Amós 6

1

2

3

4

5

6

7

8

9

¹Amós sogdebalid: “Dule-Sión-neggweburgi-baisuli-itodimalad, ¡duledar-wilesmar! Samaria-yargi-dobsulidba-gudidimalad, ¡duledar-wilesmar! Dule-nug-nikamalad neggwebur-dummagangi-mamaid, ¡duledar-wilesmar! A-dulemarse Israel-dulemar bendakleged egisnaddamalad.

²Calne-neggweburse be namar, nue be dakmalo. Agi bukwa, Hamat-neggwebur-dummadse be namarbalo. Geb sorba Filistea-neggwebur-Gatʼye-nugadse be namarbalo. ¿Ar bemarde we-neggweburmargi bur obinmarde? ¿Bemar-yarde bur we-yarmarba dummadye sogde?

³Bemar iba-isgana obangumarye be bimalad, aka, be neg-nue-gagaled-iba warmakega imakmalad.

⁴Be-gabed-megmaladgi elefante-nugar-goamar nanaid, a-megedgi na be megdimalad, degi, be-gan-siged-mua-muad-dummadgi be bilikwaa sigdimalad. A-gangi-sii, bemar sibad-wawaad-mimmigan-e-galugi-sulearmalad gundimalad, degi, moli-bebe-nikad-senigana-wardummagan be gundimarbalid.

⁵Bemar, David-namakeyob namakye be sogmalanad, yogasaar be namakmalad. Gar-cítaraʼba be namakdedamalad. Be-itoleged, gar-gormalad be obinyedamalad.

⁶Bemar nog-dummagangi vino be gobdimalad. Degi, ina-wawadikid-nuegan be ebudimarbalid. Ar José-e-wagan-e-neg-bibichisadba nunmaked-dummad, eba nunmak be itosurmalad.

⁷A-ulale, emidi bemar-inse dulemar-galesa-seledmaloed-iduar seledmaloed, deyobi, dulemar-galagwensur-iba-onomalad berguoed.”

⁸Bab-Dummad-Jehová na dukin ise-sogar imaksad. Bab-Dummad-Jehová-Bela-Gangued-Nikad weyob soged: “Jacob-wagan san-dummarba-imaked an isdar-daked. E-neg-gandikmalad an sae-daked. Agala, e-neggwebur e-isdarmaladga an urmakoed, degi, bela e-ibmar-nikadi an e-isdarmaladga urmakoed.”

⁹Weyob neg gudoed: Dule neg-gwagwengi e-ambe (10) dula besale, bela burgwemaloed.

¹⁰Geb e-gwenad-gwensak muimar-ogumakega, a-negse muimar-sudanikile, dule-neggi-gudiidga weyob sogdoed: “¿Dule-baid amba be-walik gudii?” Geb dule weyob abin sogdoed: “Suli.” Geb degidgine, ega sogdoed: “¡Boogwa! Anmar geg Bab-Jehová-nug obared.”

¹¹Ar Bab-Jehová igar-ukdoed: Neg-dummagan bibisgeye, degi, neg-burwigana ubigwar imakye.

¹²¿Ar molimar akwa-dummagan-imbaba abarmaksi? ¿Ar akwa-dummagangi nabir moli-bebe-nikad napa imusi? Ar bemardi, igar-innikigwad, ibmar-isganaga obinnismalad. Igar-innikigwad-selemaid, boniga be obinnismalad.

¹³Bemar ibmar-gwen-imaksasulidgi be wergudimalad. Be sogmalad: “Anmar-ganguedgi anmarde gargangued nikusmarye.”

¹⁴Degisoggu, Israel-dulemar, Bab-Jehová-Bela-Gangued-Nikadi soged: “Bemargi neggwebur-soggwen gwichiguega an imakoed. A-neggwebur ise-mesagwale bemar-imakoed. Hamatʼse-doglemaid-akale, Arabá-diwar-maidse, bemar ese odurdaklegoed.”