SAN JUAN 11:5-16

⁵Jesús quinnequic Marta huan icni sihual huan Lázaro.

⁶Ma yoje, pa in tonali hual quicaquic pampa Lázaro cataya cocoxqui, mocahuaya ome tonalijmes nepa capa cataya.

⁷Cuaquinon, quiman panuje innojen tonalijmes, quinmilic imonextilinijmes: —Ma tiacan oc sejpa pa Judea.

⁸Quilije imonextilinijmes: —Lamaxtini, in huejueyenten judíos san huipla quinequiloaya mitzmictilo ca tixcalazos. ¿Leca tías ca ompic oc sejpa?

⁹Jesús quinnanquilic: —Cate doce lajlajco pa se semilhuil, ¿amo yoje? Huan jan yoje Dios quilalic quichi lachihualisli monequi pa nicchías pa se semilhuil. Amo nejtzacuilis nindeno pa camo nicchías mochi hual Dios nechilic pa nicchías. Sinda se nejnemi pa semilhuil, amo motecuas icxían ca se tixcali, pampa lachía pan ipampa in lahuilisli hual quilahuía mochi in lalticpan.

¹⁰Huan sinda se nejnemi pa layúa, yoje yahui momañajtía, pampa amo unca lahuilisli pa yihual lachías. Huan sinda unca laticumac laijtic iyolo se, momañajtis pampa ilahuilisli Dios amo quinextilis Dios iojli.

¹¹Lamic quijtuc inon, yihual quinmilic: —Tocni Lázaro cochic axan. Huan nehual nía pa niquejxiltis.

¹²Cuaquín imonextilinijmes quilije: —Tata, sinda coxtica, cuaquín pajtis.

¹³Jesús quinequiaya quijtu pampa miquic Lázaro. Huan quijtuje imonextilinijmes pampa yihual quinlaquetziliaya quinami cochiaya.

¹⁴Pampín, quinmilic Jesús ca lajtol calica amo moixpolulosquiaya: —Lázaro miquic.

¹⁵Huan unca paquilisli pa noyolo pampa amo nicataya nepa, pampa yoje cataya cuali pa amhuanten. Pampa inon, anyahui anquilalía míac laneltocalisli ca nehual. Ma yoje, ma tiacan capa yihual.

¹⁶Cuaquinon Tomás hual noje itocaya Seinomenten quinmilic in oc sequin monextilinijmes, quinmilic: —Ma tiacan noje ca yihual, pa yoje timiquisi ca yihual.