1“Jei, ŋicne ŋicne micne bajareeŋgopieŋ, ŋicguru i jaŋere fekicnefâc ŋoŋe! Jei, ŋoŋe Zioŋ haeo maŋbahac fâfâsâc jueŋgopieŋ, â Samaria tikio mana mezac tâmiric ŋehapie Israe kikefuŋ jaŋe fua‐ŋareeŋgopieŋ!
2Ŋoŋe Kalene haeo ra honenʒepieŋ, erâ irecnec Hamati haeo ranʒepieŋ, izi Filisa mâreŋko Gati haeo hurâ honenʒepieŋ! Jaŋe ŋicguru ʒi moc siric‐jopahuc biaŋne jueŋgopieŋ? Me jaŋere mâreŋzi ŋoŋere jâuruhuc qaratiewec fokac me?
3Oi ŋoŋe, ʒârâ hâriŋ dameŋ mana suahuc sisipiric â bâbâʒâic i fârepie fisiekac.
4“Jei, elefaŋte ʒuŋenezi fofo‐jeŋic ba eric ekicnao foeŋgopieŋ, â ŋeŋe‐jeŋic sâc otec foeŋgopieŋ, ehuc lama guruonec motecne rorâ hezu rike nâc eeŋgopieŋ, â bulimakao motecne i fickonec rorâ qa nâc eeŋgopieŋ!
5Jei, woŋgâŋ qahuc gae wewepâ wiac eeŋgopieŋ, â Dawidi sâckehuc musi wiac bâfuaeŋgopieŋ!
6Jei, jaŋe râqâc sâkoonec waiŋ opâ nâeŋgopieŋ, â sahac‐jeŋicko wokemaŋ âsu biaŋ ruaeŋgopieŋ, ehuc Josefere kikefuŋfâc sipirickehapie mana mezac mi ejareeŋgopieŋ!
7Jaŋe irec hâcne kâpâcwâru ŋic bânie‐jarepie kâpâcwâru ficko ranʒepieŋ, ehame fofo‐jeŋicko otec fohuc ojowa kosa qaeŋgopieŋ i omaezejec.”
8Anutu Tâpiri Ɋuŋɋasaŋ Wofuŋzi mukac, Wofuŋ Anutu e jahacnao ɋetickehuc ʒiŋuc mupaŋkewec: “No Jakobo maŋ fefe‐ticnere manape tatakicne eekac, â ficsanaŋ‐ticne qaisockehuc hae â maŋnao wiac forakac i râpecke‐fârekopac.”
9Eme fic mocko ŋic nâfocne 10 juniŋmuo jaŋe sifu hâmonʒepieŋ wâc.
10Eme ŋic hâmokicne mocte soctofazi qâŋɋâŋ duckeocte fickonec bawahahuc fic tuturuŋnao moc ŋeocmu e ʒiŋuc wiocneocmu: “Gohec moczi moc jukac me?’ Mume muocmu: “Aricne”; ehuc ʒuhuckerâ muocmu: “Dâŋ behec, ʒi Wofuŋte ʒâŋe mumune mi ekac.”
11Irec mananiŋ: Wofuŋzi mume ficŋeŋic kâcɋene mecne, piticne mecne i mâmâc heroc qâropieniŋmu.
12Becâsic jaŋe haroŋaŋ faio sâcne gasackeniŋmu? Me bulimakao jaŋe mâreŋ bâbâfâuc sâqe fârepie hâwec sâcne nâfâuckeocmu me? Ŋoŋe ine mumutiŋ dâŋ bârisiepie qotâre micopâ tinac ewec, â tiŋne jujure fârine bârisiepie kegocjâcte hâtâ iŋucne ewec.
13Ŋoŋe wiac fâri tâmiric irec ʒeri eŋgopieŋzi penaroŋ ehuc mueŋgopieŋ: “Nâŋe nâŋâcne tâpirio siŋkehuc sanaŋkembeŋ.”
14“O Israe kikefuŋ, ŋoŋe mananiŋ: No ŋicguru moc ejarepe râsi eŋarenʒepieŋ, eme jaŋe Hamati hae ramicnao ira fuŋkerâ fific guguriŋ eŋare rakupie Araba wâneŋte opâwâcko tarazejec.” Anutu Tâpiri Ɋuŋɋasaŋ Wofuŋ e iŋuc mukac.
