1मिनु परमप्रभु यावेमी आं कली देंशो खोदेंशो पा गोपुकी गोरशो रागी लल समुन्द्र गे लाइतक। मिनु शुश नाक्त सम्म सेइर डांडा हिरना हिरन बाक्तक। गन्ती २१:४
2मिनु परमप्रभु यावेमी आं कली
3‘गेपुकी शुश नाक्ती एको डांडा कली हिरना हिरन बाक्तीनी। मुल उत्तर गे लने।
4गे मुर आन कली मुल गे सेइरम बाक्ब, इन लोक्बपुकी एसाव आ चच युइ आन रागी लाइनीनी। मेकोपुकी इन कली तशा हिंनीम। मिनु गेपुकी होस पचा माल्नीनी। गन्ती २०:१४
5मेकोपुकी नु काइ मजिने। मारदे हना गो मेको आन रागी रे इन कली खोइल थेक्तीक खोमो रू यो मगेनुङ। गो सेइर पहाड एसाव कली गेशो बाक्नुङ। उत्पत्ती ३६:८
6मिनु इन माल्शो जचा थोव़क मेको आन के ग्याप्शा ला जने। ब्वाक्कु यो मेको आन के ग्याप्शा तूङीन।
7मारदे हना परमप्रभु यावे, इन परमप्रभुमी इन पशो नेल्लेमी इन कली आसीक गेशो बाक्ब। गेपुकी मेको ठेयब गोरशो रागीम गाक्नीनु, इन कली कोव़तु। मिनु परमप्रभु यावे, इन परमप्रभु ४० बर्स सम्म गेपुकी नु बाक्त। इन माल्शो नेल्ल ताइतीनी’ दे परमप्रभुमी देंत। गन्ती १४:३३
8मिनु गो, सेइरम बाक्ब एसाव आ चच युइ, आंइ लोक्ब आन बाक्तीक दिंम ङा अराबाह ङा लां रे पा एलाथ नु एस्योन-गेबेर रे मगाक्थु, गो मोआब ङा गोरशो रागी गे लाइतक।
9मिनु परमप्रभु यावेमी आं कली ‘मोआब नु लडाइ मपने। मेकोपुकी नु काइ मजिने। मेको रागी इ कली मगेनन। मारदे हना गो आर सहर लोत नु आ चच युइ आन कली गेता। उत्पत्ती १९:३६-३७
10मिनु ङोंइती मेकेर एमीमपुकी बाक्तेक्म। मेको शुश नु लाइश्शो मुर बाक्तेक्म। अनाकीम ङा मुर खोदेंशो शुश लाइश्शो कोल्शो मुर बाक्तेक्म। ब्यवस्था १:२८
11मिनु अनाकीम ङा मुर आन कली खोदेंशो पा रेफाइम माइश्शो मुरपुकी शुश कोल्शो मुर देंनीम। मिनु मोआबीम मेको आन कली एमीम देंनीम।
12ङोंइती होरीपुकी यो सेइरम बाक्शो बाक्तेक्म। मिनु नोले एसाव आ मुरपुकीम मेको आन कली साइश्शा, मेको आन रागीम बाक्तेक्म। परमप्रभु यावेमी इस्राएली आन कली गेशो रागी मेकोपुकीम आंम के सेल्शो खोदेंशो पा, मोआब ङा मुरपुकीमी मेको रागी आंम के सेल्शो बाक्तेक्म’ देंत। उत्पत्ती १४:६
13मिनु नोले परमप्रभुमी ‘गेपुकी जेरेद खोल्सा शोक्सीन’ देंत। मिनु गो जेरेद खोल्सा शोक्साक्क। गन्ती २१:१२
14मिनु ङोंइती परमप्रभु यावेमी कसम जशो खोदेंशो पा कादेश-बारनेआ रे जेरेद खोल्सा आइक्ची हांबु सम्म जाक्चा नु लडाइ पाइब नेल्ल मनुम्मा सम्म आंइ कली ३८ बर्स माल्ताक्व। गन्ती १४:३४
15थमा पा परमप्रभु यावेमी मेको लडाइ पाइब आन कली आंमान क्याम्ताक्व। गन्ती १६:३१-३२; गन्ती २१:६; गन्ती २५:३-५
16मिनु मुर आन दाते ङा लडाइ पाइब नेल्ल बेक्ने थुम्मे नोले
17परमप्रभु यावेमी आं कली
18‘गे मुलाक्त मोआब ङा सांद आर सहर लाक्शा, लचा माल्नीनी। गन्ती २१:१३,१५
19मिनु गे अम्मोनी आन रागी जाक्दीत्नीनी। मेको नु लडाइ मपने। काइ मजिने। मारदे हना अम्मोनी आन रागी इन कली मगेनुङ। मेको लोत नु आ चच युइ आन कली गेतामी। उत्पत्ती १९:३८
20मेको रागी यो लाइश्शो कोल्शो मुर आन रागी बाक्त। ङोंइती मेकेर रेफाइम माइश्शो मुर बाक्तेक्म। तन्न अम्मोनीपुकीमी मेको आन कली जाम्जुम्मीम देंनीम।
