1Jekop ale suri iy ma iy iu, eme badeh angelo ta Kindrei eme asahan hawen.
2Jekop anyolom oro badeh iy tiye, “I dah badeh ndrahu Kindrei!” Eme ma iy tondrohaniy badeh Mahana-em, moson, “Oro lumuk.”
3Eme Jekop eme badeh suni lau tan rayah ala bwena hawe nadu tinen Iso udu munyak Se-ir udu kon tinan Idom.
4Eme iy tiye i toro, “Ado katiye sahou ki ta Iso ki buku doh: ‘Jo badeh Jekop. Jo ndramak ta lahou tam. Jo badeh udu hawe Leban amwekes lahou tan eme taku len dah.
5Jo badeh tek iri bulumakau udu aliy, iri donki udu aliy, iri sipsip udu aliy, iri me udu aliy ma hawe lau mwan ma badih ta lahou tek ale udu aliy. Eme jo atiye sahou doh ewek tam, ta ou aseken jo de bwe.’”
6Ano oro lau ta tiye sahou ame hamon badeh tiye ta Jekop i buku doh, “Aso ala nadu tinem Iso tiye; iy badeh eme ta atou ou, ma lau tan ma hanek (400) ado hawen ame.”
7Jekop eme badeh iy inoh andra-i, eme badeh iy apwai lau ma katin haka sipsip, bulumakau ma hawe kamel tan i lumuk.
8Iy abudon badeh i buku doh, “I buku none iy amwekes bahun i la-u oro rabuk eh, badeh oro rabuk katobwak ai.”
9Ano badeh Jekop amwekes salom i buku doh: “O Kindrei ta tama Abraham ma Kindrei ta tama Aisik, ou Laban ou tiye eme tek anya, jo badeh ki-iu ki hamon kili kon tinan ta lowak oro ma ou kameh adeu lundriyek oro a sola.
10Jo badeh bamwenen ta kandriyen mwasin tam bwe ma ba-en hamon tam i buku none ou leheya ndramak ta lahou tam bwe. Jo mene andrei le kandro tek len aso mene ame bilisiu ta gwa Jordan. Arile na dah jo ndra lumuk.
11Jo badeh inoh, jo amwekes salom, ou sebenei jo ta mine nadu tine Iso eme, koro-an iy kamwekes bahun keme tek ma oro nah ma hawe tine oro.
12Arile ou badeh ndratiye, ou kameh adeu kanek ma ou kameh adeu lundriyek oro kameh nyaran bwe, i buku none on badu babi, winiya are lau winiyan bandromwoi bwe.”
13Eme iy amadin ben ari eme badeh iy atehei lakou ta adeu i ta nadu tinen Iso:
14iy atehei lunek (200) me badih, lunoh me mwan, lunek (200) sipsip badih ma lunoh mwan,
15iy atehei tonoh kamel badih ma hawe rayah kasen, atehei hanoh bulumakau badih ma ronoh bulumakau mwan ano lunoh donki badih ma ronoh donki mwan.
16Iy apwai oro katin haka, rabuk are doh, rabuk are doh. Ano iy weleyani oro lau ta lahou tan atondrok, eme iy ari atondrok rabuk, iy ari atondrok rabuk, i le buku doh. Eme iy tiye i toro, “Ado kadek kabwena tek ya ndrokowa to sese udu aliy tiri katin haka.”
17Eme iy tiye ta ndramak badu bwena: “Ya i buku none nadu tine Iso kandruni ado, ya i buku none iy kandremenya ado, ‘Ado lau tare ame dah ya ado ado heh ame dah? ma katin haka mari ado bwena kede-eh tare?’
18Eme ado katiye ki buku doh, ‘Oro badeh ta ndramak ta lahou tam Jekop. Oro doh tam ai. Ya Jekop badeh in hamon taso eme.’”
19Ano iy ale tiye oro nane are hamon toro badu mwena ma hawe oro badu hamon tiri katin haka dah:
20“Ma ado samaniy ta tiye, ‘Jekop in hamon eme.’” Jekop badeh abudon, “Jo kameh tamarei iy na lakou ki tan ma iy kameh mani kandriyen jo mene amwekes, i buku none jo ndruni iy.”
21Eme iri lakou ta anyohan Iso na aliy badeh in mwena ili. Ya Jekop udu amadin ben ari.
22Ano na ben doh badeh Jekop suri iy, eme iy kuhi udun ma la-uh, kuhi uru badih ma la-uh ta lahou tan ma hawe nadun oro ma ronoh ari mwan badeh, oro adek ala bilisiu ala gwa Jabok.
23Iy tiyani oro a bilisiu ta gwa ano badeh iy tiyani iri lakou tan mari i bilisiu ale.
24Jekop le ari badeh in hamon, eme badeh ndramak ari ili badeh uru akek, uru akek winiya le kon aleu.
25Eme ndramak dah atona boto-on tan anya kano le badeh, iy atehei minen i ba Jekop le badeh, ma ban asoh.
26Ano iy ndramak dan anya, “Jo ki-iu ai, kon ndra leu.” Arile Jekop anya, “Jo winiyan baruwani ou ba-au bwe, ndra ou atehei nyosowan eme tek.”
27Eme ndramak dah ndremenya iy, “Nyaram areh?” Eme iy anya, “Nyarak Jekop.”
28Ano badeh ndramak dan anya, “Nyaram kameh bala Jekop ja bwe ai, nyaram kameh aloh Isra-el, tasah ou badeh boto-on labai ta akek i la-u Kindrei hawe iri ndramak.”
29Eme Jekop anya, “Abo, ou tiye nyaram keme tek.” Arile iy anya, “Ou anya atanam nyarak ta sasah?” Ano badeh iy atehei nyosowan i la-un udu doh.
30Eme badeh Jekop tondrohani nyara kon Peniyel, moson “Mada Kindrei.” Eme iy anya, “Jo badeh anyolom Kindrei udu madak amwenen arile jo bamak bwe.”
31An eme loken badeh iy udu Peniyel iu ma soka le, tasah ta ban.
32Eme ta katin doh badeh iri lundriye iri Isra-el badeh baimon ndrubulo katin haka bwe, tasah Jekop badeh edek andra-i na ban.
