1Jaha la-uh ano badeh, kabin badu Ijip badeh ameh. Iy ameh badeh, iy ameh iy badeh ales udu gwa Na-el.
2Eme badeh iy anyolom oro bulumakau ma ndro taloh tinan bada oro nyimirin badeh asahan gwa ame loke an kapa gwa aimon bwidiu.
3Ano ja iy anyolom bulumakau ndro taloh ja asahan; oro doh badeh sali oro bwe, ndruwin ndruwin. Oro ame ales are hawe oro bulumakau bwena nane are kapa gwa.
4Eme badeh oro bulumakau sali oro bwe nane dah aniy oro bulumakau sali oro udu aliy dah, ano badeh ma kabin amak.
5Ano iy amadin ja badeh iy ameh ja. Eme iy anyolom bada kalom ari le, eme badeh udu bada kalom ari le doh badeh iy anyolom buwa kalom ma ndro taloh tinan badeh sukik udu badan badeh ndruni.
6Ano ja badeh iy anyolom bada kalom ari le ja, eme badeh udu bada kalom ari le doh badeh iy anyolom buwa kalom ma ndro taloh badeh awa-is ma siyer rai oloh ili eme.
7Eme oro kalom ma ndro taloh awa-is nane dah sakalamiy oro kalom buwa oro tinan dah. Eme kabin amak badeh iy anya, “Jo dah nane ameh.”
8Eme iy tikisiy handru, eme na mandraben badeh iy suni sahou i tiri lau mari ta kau tan ma hawe iri lau ta budon tan badu Ijip ame. Eme iy asehek ameh tan i tiri, arile iri ari winiyan batiye moso ameh bala tan bwe.
9Ano ndramak ta atiye wa-in tiye i ta kabin, “Jo anya kasehek tam, jo badeh ndramwekes lakou ndrandra-i.
10Ou mene a bolosen i tek ma hawe i ta ndramak ta atondrok ta amwekes jabi ramen. Ano ou mene atehei aru a bolo kou udu bolo asiu ta ndramak ta bwena ta ndrokei.
11Eme na ben ari badeh aru ma la-uh ameh, ya ameh taru badeh, ta iy ari badeh moson randra labai, ya ta iy ari moson randra labai.
12Ya nah loweu ari badeh Hiburu badeh udu hawe aru. Iy badeh lohowan ta ndramak ta bwena ta ndrokei. Eme aru asehek ameh taru i tan badeh eme iy tubuniy moson eme taru.
13Eme badeh asahan i le handru; jo badeh ou atehei jo i hamon ta lahou tek, arile ou andrei bale ndramak ta bwena ta amwekes jabi ramen.”
14Ano kabin suni lau ala suwi badeh andrei Josep udu bolo kou eme. Ano Josep ili isik lami behesen, iy asiniy awin ano badeh iy ili ales ere mada kabin.
15Eme kabin tiye i tan, “Jo badeh ameh, eme ari ndramak badeh batiye moson bame tek bwe. Eme ndramak ari tiye tek anya, ou badeh winiyan tobolowe moso ameh.”
16Eme Josep tiye, “Jo le, jo winiyan bwe, arile Kindrei le winiyan tiye moson i tam.”
17Ano badeh kabin asehek ameh tan, “Jo ameh badeh, jo badeh ales udu kapa gwa Na-el.
18Eme jo anyolom oro bulumakau ma ndro taloh tinan ma bada oro nyimirin are gwa ame badeh aimon bwidiu ado kapa gwa.
19Ano ja badeh jo anyolom oro bulumakau ma ndro taloh sali oro bwe, ndruwin ndruwin are gwa ame loken. Jo bwena batou ari bulumakau munya-un bala buku none doh udu munyak Ijip bwena bwe.
20Eme oro aniy bulumakau tinan nyimirin dan.
21Oro ndraniy, arile ndramak anyolom badeh i buku none oro baniy bwe, oro ma ndrusarak kahis le. Eme badeh ma jo amak.
22Ano ja badeh jo ameh ja, eme jo anyolom bada kalom ari le, eme udu bada kalom ari le doh badeh jo anyolom buwa kalom ma ndro taloh tinan badeh sukik udu badan badeh ndruni.
23Ano ja jo anyolom bada kalom ari le ja, eme badeh udu bada kalom ari le doh badeh, jo anyolom buwa kalom ma ndro taloh tinan bwe awa-is ma siyer rai aloh ili eme.
24Eme oro buwa kalom salin bwe dah sakalamiy oro tinan nyimirin dah. Ya eme jo asehek ameh doh i tiri lau ta kau, arile iri winiyan batiye moson bame tek bwe.”
25Ano badeh Josep tiye i ta kabin, “Ameh tam ma la-uh badeh moson i randra le; Kindrei badeh asehek tam ta lakou kameh iy kameh amwekes eme bakep ai.”
26Oro bulumakau tinan ma ndro taloh badeh moson jaha ma ndro taloh. Ya oro buwa kalom tinan ma ndro taloh badeh moson jaha ma ndro taloh ale.
27Ya oro bulumakau ndruwin ma ndro taloh, oro an hamon ame ma buwa kalom ma ndro taloh awa-is siyer rai oloh badeh, moson, jaha ndro taloh kameh nyamon bwe.
28I doh i buku le jo asehek tam kabin, luwen bwe kameh Kindrei badeh leheya tam lakou kameh iy amwekes.
