᤺ᤵᤋᤠᤱᤒᤠᤴᤏᤣ ᤂᤡᤏᤡ᤹ ᤗᤠᤃᤡ ᤏᤢ᤺ᤒᤠ ᤐᤥ᤺ᤰᤂᤧᤖᤥ॥ ᤀᤠᤸᤗ ᤂᤢᤏᤧ᤹ ᤁᤢᤛᤠ᤹ᤛᤧ ᤐᤣᤃᤡᤖᤥ॥”

¹⁶ᤜᤧᤰᤁᤩᤠᤱ ᤍᤡᤍᤡᤔᤛ ᤔᤧᤵᤔᤏᤠᤒᤠ ᤌᤥᤔᤠ᤺ᤸᤗᤧ ᤘᤣ᤹ ᤁᤢᤴᤈᤢᤶ ᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤀᤠᤏᤡ᤹ᤀᤠᤱ ᤍᤠᤱᤒᤠᤴᤏᤢᤀᤣ ᤐᤣᤃᤡᤀᤠᤱ ᤂᤢᤏᤧ᤹ᤏᤢᤀᤣ ᤛᤩᤧ᤹ᤀᤡᤖᤥ॥”