Juan 11:5-16

⁵Si Jesus et laylaydena san tolo ay sin-agi

⁶ngem issan nangdengngana ay mensaksakit si Lazaro dat mentee kayet issan kad-ana is doway agew

⁷danat kanan isnan papasolotna, “Somagong tako id Judea.”

⁸Dadat kanan, “Apo, egay nabayag din manggayangan koma nan Judio ken sik-a dakat aped kasin somagong isdi?”

⁹Ngem dat kanan Jesus, “Olay, tay simpoo ya dowa ay olas nan sin-agew isonga wada pay nan waya tako ay mang-ikkan isnan ikkan tako. Kanegna nan mendad-aanan nan ipogaw isnan kag-aw et adi maisagaw tay menpat-a

¹⁰ngem no mendad-aan isnan labi et maisagaw tay menbolinget.”

¹¹Dat itoloy Jesus ay mangwani, “Nan gayyem tako ay si Lazaro et naseyep ngem omeyak ay manggido.”

¹²Dat kanan nan papasolotna, “Apo, gawis no naseyep tay awnit gomawis.”

¹³Kananda en waay tet-ewa ay naseseyep si Lazaro ngem nan kayat Jesus ay kanan et natey et

¹⁴isonga danat kanan, “Natey si Lazaro

¹⁵ngem men-gasingak tay maiwedak isnan kad-ana isnan nateyana tasiyay pomigsa nan pammatiyo no ilaenyo nan ikkak. Entako bawet ilaen siya.”

¹⁶Si Tomas ay makwani en Ipi et kinwanina isnan iib-ana ay pasolot en, “Makkey tako ken Jesus id Judea ta olay no maitapi tako ken siya ay matey.”