1“सरीङ, गो मार देंनुङा, नोफा दाइश्शा नेनो। रागीम, आं लोव़ नेनल। यसैया १:२
2आं अरेशो लोव़ रेउ खोदेंशो पा यीब। आं अरेशो लोव़ सीत खोदेंशो पा दोक्ब। कल्लो घांस तार भूस भुसे रेउ खोदेंशो पा नु सुवा आन तार ठेयब रेउ खोदेंशो पा यीब। यसैया ५५:१०-११
3मारदे हना गो परमप्रभु यावे आ नें ठेयब सेल्नुङ। इं परमप्रभु ठेयब बाक्ब।
4मेको सेरथे फुल्लु बाक्ब। मेको आ गेय नेल्ल क्येङा रिम्शो बाक्ब। आ लां नेल्ले ठीक बाक्नीम। मारदे हना मेको आ देंशो पाइब परमप्रभु बाक्ब। जोल मपाइब, कुल मकोव़ब नु ठीक पाइब बाक्ब।
5तन्न मेको पाला ङा मरिम्शो दुम्शो मुरपुकीमी मेको कली मरिम्शो पाम्तेक्म। मेको दूली पाइब नु हेंथे गाक्ब ला ङा बाक्नीम। यसैया १:२-४; मत्ती १७:१७
6मूर्ख नु निप्स मपाइश्शो मुरपुकी, मार, गे परमप्रभु यावे कली क्येक्क लेत्नीनी? मार, इन कली सेल्ब इन आफ मेको ममाइ ङा? मेको इन कली सेल्ब नु वोइक्ब बाक्ब।
7साइ ङोंइती ङा नाक्त मिम्तीन। साइ ङा बर्स कली मिम्तीन। इन आफ कली हिल्लो पने। मिनु मेकोमी इन कली शेंनीम। इन खाल्पा आन कली हिल्लो पने। मेकोमी इन कली देंनीम।
8नेल्ल क्येङा ठेयबमी रागी रागी ङा मुर आन कली आन रागी गेप्तु। मेकोमी मुर नेल्ल आन कली शुश खाल ङा सेल्तु। मेना इस्राएली आन थर ङा खिं खिं ङा मुर कोव़शा, आन सांद योक्शा गेप्तु। उत्पत्ती ११:८; प्रेरित १७:२६
9मिनु परमप्रभु यावे आ भाग आ मुरपुकी बाक्तेक्म। याकूब आ मुर आन भाग आ योव़शो रागी बाक्त।
10मेकोमी याकूब कली सुइ मबाक्शो रागीम थुल्तु। गोरशो रागीमी कोव़शा थुल्तु। मिनु मेकोमी मेको कली आ एर ओंथ नेल्ल रे कोव़तु। मिनु मेको कली आ मिक्च कली खोदेंशो पा होस पा कोव़तु। भजन संग्रह १७:८; इजीकीएल १६:१०-१४; जकरिया २:१२
11आंम चाइक्ब कली रिम्शो कोव़शा जचा गेब, फ्रां प्राक्शा चाइक्ब कली पुप्ब नु आ फ्रांम इर कुरब ककाकुली खोदेंशो पा, प्रस्थान १९:४
12परमप्रभु यावेमी मेको कली लां कोंइताक्व। मेको नु अर्को तेकोइ देवता मबाक्म।
13मेकोमी मेको कली नेल्ल क्येङा रिम्शो रागीम वोइक्तु। मेकोमी रूम शोक्शो थोव़कीम थुल्तु। मिनु मेको कली रोंगु ङा खुदो नु फुल्लु रे तेल जचा गेप्तु। भजन संग्रह ८१:१७
14मिनु बी आन दूध के दहि, भेडा आन दूध नु पाठा नु सांड आन बोंसो ब्वचा गेप्तु। बाशान ङा ब्यफ नु क्यारश आन श्ये ब्वचा गेप्तु। नेल्ल क्येङा रिम्शो चेरब फस जशा, अङगुर शांबु तूशा बाक्ते।
15मिनु येशुरुनमी दोम्शा ताइक्तु। गे दोम्ते। गे दोम्शा, ठेयब लेश्शो दुम्ते। मेकोमी आ कली सेल्ब परमप्रभु कली प्रोंइतु। मिनु आ श्येत रे प्रोंइब सेरथे फुल्लु, कली प्रोंइतु। येशुरुन याकूब-इस्राएल कली मान पतीक नें बाक्ब।ब्यवस्था ३३:५,२६; यसैया ४४:२; ब्यवस्था ३१:२०; नेहेम्याह ९:२५
16मिनु मेकोपुकीमी अर्को देवी देवता आन कली ठेयब सेल्शा, मेको कली गेहे पपाइक्तेक्म। मेकोपुकीमी ग्रांग्रा दिचा ङा थोव़कीम पतीके मेको कली गाइक्पाइक्तेक्म।
17मेकोपुकीमी परमप्रभु कली ममाइ, वोल आन कली चढ़ेम्तेक्म। आन ङोंइती मतुइश्शो देवी देवता आन कली चढ़ेम्तेक्म। आन किकी पिपीमी महिंशो नक सेल्शो देवी देवता आन कली चढ़ेम्तेक्म।
