Text copied!
CopyCompare
परमप्रभु यावे आ लोव़ - ब्‍यवस्‍था

ब्‍यवस्‍था 13

Help us?
Click on verse(s) to share them!
1मिनु मोसामी “इन दातेमी परमप्रभु यावे आ लोव़ पाइब, ङोमु शेंब ‘चिन्‍ड नु छ‍क लाक्‍चा ङा गेय दुम्‍ब’ देंब।
2मिनु आन देंशो खोदेंशो पा दुम्‍शा मेकोपुकीमी ‘गोपुकी आंइ ङोंइती मतुइश्‍शो देवी देवता आन नोले खोइय्‍या। मेको आन कली ठेयब सेल्य‍’ दे लोव़ पाम्‍तेक्‍म हना,
3गेपुकीमी मेको परमप्रभु यावे आ लोव़ पाइब, ङोमु शेंब, आन लोव़ काइ मनेनीन, मटिने। मारदे हना परमप्रभु यावे, इन परमप्रभुमी गे इन थुं नु सोक्‍त नेल्‍लेमी परमप्रभु यावे, इन परमप्रभु कली दाक्‍नीनी देय मदाक्‍नीनी, दे इन थुं नाक्‍शो बाक्‍ब।
4गेपुकी परमप्रभु यावे, इन परमप्रभु कली ला खोतीन। मिनु मेको कली ला मान पा हिनीन। मिनु मेको आ शेंशो पचा माल्‍नीनी। मेको आ देंशो टिशा, मेको कली गेय पशा, मप्रोंइथु बाक्‍कीन। ब्‍यवस्‍था ८:२
5मिनु गेपुकीमी परमप्रभु यावे आ लोव़ पाइब मेको ङोमु ङा लोव़ शेंब कली साइक्‍चा माल्‍नीनी। मारदे हना मेकोमी परमप्रभु यावे, इन परमप्रभु कली प्रोंइपाइक्‍चा, दे इन कली दूली शेंताक्‍व। मिनु इन कली वाइलीम वाइल दुम्‍तीके रे इजीप्‍त रे ग्रुंइशा एक चाक्‍ब परमप्रभु यावे, इन परमप्रभु बाक्‍ब। मोदेंशो मुरपुकीमी इन कली परमप्रभु यावे आ कोंइ‍शो लां रे हेंथे गाक्‍पाइक्‍चा दाक्‍नीम।
6मिनु सुइमी इ कली ख्रुइश्‍शोमी हें‍थे गाक्‍चा कली लेम्‍ब, मेको इ लोक्‍ब बाक्‍त हना, इ आफ आ तौ बाक्‍त हना, इ आंम आ तौ बाक्‍त हना, इ आंम आ तमी बाक्‍त हना, इ दाक्‍शो मीश बाक्‍त हना, इ शुश दाक्‍शो वारच बाक्‍त हना, नु मेकोमी ‘गे नु इ किकी पिपीमी मतुइश्‍शो देवी देवता आन कली सेउ पय’ देंतेक्‍म हना, ब्‍यवस्‍था १८:२०; १कोरिन्‍थी ५:९,१३
7इन एर ओंथ बाक्‍शो जात जात ङा इन नेक्‍था रागी ङा बाक्‍ल कि ङोन रागी ङा बाक्‍ल आन देवी देवता बाक्‍तेक्‍म हना यो,
8मेको लेम्‍ब आ लोव़ मनेंचा, आ देंशो मटिचा। गे मेको कली शिशी मपथु, मेको कली मख्रुइक्‍थु,
9मेको कली थमा पा साइक्‍चा माल्‍नीनी। मिनु गे नेल्‍ल क्‍येङा ङोंइती मेको कली साइक्‍च, दे आप्‍चा माल्‍नेवे। नोले ला इ मुर नेल्‍लेम आप्‍शा साइक्‍चा माल्‍नीनी।
10मिनु नेल्‍लेमी मेको कली मबेक्‍म सम्‍म फुल्‍लु आप्‍चा माल्‍नीम। मारदे हना इन वाइलीम वाइल दुम्‍तीके इजीप्‍त रे ग्रुंइब परमप्रभु यावे, इन परमप्रभु रे हेंथे गाक्‍ब सेल्‍चा माल्‍शो बाक्‍त। ब्‍यवस्‍था १७:७
11मिनु इस्राएली नेल्‍ल मेको नेंशा, हिंचा माल्‍नीम। मिनु इन दातेमी मोदेंशो मरिम्‍शो गेनायो मपमेक्‍ल।
12मिनु परमप्रभु यावे, परमप्रभुमी इन कली बाक्‍चा कली गेशो सहर काम
13इन दाते रे मरिम्‍शो वोंइश मुरपुकी बोक्‍शा, सहर ङा मुर आन कली दूली पपाइश्‍शा, मेकोपुकीमी ‘लय, देवी देवता आन कली पूजा पय’ देंतेक्‍म हना, गेपुकी मेको देवी देवता गेनायो मतुइश्‍शो बाक्‍तीनी हना,
14गेपुकीम रिम्‍शो पा खोदील निदील पा हिल्‍लो पचा माल्‍नीनी। मिनु मेको मरिम्‍शो थमा पा इन दातेमी पशो बाक्‍त हना,
15गेपुकीमी मेको सहर ङा मुर आन कली थमा पा क्‍योरशा साइक्‍चा माल्‍नीनी। मेको सहर नेल्‍ल कली खतम सेल्‍चा माल्‍नीनी। मिनु मेकेर बाक्‍शो बी ब्‍यफ, क्‍यारश भेडा नेल्‍ल यो साइक्‍चा माल्‍नीनी।
16मेकेर बाक्‍शो मारेइ मारेइ, मेको सहर आ दातेम खुप्‍चा माल्‍नीनी। मिनु मेको खुप्‍शो नु सहरम मी सुइक्‍तीन। मेको परमप्रभु यावे, इन परमप्रभु कली चोशा चढ़ेशो खोदेंशो दुम्‍ल। मेको सहर गेना हना यो फोहोर ताइक्‍तीके दुम्‍ल। मिनु मेको सहर कली लेंशा मसेलीन। ब्‍यवस्‍था २०:१६-१८
17मिनु गेपुकीमी मथिचा देंशो थोव़क मारेइ मलतीन। मिनु परमप्रभु यावे आ गाइश्‍शो नाइक्‍ब कों, इन कली शिशी पा दाक्‍ब। इन किकी पिपी नु कसम जशो खोदेंशो पा इन कली शुश सेल्‍ब।
18गेपुकी परमप्रभु यावे, इन परमप्रभु आ देंशो टीतीनी, मुलाक्‍ती गो इन कली देंशो आं शेंशो नेल्‍ल पाइतीनी हना, गेपुकी परमप्रभु यावे, इन परमप्रभु आ ङोंइती ठीक पाइब दुम्‍नीनी” देंत। यहोसु ७:-