Text copied!
CopyCompare
Sahou ta Kindrei - Jenesis

Jenesis 19

Help us?
Click on verse(s) to share them!
1Lot badeh manyah udu mada san ta i bolo kon na beyeh, eme badeh uru Angelo la-uh asahan hawen. Iy anyolom uru le badeh iy edek ili hawe uru ma akor ma bulin i andri bada munyak.
2Eme iy tiye, “Laban, ah ma la-uh kame asiu tek tasah jo ta lahou ta ah. Ah kasikine kati ah ma ah kamadin ben ari, ano ma ndraben ah bara-au.” Eme uru anya, “Bwe ai, aru kameh amadin na ben dah ado lohalak bolo kon.”
3Arile iy andresei uru ma uru ala asiu tan. Ano Lot tiye oro lau ta lahou tan mwesekei jabi ramen yis bala bolon bwe i nuru lau dah.
4Eme oro bamadin bwe le badeh, iri lau loweu hawe iri lau-en mari badu kon Sodom badeh ala awudi asiu.
5Eme iri aloh Lot, “Oro lau ame na ben nane ndraheh? Oro kameh manan aso anya katou oro!”
6Eme Lot sulu-i kou ano iy eme manan, ma atuwi kou ili.
7“Ado kawas tek, ado samwekes kandriyen badeh.
8Naduk badih ma la-uh kada-ah, uru bakohok se mwan bwe. Jo katiye uru kame manan ya ado badeh kamwekes sasah na seken tado ki turu. Ya ado samwekes ari lakou sala toro, oro badeh are baha tondrok tek.”
9Eme oro anya, “Ou abelek!” Ma oro tiye, “Ou lau dah badeh badu leheleh ame dah, eme ya ou anya amwekes kandriyen ta sahou ai. Oro kameh, bwe ai, arile aso kameh adeu maha tinan labai i tam.” Oro andres Lot boto-on labai ano oro anya katokos asiu.
10Arile oro lau ado bolon sulu-i kou ma aluwi Lot i bolon ano sulu-i kou ili.
11Ano badeh oro bwidi mada iri agwah, eme ma iri banyolom kou bwe.
12Ano uru lau ma la-uh dah lelen Lot, “Ou ari lowam, o ari molosou ta nadum, o ari nadu mwan ma badih udu kon dah de bwe. O ari lau udu bolo kon dah tam de bwe. Ou kuhi oro ka-au ta kon dah.
13Tasah aso kameh asun kon dah. Laban badeh anuhun ndrelen tiri, eme iy suni aso ame ta asun.”
14Eme Lot ili badeh asehek ta masa-an oro, ala sudi nadun oro badih. Iy tiye, “Suwi ado kame len ta kon dah, Laban kameh asun kon dah.” Arile udu nadun oro anya badeh iy ibo nyorei le.
15Na boholen badeh oro Angelo wekewek Lot, “Suwi! Ou kuhi udum ma nadum badih ma la-uh ya ado ka-au. Eme ya ado samak, len kon kameh andrakak!”
16Eme Lot badeh babotatahan bwe. Laban tikisiy iy eme iy kuhi udun ma nadun uru na lim ma sariye oro ame len ta kon.
17Eme oro ame len le badeh iy ari tiye anya eh, “Ado kabotataha batu ado! Ado sanyolom same hamon, ma ado samunyau loboho kon bwidiu udu aliy. Ado katobwak ka mandrei, bakameh ado kamak.”
18Arile Lot tiye i turu, “Ndri-i, Laban tek!

19Ou badeh anuhun jo labai, ma mwesekei jo, ma ou sebenei kohak. Mandrei udu len labai, jo winiyan batobwak bala aliy bwe. Koro-an maha ma sisi-in tinan labai kabwidi jo kimek.
20Ou ndranyolom kon bwisik udu mirihik ai kodo-oh. Ma kon doh nadu bwisik, eme jo katobwak ki aliy. Ma jo kameh winiyan bamak bwe.”
21Eme iy anya eh, “Abo mwasin jo aseken. Jo badeh winiyan basulumwi kon badeh bwe.
22Suwi ado kala suwi! Jo badeh winiyan bamwekes ari lakou bwe winiyan ado ndrasos.” Eme ta katin doh badeh kon doh aloh So-ar, tasah kon doh bwisik.
23Lot oro ala asos le So-ar badeh, an eme loken la-u kon.
24Ano badeh Laban mwesekei jih nyarahan labai anya udu kandrah eme sulumwi Sodom hawe Gomora.
25Eme badeh sulumwi iri lau mari, sulumwi nyamak ma hawe sulumwi baso mari ano. Lakou mari badeh andrakak.
26Eme udu Lot anyolom i hamon badeh ma iy ibin i bek.
27Eme ma ndraben ta len ari ja, Abraham amak ma iy ili ndrahu kon iy mene ales udu aliy mada Laban,
28eme iy anyolom i andri ili Sodom hawe Gomora ma hawe munyak ma nyamak mari loboho doh badeh iy anyolom kasu-er i loken. I buku none kasu-er ta jih nyarahan badeh i loken.
29Len Kindrei sulumwi kon tinan ma nyamak mene Lot manyah udu aliy, eme iy badeh bamaniy Abraham bwe ya eme iy mwesekei Lot atobwak ma iy udu mwasin. Loboho Iri Mowaba Ma Amora
30Ano Lot hawe nadun uru badih ma la-uh badeh ruwani So-ar, eme oro ala manyah ado bolo mandrei, tasah iy badeh inoh ta manyah udu So-ar. Oro ma taloh badeh manyah ado munu bek.
31Eme len ari badeh nadu Lot badih bwele-en tiye i ta nadu tinen badih bahan, “Tama talu badeh ndra alon, eme ari lau ja kede-eh ja bwe ai, ta amadin talu bwe, i buku none kandriyen ta munyak mari.
32Talu kamwesekei tama talu badeh ka-un wa-in eme iy kamadin talu ya talu kato-ou nah.”
33Eme na ben doh badeh uru atehei wa-in i ta tama uru, ano badeh iy bwele-en turu badeh amadin hawen bwena. Iy amadin hawen badeh ano iy suri iy badeh, Lot batona bwe.
34Len ari ja badeh iy bwele-en tiye i ta iy bahan, “Na ben badeh jo amadin tama, talu kamwesekei iy ka-un wa-in na ben dah, eme ou ala amadin hawen ja eme ma talu kato-ou nah kasahan ta tama talu.”
35Eme uru mwesekei tama uru a-un wa-in na ben doh ano iy bahan ili amadin hawen. Eme i le buku aliy, iy amadin hawen badeh, ano iy suri iy eme loken badeh Lot batona se bwe.
36Eme uru ma la-uh tuwi nah nadu tama uru.

37Iy bwele-en badeh atehei nadun eme len badeh tondrohani nyaran badeh Mowab, moson “Ta tama.” Eme iy badeh tama iri Mowaba na len dah.
38Iy bahan badeh atehei nah mwan ale, eme tondrohani nyaran badeh Ben-ami, moson “Nadu tama oro.” Eme na len dah badeh iy badeh tama iri Amora.