18मिनु गे इन कली सेल्ब सेरथे फुल्लु कली ममिम्तीनी। इन कली थीब परमप्रभु यावे कली प्रेंताक्नी। उत्पत्ती ४९:२४; भजन संग्रह १८:३२; भजन संग्रह ७८:१५-१६
19मिनु परमप्रभु यावे मेको तशा रुश पाप्तु। मारदे हना आ तमी तौपुकीम मेको कली आइक्च सेल्तेक्म।
20मिनु मेकोमी ‘गो मेको आन कली वारच मपाइनुङ। मेको दोपा बेक्नीमी, मेको कोव़नुङ। मारदे हना मेको दूली पाइब पाला ङा मुर बाक्नीम। मेको थमा मसुइक्चा ङा बाक्नीम।
21देवी देवता आन पर्बमी आं कली रुश पपाइक्नीम। मूर्ति पूजा पा आं कली गाइक्ब सेल्तीमी। मोपतीके गो ङोन ङा मुर आन कली आंम के सेल्शा, एको आन कली रुश पपाइक्नुङ। रागी ङा मतुइक्ब मुर आन कली गुप्शा, मेको आन कली गाइक्पाइक्नुङ। भजन संग्रह ७८:५८; येरमीया २:११; रोमी १०:१९
22मारदे हना आं गाइक्चा मी खोदेंशो पा ब्रशो बाक्ब। रागी आगा सम्म ब्राइब। रागी नु मेकेर बाक्शो नेल्ले नेक्ब। मेकोमी डांडा आन जग नेल्ल नेक्ब।
23गो मेको आन कली शुश श्येत गेनुङ। गो मेको आन कली ब्रा आप्नुङ। दोपा आप्नुङ देंशा हना,
24बेक्चा ङा शोव़लु, शुश नाप्शो जोरो, मुर कली साइक्ब रोइ नु मेको आन कली ब्रुप्शा ब्वाइब जन्तुपुकी नु खपीम ग्रेशा गाक्ब बीस पाइश्शो बुस्सपुकी सोइक्नुङ।
25लां लांमी तरवारम मेको आन कली रोम रोइक्च सेल्नुङ। खिं खिंम राम्शी पोक्नुङ। ठिटा ठिटी, दूध तूब आल, चां बोइश्शो नेल्ल आन कली खाल का ङा पाइनुङ। इजीकीएल ५:१७; इजीकीएल १४:२१
26गो मेको आन कली ङोन ङोन सम्म ब्रापाइक्नुङ। गो मेको आन कली मुर आन दातेम ममिम्पाइक्नुङ।
27तन्न आन जोरी सत्रुपुकीमी दूली मिम्शा “गोपुकीमी इं सक्तिम ग्रातय। एको परमप्रभु यावे आ पशो ममाइ” देंनीम। मिनु आं कली गाइक्पाइक्नीम।
28मारदे हना मेकोपुकी रागी ङा निप्स मपाइश्शो मुर नम। मेकोपुकी नु मारेइ रुप्तीक थुं मबाक्ब। यसैया २७:११; येरमीया ४:२२
29मेकोपुकी निप्स पाइश्शो नम हना, एको लोव़ रुबेम वा। मेको आन बेक्तीक तुइक्तेम वा।
30मेको आन सेरथे फुल्लुम मेको आन कली लेयने थुम्शो बाक्ब। परमप्रभु यावेमी मेको आन कली प्रोंइने थुम्शो बाक्ब। मोपतीके मुर कामी हजार का आन कली खेदा पाप्तु। मुर निक्शीमी १० हजार आन कली खेदा पने चाप्नीसी। लेवी २६:३६-३७; यसैया ३०:१७
31इं जोरी सत्रुमी “मेको आन सेरथे फुल्लु आंइ सेरथे फुल्लु खोदेंशो ममाइ” दे लोव़ पाम्तेक्म। ब्यवस्था ३२:४,३७
32मारदे हना मेको आन अङगुर सोदोम ङा अङगुर बाक्नीम। मेको गोमोररा ङा अङगुर रू रे दुम्शो बाक्नीम। मेको आन अङगुर बीखम ब्रीशो बाक्नीम। मेको आ गेडा कशो बाक्नीम।
33मेको आन अङगुर बुस्स आ बीस नु साइक्चा ङा बीख बाक्ब।
34गो एको मिम्शा वोइश्शो बाक्नुङ। आं वोइक्तीकेमी छाप थोक्शा वोइश्शो बाक्नुङ। ब्यवस्था २९:२८
35सजाइ नु क्येक्क लेत्तीक आं के बाक्ब। मिनु ग्रेक्शा थित्तीक नाक्त नु आन बेक्तीक नाक्त जाक्चा चिक्शो बाक्ब। मेको आन खतम दुम्तीक नाक्त जाक्चा चिक्शो बाक्ब। भजन संग्रह ९४:१; रोमी १२:१९; हिब्रू १०:३०
