1Liya badeh atehei nah ari badih nyaran Dinah nadu Jekop. Eme iy ili badeh manyah hawe iri badih badu munyak doh.
2Eme badeh nadu Hamor nyaran Sekem badeh badu Hiba, iy atondrok loboho doh, eme badeh iy anyolom Dinah badeh iy mwesekei karei i tan.
3Iy ibis nadu Jekop Dinah labai, eme badeh iy atamar ma indrek iy kaseken iy.
4Eme Sekem tiye ta taman, “Tama ou andrei badih bihin kodo-oh keme uduk.”
5Nadu Jekop oro mwan badeh ado ndra lobwidiu atondrok iri katin haka, eme Jekop anuhun nadun badih badeh lau ndratawi iy. Eme iy bamwekes ari lakou bwe winiya le nadun oro ame.
6Eme tama Sekem badeh ili hawe Jekop asehek sahou hawen.
7Eme nadu Jekop oro badeh barado lobwidiu barame ai. Eme oro anuhun nyala karei le badeh, boho oro asak ma ndrine oro isi labai. Tasah Sekem badeh mwesekei kandriyen ndra-in ma bobose iri Isra-el handru ta iy tawi Dinah nadu Jekop badih, lakou ndrabun handru ta amwekes.
8Arile Hamor tiye i toro, “Naduk, Sekem badeh ndrinen eden ta nadu ado badih labai. Ado katehei iy keme ma iy ki udu naduk.
9To kasehek sahou ki randra ta to badeh kasoh to kili keme kudu ndrokowa to.
10Eme ya ado kado hawe aso kado munyak dah kado; ado badeh kamanyah loboho heh seken tado udu aliy ma ado badeh kamwekes sasah ki tado ma ado katiye lakou tado ta sisih kili keme.”
11Ano Sekem tiye i ta tama Dinah hawe nadu tinen oro, “Ado aseken sasah le, eme sasah ado aseken jo kedeu kewek tado.
12Ado katiye sasah ado aseken ma ado kadeu masah ta nadu ado ki loken jo winiyan atehei. Buku none ado katehei badih kede-eh keme uduk.”
13Tasah nadu oro Dinah badeh badan ndrandra-i, eme badeh nadu Jekop oro abukoh no-o Sekem uru taman le.
14Eme oro tiye i turu, “Aso winiyan basumon bwe ai, aso winiyan bamwekes kandriyen dah bwe; Aso winiyan batehei nadu tine aso badih winiyan bala tare ku-i lakou tan ba-au bwe.
15Aso badeh aseken le i buku none iri nah mwan tam kasan ku-i iri ki-iu ki buku taso.
16Ano badeh aso baradeu nadu aso badih barawek ma tado barame taso. Ma aso kameh ado manyah hawe ado ma to asahan ari buruwen.
17I buku none ou baseken budon taso bwe, i dah kameh aso au ma hawe nadu tine aso badih.”
18Tanan toro badeh mwasin ta ndranye Hamor uru nadun Sekem. Sekem badeh iy kadok, eme iy babe-en ta amwekes budon nane bwe ai, tasah iy badeh ndraseken nadu Jekop badih labai ai.
20Eme badeh Hamor hawe nadun Sekem badeh uru adek ala loboho mada san ta i bolo kon tinan turu ma tiye i tiri lau badu kon doh.
21Eme uru tiye, “Oro lau kede-eh kawas mwasin tato. Oro kamanyah kado munyak tato ma oro katiye sasah ki ta asih; munyak kada-ah winiya oro mari. To badeh winiyan asoh nadu oro badih ma oro ale, winiyan asoh tato.
22I buku none to kasan ku-i lakou ta mwan ki-iu i le buku toro eh, i dah kameh oro kameh ado ma to kameh asahan ari buruwen. I buku none bwe eh, oro kameh au.
23I dah kameh iri katin haka toro ma hawe lakou mari toro kameh i tato. Eme to katiye mwasin, oro sa-au oro kado hawe to kado.”
24Eme iri lau mari badu kon doh badeh aseken budon ta Hamor uru nadun Sekem, eme iri sani ku-i lakou tiri mwan iu.
25Ano badeh len taloh ano, oro lau badeh ndrana toro mene ta baka sasan bano bwe le. Nadu Jekop ma hawe nadu tine Dinah, Simiyon uru Lebi badeh banoh bwe, uru ma samen ta bahun turu ala kon tinan badeh mwetehei iri lau mwan mari,
26ma hawe Hamor uru nadun Sekem ale. Ano badeh uru aluwi Dinah udu asiu ta Sekem eme andri ma uru au.
27Ano udu hamon turu nadu Jekop oro mari ala kon tinan mene tawi Dinah udu aliy, oro ala badeh adek bwele-e lau amak ma bene-ei lakou mari, tasah ta kandriyen ndra-in ta karei i bada Dinah.
28Eme oro ala andrei iri katin haka sipsip, ma donki ma hawe lakou mari udu kon tinan doh.
29Eme oro kuhi lakou mwasin toro mari ma tawi badih ma nah hawe tuwi lakou mari badu asiu.
30Ano badeh Jekop tiye i ta Simiyon uru Lebi, “Ah badeh ndramwesekei nono-ou ndrame tek; eme iri lau badu Kenan hawe badu Perisa ma lau mari badu munyak dah kameh mada iri andra-i eme tek. Jo badeh lau sola bwe; i buku none iri mari kase kame kamwekes bahun keme la-uk kameh, to mari kameh amak.”
31Arile oro anya, “Aso bwale aso iri amwekes nadu tine aso i buku none badih ta mada san.”