29I dah kameh jaha ndro taloh kameh munyak Ijip kameh idih na nyamon.
30Ano udu hamon ta aliy na jaha ndro taloh ja kameh len ta son, len kameh nyamon bwe; eme jaha mwasin mene kameh lau maniy, tasah nyamon bwe kameh weleyani kon mari.
31Len ta nyamon solo-an mene lau ndramaniy, tasah len ta nyamon bwe eme kameh akohok andra-i labai.
32Moso ameh tam badeh Kindrei ndrasani ben, ya luwen bwe kameh asahan ai.
33“Eme na dah badeh ou adeu ari lau ta budon ma lau ta tanan eme ou atehei iy katondrok kon munyak mari badu Ijip.
34Ou ale tiye lau rayah ta lahou ta bolo asiu katondrok kon ari ari, iri kakohok lunoh nyamon badu bolo rinek rakum rakum na len ta nyamon amasu dah.
35Udu baha tondrok tam ou tiye toro, udu bolo jaha ndro taloh mwasin dah oro kakohok nyamon badeh ma oro katehei kudu bolo asiu bolo kon tinan dah. Ma oro badeh katondrok.
36Eme buku none jaha ndro taloh ta son asahan kameh, arau kameh i niri kon mari na len ta son kameh asahan Ijip. Eme kameh iri lau winiyan bakohok bandra-i ta son bwe.”
37Eme kabin hawe iri lau ta lahou tan ta bolo asiu aseken budon tan, ma tiye i toro, “To winiyan basilahei ari ndramak i buku none Josep kede-eh bwe ai, iy badeh malawi ndrabun ta Kindrei udu tan.”
39Ano kabin tiye i ta Josep, “Kindrei badeh ndraleheyani lakou mari doh i tam. Eme ya ou kede-eh ndramak ta budon ma ou kede-eh ndramak ta tanan labai, ari ndramak bala buku none ou bwe.
40Jo kameh atehei ou atondrok munyak mari; ma iri lau mari kameh anuhun le ou. Boto-on tek badeh udu bwele-em ya boto-on tam badeh udu bahan tek.
41Na dah jo badeh atehei ou atondrok munyak mari badu Ijip.”
42Eme kabin andrei ring tan amwenen atehei i andra lime Josep. Eme kabin asiniy awin i badan ma atehei gol sen nyikilikin i balen.
43Ano iy atehei Josep manyah udu la-u sau, sau doh iri katin haka aliu, ma sau doh badu bahan ta kabin; ano iri lau ta ndrokei ta atudun adek an mwena tan aloh, “Aha kabelek! Aha kabelek!” Josep badeh ndrasahan ndramak ta atondrok munyak tinan mari badu Ijip.
44Ano kabin tiye i tan, “Jo badeh kabin, eme ari ndramak badu Ijip mari dah, winiyan are lau winiyan batudun iy bwe, i buku none ou batiye ehe bala tan bwe.”
45Eme iy tondrohani Josep i badu Ijip badeh aloh Sepenat Paneya. Ano iy atehei badih i udun nyaran Asenat ya iy badih doh badeh nadu Podipera. Ya Podipera badeh iy Pris badu kon tinan On. Josep badeh jaha tan asahan tonoh badeh iy eme amwekes lahou ta kabin badu Ijip. Eme iy ruwani ndrahu kabin eme iy edek ili anyolom kon mari badu Ijip.
47Udu bolo jaha mwasin badeh munyak ato-ou nyamon solo-an labai,
48eme iri nyamon solo-an labai. Eme Josep badeh akohok ano badeh iy atehei iri ado bolo asiu udu kon tinan. Udu bolo bilin awudi kon tiri ari ari, badeh iy atukum nyamon ma atehei udu kon tinan.
49Iy ma mwena ondrek kalom. Ano badeh kalom nyaran bwe, solo-a on badu ndras, eme badeh iy badeh babudon ta ondrek bwe.
50Ben ta nyamon bwe basahan bwe le badeh, udu Josep Asenat badeh atehei nadun mwan la-uh.
51Eme Josep tiye, “Kindrei badeh ndramwekes jo ndramaniy isi tek ma ndramaniy iri lowa tama oro.” Eme iy tondrohani kadok tan badeh nyaran Manase.
52Ano ja Josep tiye, “Kindrei badeh ndratehei jo ndrasola udu munyak ta ndra-i dah; eme iy tondrohani bwaneh tan Ipra-im.”
53Ano badeh jaha ma ndro taloh ta nyamon solo-an udu Ijip nane iri lau sekesek ndrano.
54Eme i buku none Josep ndratiye len ta nyamon bwe asahan ai. Kon mari badeh nyamon bwe, arile munyak Ijip le, nyamon udu aliy.
55Eme udu sese iri lau badu Ijip nyamon bwe, iri ameson, eme iri aden i ta kabin ta nyamon. Eme kabin tiye iri ala hawe Josep ma iri kanuhun le Josep.
56Ano udu nyamon bwe ma son akohok kon munyak mari eme Josep sihiy asiu ta nyamon ma edeu kalom i ta sisih i niri lau badu Ijip.
57Eme iri lau mari badu bolo munyak ame Ijip, ame hawe Josep asih nyamon, tasah kon mari ndrandra-i labai ta nyamon bwe.
