Juan 11:5-16

⁵Iyuhuedatu Jesúsra Marta, María, Lázaro jadya bacuare.

⁶Arepa tuna iyuhueda baya ama bucha, Lázaro ujejeda dyaquene cuita jadya bacaya ama buchatu yume cuau ama jucuare. Aninucacuaretu tuhua beta huecaca.

⁷Jadya juatsu ecuana Jesúsra acuare: —Necuanucara iyacua Judeaju, —jadya tura ecuana acuare.

⁸—Ecuana Bahuityaquique, amena ishu mique Jerusalénju jutihuaju taa mi israelita cuanaja huaraji cuanara tumu tsehue iyecara achine. ¿Tumemi eje bucha juatsu tuhua cuacara junucaya? —jadya tuque ecuana acuare.

⁹—Cuayadya ique. Ijetira ecuana peadya tunca beta earacana ura udaya dutya huecaca. Ejeque huecadaju ajeyaquetu chicaya ama, tura riyaque yahua juque hueca eque petaya tibu.

¹⁰Ejeque meta ajeyaquetu echicau, tuja hueca ama tibu, —jadya ecuana Jesúsra acuare. (Jadiquetu Jesúsra quisarati jadya acuare. Tuquepa eje bucha iyetae juma Yusura huecaca iyahuaque juetimaju.)

¹¹Yara tupu juatsu tura ecuana cuejanucacuare: —Ecuanaja iyuhuedaque Lazarotu tahuiya. Pacabatishati era, —jadya tura ecuana acuare.

¹²—Tahuiyaque juatsutu mejemeje juya, Ecuana Cuatsashaquique, —jadya tuque ecuana acuare.

¹³Jadya quisarati ayaquetu Jesúsra “Lazarotu majuchine” jadique jadya acuare. Ecuanaratu cuji cuita juatsu “Lázaro tahuiya” cuana bucha jutidya bacuare.

¹⁴Tume ecuana Jesúsra pana cueja acuare ecuana bahue ishu: —Lazarotu amena majuchine.

¹⁵Cuachine ama ique tuque ujedaque bahue juya tsehuedya. Iyacua micuana ecue casa bamereya, micuana eaqueja nimee juishu. Micuana ni eaqueja nimee camadya juya, tume ique dyaque pureama juya. Ita iyaja cuita emajuque nebatira, —jadya tura ecuana acuare.

¹⁶—Ecuana dyadi tuatsehue necuaradya. Tuatsehue iyepee tuna neara, —jadya ecuana Tomásra acuare, pere cuinanacuarera.