1मिनु मोसा नु इस्राएल ङा खाल्पापुकीमी मुर आन कली “मुलाक्ती इन कली देंशो शेंशो लोव़ नेल्ल टिशा पने।
2परमप्रभु यावे, इन परमप्रभुमी इन कली गेशो यर्दन आइक्ची हांबु ङा रागीमी शोक्सीनी नोले ङा नाक्तीमी ठेयब फुल्लु थारशा, बुलु ब्रुइक्तीन।
3मिनु शोक्सीनी नोले गेपुकीमी मेको अरेशो लोव़ नेल्ले मेको फुल्लु तार ब्रेक्चा माल्नीनी। मो पाइतीनी हना, परमप्रभु यावे, इन परमप्रभुमी इन कली गेशो रागी ओव़चा ताइनीनी। परमप्रभु यावे, इन किकी पिपी आन परमप्रभुमी इन कली देंशो खोदेंशो पा इन कली दूध नु खुदो शुश बाक्शो रागी गेब।
4यर्दन आइक्ची हांबु जाक्दीन्नी नोले गो इन कली अरेशो, मेको फुल्लुपुकी एबाल डांडाम थारशा बुलु ब्रुइक्तीन।
5मिनु मेकेर रे गेपुकीम परमप्रभु यावे, इन परमप्रभु कली फुल्लु के चढ़ेतीक का सेलीन। मेको सेल्नीनु, मेको फुल्लु आन कली फलम के यामी काइ मथिचा। प्रस्थान २०:२५
6गेपुकीमी परमप्रभु यावे, इन परमप्रभु कली चढ़ेतीक सेल्नीनु, मप्रोल्शो फुल्लु के सेलीन। मिनु मेको तारी परमप्रभु यावे, इन परमप्रभु कली चोशा चढ़ेतीक मेकेर चढ़ेचा माल्नीनी।
7मिनु गेपुकीमी दुशा बाक्चा आ पर्बम चढ़ेतीक चढ़ेचा माल्नीनी। मिनु गेपुकीमी परमप्रभु यावे, इन परमप्रभु आ ङोंइती मेको जशा ब्वशा ग्येरसीने। ब्यवस्था १२:७
8मिनु मेको फुल्लु आन तारी एको अरेशो लोव़ नेल्ल मुशा, रिम्शो पा ब्रेक्चा माल्नीनी” देंत।
9मिनु मोसा नु चढ़ेब, लेवीपुकीमी इस्राएली नेल्ल आन कली “इस्राएलीपुकी ब्वालेइ पा, नेनीने। मुलाक्ती गेपुकी परमप्रभु यावे, इन परमप्रभु आ मुर दुम्तीनी। ब्यवस्था २६:१८-१९
10मोपतीके परमप्रभु यावे, इन परमप्रभु आ देंशो टिने। मुलाक्ती गो इन कली माइश्शो आ शेंशो लोव़ नु आ फुल्लुम मुशा ब्रेक्शो लोव़ नेल्ल टिने” देंतेक्म।
11मिनु मेको नाक्तीम मोसामी मुर आन कली
12“गेपुकी यर्दन आइक्ची हांबु शोक्सीने थुम्नी नोले, सु सुमी मुर आन कली आसीक गेचा कली गेरीजीम माइश्शो डांडाम राप्शा बाक्चा माल्नीम देंशा हना, सिमियोन, लेवी, यहूदा, इस्साकार, योसेफ नु बेन्यामीन राप्शा बाक्चा माल्नीम। ब्यवस्था ११:२९
13मिनु सु सुमी मुर आन कली सराप पचा कली एबाल माइश्शो डांडाम राप्शा बाक्चा माल्नीम देंशा हना, रूबेन, गाद, आशेर, जबूलून, दान नु नाप्ताली राप्शा बाक्चा माल्नीम।
14मिनु लेवीपुकीमी नेल्ल इस्राएल ङा मुर आन कली ठेयब सेंदामी लोव़ पचा माल्नीम” देंत।