36परमप्रभु यावेमी आ मुर आन कली थमा पा वारच पाइब। आ मुर आन कली शिशी पाइब। मेको आन सक्ति लत हना, मुर नु वाइलीम वाइल यो खतम दुम्नीम।
37मेको आन देवी देवता ते बाक्नीमी? मेको आन ख्रुइक्तीक सेरथे फुल्लु ते बाक्बा ङा? ब्यवस्था ३२:३१
38आन क्योरशा चढ़ेतीके ङा बोंसो सुमी ब्ववा? मिनु तूचा थोव़क चढ़ेतीके रे सुम तूङा? मेकोपुकी बोक्शा इन कली वारच पामेक्ल। मिनु इन कली प्रोन्मेक्ल। न्यायाधीस १०:१४; येरमीया २:२८
39मुल कोव़ङीन, गो ला परमप्रभु नङ। आं क्येङा लाक्शा सुइ परमप्रभु मबाक्ब। गो साइक्ब नु ब्रोंइपाइक्ब नङ। गो गार सेल्ब नु सापाइक्ब नङ। आं गुइ रे ब्रोंइब सुइ मबाक्ब। ब्यवस्था ४:३५; यसैया ४५:५; १सामुएल २:६; प्रस्थान १५:२६; अय्युब ५:१८; होसे ६:१-२
40मिनु गो आं गुइ सरीङ गे पोक्शा, गो गेना हना यो ब्रोंइशा बाक्शो खोदेंशो पा कसम जाइनुङ।
41गो आं टल्केशो या शेप्ता हना, आं गुइमी निसाफ पचा कली ग्याइक्ताक्ङ हना, आं जोरी सत्रु आन कली क्येक्क लेत्नुङ। आं कली काइ मदाक्ब आन कली क्येक्क लेत्नुङ। येरमीया ४६:१०
42आं ब्रा आन कली ग्याइश्शा साइश्शो मुर आन हुशेमी गिल्नुङ। आं या लाइश्शो चां पाइश्शो आं जोरी सत्रु आन श्ये ब्वाइब खोदेंशो सेल्नुङ’ दे परमप्रभुमी देंत।
43गे रागी रागी ङा मुरपुकी, ग्येरसीशो मेको आ मुर बाक्नीनी। मिनु नेल्लेमी परमप्रभु कली मान पने। मारदे हना मेकोमी आ गेय पाइब आन हुश आ क्येक्क लेप्ब। आ मुर आन कली मरिम्शो पाइब आन कली क्येक्क लेप्ब। मिनु मेको आन कली काइ मदाक्ब आन कली क्येक्क लेप्ब। मिनु मेकोमी आ मुर आन रागी कली लेंशा रिम्शो सेल्ब” दे मोसामी कुम्सो पाप्तु। रोमी १५:१०; ब्यवस्था २१:८; गन्ती ३५:३३-३४
44मिनु मोसा नु नून आ तौ यहोसु मुर आन ङोंइती एको कुम्सो ङा लोव़ नेंपाइक्ताक्स।
45मिनु मोसामी इस्राएली नेल्ल आन कली एको लोव़ नेंपाइक्ने थुम्शा,
46मेको आन कली “मुलाक्त गे इन कली आं देंशो लोव़ नेल्ल इन थुंम वोतीन। इन तमी तौ आन कली देनीन। गे मेको आन कली ‘मेको अरेशो लोव़ नेल्ल होस पा पचा माल्नीनी’ दे मतीन। ब्यवस्था ६:७
47मारदे हना एको इन कली आइक्च लोव़ ममाइ। एको इन ब्रोंइतीक बाक्ब। एको पशा, गेपुकी यर्दन शोक्शा इन के सेल्शो रागीम शुश नाक्त ब्रोंइनीनी” दे माइक्तीमी। लेवी १८:५
48मिनु मेको नाक्ती परमप्रभु यावेमी मोसा कली
49“गे अबारीम डांडा ङोंइसो। यरीको आ नेक्था मोआब रागीम बाक्शो नेबो डांडा ङोंइसो। मिनु गो इस्राएली आन कली गेशो कनान रागी नेल्ल कोव़ङो। गन्ती २७:१२; गन्ती ३३:४८
50मिनु दोपा इ लोक्ब हारून होर डांडाम बेक्मे नु आ किकी पिपी आ मुर आन बाक्तीक लमे, मोपा गे मेको इ ङोइश्शो डांडाम बेक्नेवे। मिनु बेक्शा इ किकी पिपी आन बाक्तीक लाइनेवे। गन्ती २०:२३-२९
51मारदे हना गे निक्शीमी जीन ङा गोरशो रागी मेरीबाथ-कादेशमी आं ब्वाक्कु आ नेक्था इस्राएली आन दातेमी आं कली थमा मसुइक्यीसी। आं कली टिचा माल्नीम, दे इस्राएली आन ङोंइती मकोंइथु, आं कली ठेयब मसेल्सी। गन्ती २०:१२-१३
52गे आं इस्राएली आन कली गेशो रागी ङोन रे ताप्तीवी हना यो, गे मेकेर लचा मताइनेवे” दे परमप्रभु यावेमी मोसा कली देंत।