21मेको शुश दुम्शो नु लाइश्शो अनाकीम ङा मुर खोदेंशो बाक्तेक्म। मिनु परमप्रभु यावेमी मेको आन कली अम्मोनी आन ङोंइती खतम सेल्तु। मिनु मेको नेल्ल आन कली खेरशा, अम्मोनी मेको आन बाक्तीकेम बाक्तेक्म।
22परमप्रभुम सेइरम बाक्ब एसाव आ खिं खिं ङा मुर आन पर्बम यो मोदेंशोन पाप्तु। मेको आन ङोंइती होरी आन कली खतम सेल्तु। मिनु होरी नेल्ल आन कली खेरशा, मुल सम्म एसाव आ खिं खिं ङा मुर मेकेर बाक्नीम।
23मिनु मेको मोदेंशो पा गाजा ङा काफ्तोर सहर रे जाक्शो काफ्तोरीपुकीमी आव्वीम सहर ङा मुर आन कली साइक्तेक्म। मिनु मेको आन बाक्तीकेमी बाक्तेक्म’ देंत। उत्पत्ती १०:१४; यहोसु १३:३
24मिनु परमप्रभुमी ‘बोक्कीन। गाक्चा गोने। मिनु अरनोन खोल्सा शोक्सीन। मारदे हना गो हेश्बोनम बाक्शो एमोरी आन पिप सीहोन नु आ रागी इन कली गेता। मेको इन के सेल्ना सेल्न लडाइ पने।
25मुलाक्त रे गो जात जात ङा मुर नेल्ल आन कली इन लोव़ नेंशा, इन क्येङा हिंशा, ख्रिंख्रि पाइब सेल्नुङमी’ देंत। प्रस्थान २३:२७
26मिनु गो केदेमोथ माइश्शो गोरशो रागी रे हेश्बोन ङा पिप सीहोन नु दुचा गारचा आ पर्बम मुरपुकी लोव़ पथ सोइक्ताक्ङमी। गन्ती २१:२१-२६
27मार लोव़ सोइक्ताक्ङमी देंशा हना ‘आंइ कली इन रागी रे लचा गेकी। गो एर ओंथ मपथु, ठेयब लां खोइश्शा गाक्नीकी।
28गे जचा थोव़क क्येट ताक्शा आंइ कली लेयङीन। ब्वाक्कु यो क्येट ताक्शा गेकी। आंइ कली गाक्तीक लां ला गेकी।
29मोपा सेइरम बाक्ब एसाव आ खिं खिं ङा मुरपुकीमी नु आर सहरम बाक्ब मोआबी ङा मुरपुकीमी गाक्चा गेम्तेक्म। परमप्रभु यावे, इं परमप्रभुमी गेशो यर्दन खोला आइक्ची हांबु ङा रागी जाक्दीचा सम्म लां गेने’ देंथ, मुरपुकी सोइक्ताक्ङमी।
30तन्न हेश्बोन ङा पिप सीहोनमी आंइ कली गाक्तीक लां मगेव। मारदे हना परमप्रभु यावे, इन परमप्रभुमी इन पा ङा लडाइ पा ग्राचा कली मेको आ थुं खकटा नु मटीब सेला बाक्त। मिनु मोदेंशो दुम्त। प्रस्थान ४:२१
31मिनु परमप्रभु यावेमी आं कली ‘गो सीहोन नु आ रागी इन कली जिम्मा गेचा गोव़ता। मेको आ रागी लडाइ पा आंम के के सेलीन’ देंत। यहोसु १०:१२; येरमीया २४:८; रोमी १:२४; रोमी ४:२५; ८:३२
32मिनु सीहोन नु आ मुर नेल्ल गोपुकी नु लडाइ पथ याहास माइक्तीकेमी जाक्तेक्म।
33मिनु परमप्रभु यावे, इं परमप्रभुमी मेको कली साइक्च, दे इं कली जिम्मा गेप्तु। मिनु गोपुकीमी मेको कली, मेको आ तौ नु मेको आ मुर नेल्ल आन कली साइक्तक।
34मेना गो मेको आन सहर नेल्ल आंइ के सेल्तक। आन मुर नेल्ल कली साइक्तक। वोंइश मुर, मीश मुर नु आल नेल्ल साइक्तक। का कली यो मप्रोंइथु, नेल्ल आन कली साइक्तक।
35गो आंइ ग्राशो सहर ङा मारेइ मारेइ आंम के सेल्शा, बी ब्यफ, क्यारश भेडा यो आंइ कली वोंइसाक्क।
36अरनोन खोल्सा ङा दिंमम बाक्ब आरोएर सहर रे गिलाद सम्म आंइ ग्राने मचाप्चा ङा सहर कान मबाक्म। परमप्रभु यावे, इं परमप्रभुमी मेको नेल्ल आंइ कली ग्राचा गेप्तु। यहोसु १३:९; २सामुएल २४:५
37यब्बोक खोल्सा आ नेक्था बाक्ब अम्मोनी आन रागी, पहाड ङा सहरपुकी नु परमप्रभु यावे, इं परमप्रभुमी इं कली मलचा देंशो रागी ला मलक।