15मिनु मेकोपुकीमी “सु मुरुमी मुशा, यपाइश्शा मूर्ति सेल्ब, मेको परमप्रभु यावे कली ग्रांग्रा दित्चा ङा बाक्ब। मिनु मेको जोक्ब मुरुमी आ सेल्शो मूर्ति कली ख्रुइश्शोमी वोइक्ब, मेको मुर सराप राइब” देंतेक्म। मिनु मुर नेल्लेमी “आमेन, मोदेंशो दुम्ल” देंचा माल्नीम। प्रस्थान २०:४,२३
16मिनु “सु मुरुमी आंम आम आफ कली मान मपाइब, मेको मुर सराप राइब” देंतेक्म। मिनु मुर नेल्लेमी “आमेन, मोदेंशो दुम्ल” देंचा माल्नीम। प्रस्थान २१:१७
17मिनु “सु मुरुमी आ नेक्था ङा मुर आ रू ङा सांद याक्ब, मेको मुर सराप राइब” देंतेक्म। मिनु मुर नेल्लेमी “आमेन, मोदेंशो दुम्ल” देंचा माल्नीम। ब्यवस्था १९:१४
18मिनु “सु मुरुमी मिक्च मताइब कली हेंथे लां कोंइब, मेको मुर सराप राइब” देंतेक्म। मिनु मुर नेल्लेमी “आमेन, मोदेंशो दुम्ल” देंचा माल्नीम। लेवी १९:१४
19मिनु “सु मुरुमी अर्को रागी ङा मुर, रोम रोइक्च नु वोंइश बेक्शो मीश मुर आन कली ठीक निसाफ मपाइबा, मेको मुर सराप राइब” देंतेक्म। मिनु मुर नेल्लेमी “आमेन, मोदेंशो दुम्ल” देंचा माल्नीम। प्रस्थान २२:२०-२१
20मिनु “सु मुर आ आफ आ मीश नु इप्बा, मेको मुर सराप राइब। मारदे हना मेकोमी आ आफ कली मुने तोक्ब” देंतेक्म। मिनु मुर नेल्लेमी “आमेन, मोदेंशो दुम्ल” देंचा माल्नीम। लेवी १८:८
21मिनु “सु मुरुमी बी ब्यफ, क्यारश भेडा नु इप्ब, मेको मुर सराप राइब” देंतेक्म। मिनु मुर नेल्लेमी “आमेन, मोदेंशो दुम्ल” देंचा माल्नीम। लेवी २२:१८
22मिनु “सु मुर आ समी नु इप्ब, मेको आ आफ आ तमी बाक्त हना यो आ आम आ तमी बाक्त हना यो, सराप राइब” देंतेक्म। मिनु मुर नेल्लेमी “आमेन, मोदेंशो दुम्ल” देंचा माल्नीम। लेवी १८:९,११
23मिनु “सु मुर आ शिमी नु इप्ब, मेको मुर सराप राइब” देंतेक्म। मिनु मुर नेल्लेमी “आमेन, मोदेंशो दुम्ल” देंचा माल्नीम। लेवी १८:१७
24मिनु “सु मुरुमी बाप्शा, मुर कली साइक्ब, मेको मुर सराप राइब” देंतेक्म। मिनु मुर नेल्लेमी “आमेन, मोदेंशो दुम्ल” देंचा माल्नीम। प्रस्थान २१:१२; गन्ती ३५:२०
25मिनु “सु मुरुमी क्येट ताक्शा, दोस मतशो मुर कली साइक्ब, मेको मुर सराप राइब” देंतेक्म। मिनु मुर नेल्लेमी “आमेन, मोदेंशो दुम्ल” देंचा माल्नीम। प्रस्थान २३:८
26मिनु “सु मुरुमी एको अरेशो लोव़ नेल्ल खाप्शा मपाइब, मेको मुर सराप राइब” देंतेक्म। मिनु मुर नेल्लेमी “आमेन, मोदेंशो दुम्ल” देंचा माल्नीम। गलाती ३:१०
