Text copied!
CopyCompare
Buka Hope - Zinama Tumatumae

Zinama Tumatumae 20

Help us?
Click on verse(s) to share them!
1Na vaeni si hoke ṉoṉovala meke na bia si varivaripera; asa pu ta turaṉa koa rini si lopu na tie gilaena.
2Sa tinaṉaziri tanisa baṉara si guana kurumuna sa laione; asa pu va bugoria si ene la pa minate.
3Na vina lavata pa tie sapu pude lopu somana koari na vinaripera, ba doduru tie duviduvili si lopu sana vari tokei.
4Na tie hakohako sapu lopu tavete inuma pa totoso, ke pa totoso pakepakete si loketoṉa dogoria.
5Sari hiniva tanisa bulo tie si guana lamana peava, ba sa tie gilagilana mo boka siovo vurani.
6Soku rina tie va rutia sa tataru loke kokoina; ba avei sa tie sapu boka ta ronu?
7Sa tie toṉoto si koa ia sa tinoa sapu loke tinazutuna; mani tamanae sari tuna meke sari dia koburu.
8Totoso habotu sa baṉara pude varipitui, si pa matana mo doṉo gilania sa sa kinaleana.
9Esei si boka zama guahe, “Ele kopu nia rau sa buloqu pude loke tinazutuqu; ke via si rau meke loke qua sinea?”
10Sari padapada mamata meke pada ginele kokohadi si hakohako beto ni e Zihova.
11Ura boka tumae nia goi sa koburu koari nana tinavete, be sari nana hahanana si toṉoto meke leadi.
12Taliṉa sapu avavosae meke mata sapu dodogorae, si tavete betoi e Zihova.
13Kakala puta, na kote malaṉa nia goi; tavetavete ṉaliṉali, meke kote soku nigo ginani.
14“Lopu leanadi, lopu leanadi!” gua sa tie hiva holu vagidi; meke la vivinei nia sa sapu leanadi sapu holu vagi sa.
15Qolo si koa mo, meke patu ṉedala si soku hola, ba sa beru pude zama nia sa tinumatumae si arilaena hola ni.
16Vagia sa poko tanisa tie pu va egoa pude lipua sa gale tanisa votiki tie; tuqe vekoa osolae lipua sa sa gale tanisa tie karovona.
17Na ginani ta hikona si lomoso pa tie, ba pa vina betona si kote guana siṉia onone sa ṉuzuna.
18Taveti sari na hiniva koari na binalabala ta tokae ni goi; pana la pa vinaripera goi si hata paki tinokae.

19Pa nanae hoke ta tozi vura sari vivinei ta tomedi, ke lopu va tata i saripu zamazama sisigiti.
20Be leve nia keke tie sa tamana babe sa tinana; si sa zuke tanisa si kote mate pa korapa huporo dudukurumu.
21Sa tinago sapu tuturei ta vagi tatasana, si lopu na minana pa vina betona.
22Mu lopu zama guahe, “Kote hobea rau sa sinea hie!” Mu aqa nia se Zihova meke Asa kote harupigo.
23Zihova si hakohako ni sari padapada mamata seadi, meke na sikele kokohadi si lopu qetu ni Sa.
24Sari inene tana tie si ta turaṉa koe Zihova, ke loke tie gilania pavei kote la gua sa siraṉa Tanisa.
25Lopu leana si pude bebeno va madi la nia koe Tamasa si keke toṉa; meke mumudi si talotaṉa ni.
26Na baṉara gilaena kote paqaha pani sari tie kaleadi; meke kote va kilasa hokari sa.
27Sa zuke te Zihova si kalalasa nuquru la pa maqomaqo tie; la hatahata vura ni Sa pa korapa tinoa tanisa tie.
28Tataru meke sinoto va nabu koe Tamasa si lavelave nia sa baṉara; pa tataru si tava nabu sa hinabotu binaṉara tanisa.
29Sa ṉiniraṉira si na vina lavata tadi tie vaqura; meke na kalu keo si na vina sari tadi tie koadi.
30Na sineke va bakora si va via kinaleana; na tinasigiti si va via kamo pa korapa bulona sa tie.