1Udu hamon ta aliy badeh Kindrei none Abraham. Eme iy tiye i tan, “Abraham!” Eme Abraham anya eh, “Jo kada-ah.”
2Ano Kindrei tiye, “Ou andrei Aisik, nadum ala adem handru in tan kede-eh badeh ou ala loboho Moreya. Jo kameh leheya mandrei kameh i tam ma ou asun iy ki nyara salom.”
3Eme Abraham amak na ma ndraben, abedei ndro-o jih ano andrei i ta asun salom eme iy atehei i bwele-e katin haka donki ma andrei Aisik hawe uru lau ta lahou tan la-uh. Eme oro adek ala kon Kindrei ndratiye tan.
4Len la-uh ano ya i bada len taloh badeh Abraham atou kon nane udu len.
5Eme badeh iy tiye i turu lau ta lahou tan, “Ah kado dah ma donki kado jo hawe Aisik badeh aru kala kodo-oh. Aru kameh ala atudun ano badeh aru barame hamon hawe ah ja.”
6Ano Abraham andrei ndro-o jih ta asun atehei i kase nadun Aisik eme iy andrei jih ma samen. Eme uru adek se ala badeh,
7Aisik ndremenya taman Abraham, “Tama?” Eme Abraham anya, “Abo naduk sasah?” “Ndro-o jih hawe jih kada-an ai, ya sipsip ta asun ta salom ndrahe bah?”
8Eme Abraham anya eh, “Naduk, Kindrei le baradeu sipsip kasen barame ta asun ta salom.” Eme uru ma la-uh adek ala.
9Eme uru ala asos kon mene Kindrei tiye tan badeh, iy eme tukumwi bek i loken ta asun. Ano badeh iy kuhi ndro-o jih i bwele-en. Ano badeh i sawei nadun Aisik badeh atehei iy i bwele-e ndro-o jih udu bada bek dah.
10Eme iy andrei samen anya kamundroh le iy badeh,
11Angelo ta Laban aloh udu kandrah eme anya, “Abraham! Abraham!” Eme Abraham anya, “Jo kada-ah.”
12“Ou sadai iy ma ou samwekes sasah sala tan, jo badeh tanan, ou badeh anoh Kindrei labai, eme ou basolo-ei nadum bwe.”
13Eme Abraham madan eme loken badeh iy anyolom katin haka rem badeh andra batun badeh malou sakabwitiniy iy. Eme iy ruwani Aisik, iy ili badeh tawi rem dah eme, akohok kon ta Aisik ta salom.
14Eme Abraham tondrohani nyara kon nane doh badeh, “Kindrei Kameh Atehei.” Eme ma taku len dah aloh, “Mandrei doh badeh Laban Kameh Atehei.”
15Ano badeh Angelo ta Laban udu kandrah aloh ja i ta Abraham ma tiye, “Ou badeh banoh ta adeu nadum ou aseken labai bwe, jo tandrakan handru jo kameh amwekes lundriyem oro kameh nyaran bwe, oro kameh a solo-a ndrau badu loken ma solo-a on badu babi. Lundriyem oro kameh akohok lakou mari tiri lau ta ndra-i i tam udu kon tinan tiri.
18Ya nyosowan ta lundriye nadum oro kameh ili la-u kon munyak mari, tasah na ou anuhun sahou tek.”
19Ano badeh Abraham uru au ala hawe uru lau ta lahou tan nane ma oro au ala Bersiba. Eme Abraham udu Bersiba udu le.
20Ano udu len hamon badeh Abraham anuhun nadu tinen Nahor udun Milkah badeh atehei nadun ma ndru la-uh:
21Kadok badeh Us ano Bus ano badeh Kemu-el tama Aram,
22Keset, Haso, Pildas, Jidlap ma Betu-el, tama Rebeka.
23Milkah badeh atehei nah ndru la-uh nane doh.
24Udu Nahor badih ta mada san nyaran Reumah badeh atehei Tebah, Gaham, Tahas hawe Ma-akah.
