1मिनु मोसामी इस्राएली नेल्ल आन कली एको लोव़ नेंपाइक्तु।
2मिनु मेकोमी “मुलाक्ती गो सहे का २१ बर्स गाप्ती। गो मुल रे इन कली लां कोंइने मचाप्नुङ। मिनु परमप्रभु यावेमी आं कली ‘गे मेको यर्दन मशोक्नेवे’ दे माइक्ती। प्रस्थान ७:७; गन्ती २०:१२
3परमप्रभु यावे, इन परमप्रभु इन ङोंइती यर्दन शोक्शा, आइक्ची हांबु लाइब। मेकोमी इन ङोंइती मेको रागी रागी ङा मुर आन कली क्याम्ब। मिनु गेपुकीमी मेको आन कली खेरने चाप्नीनी। मिनु परमप्रभु यावेमी देंशो खोदेंशो पा यहोसु इन ङोंइती शोक्ब। ब्यवस्था ३:२२
4मिनु परमप्रभु यावेमी मेको एमोरी आन पिप सीहोन नु ओग नु आन रागी खतम पोक्शो खोदेंशो पा, मेको आन कली यो खतम पोक्ब। गन्ती २१:२१-३५
5मिनु परमप्रभु यावेमी मेको आन कली इन जिम्मा गेब। गो इन कली माइश्शो परमप्रभु यावे आ शेंशो खोदेंशो पा नेल्ल गेपुकीमी मेको आन कली पचा माल्नीनी। प्रस्थान २३:३२-३३
6बोल्यो नु महिंब दुमीन। मेको आन कली तशा महिनीन मारदे हना परमप्रभु यावे, इन परमप्रभु गेपुकी नु लाइब। मेकोम इन कली कोव़शा, मप्रोंइब” दे मोसामी देंत। ब्यवस्था १:२९-३०
7मिनु मोसामी यहोसु कली ब्रेश्शा, इस्राएली नेल्ल आन ङोंइती “बोल्यो नु महिंब दुमो। मारदे हना परमप्रभु यावेमी मेको इन किकी पिपी आन कली कसम जशा ‘मेको रागी इन कली गेनुङ’ देंशो बाक्त। मिनु गे मेको रागी मेको आन कली योक्शा गेनीनी। ब्यवस्था ३:२८; यहोसु १:६
8मिनु परमप्रभु यावे इ ङोंइती लाइब। मेको गे नु बाक्ब। मेकोम इन कली कोव़शा, मप्रोंइब। महिनीन नु मेको आन कली तशा इन थुं लुक्च मलने” दे मोसामी यहोसु कली देंत।
9मिनु मोसामी परमप्रभु आ अरेशो लोव़ ब्रेक्शा, चढ़ेब, लेवी आ थर ङा मुर नु इस्राएली आन खाल्पा आन कली गेम्तीमी। मिनु लेवी आ थर ङा मुरपुकीमी चहिं परमप्रभु यावे आ सल्ला पतीक सन्दोस कुरशो बाक्तेक्म।
10मिनु मोसाम मेको आन कली “७ बर्स ङा प्रोंइतीक बर्समी गोठ सेल्तीक चाडमी ब्यवस्था १५:१; ब्यवस्था १६:१३
11नेल्ल इस्राएली परमप्रभु यावे, इन परमप्रभु आ योव़शो बाक्तीकेमी मेको अरेशो लोव़ इस्राएली नेल्ल आन ङोंइती पढेचा माल्नीनी।
12गेपुकीमी वोंइश मुर, मीश मुर, आलपुकी नु इन सहरम बाक्शो अर्को रागी ङा मुर नेल्ल आन कली खुप्चा माल्नीनी। मिनु मेकोपुकीमी मेको अरेशो लोव़ नेंशा, शेंशा, परमप्रभु यावे, इन परमप्रभु कली मान पा हिंब दुम्चा माल्नीम। मिनु एको अरेशो लोव़ नेल्ल तुइश्शा पचा माल्नीम।
13मिनु एको अरेशो लोव़ मतुइक्ब, आन आलपुकीमी यो नेंशा रुप्शा, परमप्रभु यावे, इन परमप्रभु कली मान पा हिंचा शेंचा माल्नीम। गेपुकीमी यर्दन खोला आ आइक्ची हांबु इन के सेल्शो रागीम बाक्ची ना मोदेंशो पचा माल्नीनी” दे माइक्तीमी।
14मिनु परमप्रभु यावेमी मोसा कली “मुल इ बेक्ची नाक्ती जाक्शो बाक्ब। मोपतीके यहोसु कली ब्रेश्शा, मेको कली इ गेय जिम्मा गेनुङ। मोपतीके ग्रुम्तीक ताम्बुम जाक्शा, राप्शा बाक्कीस” देंत। मिनु मोसा नु यहोसु लशा ग्रुम्तीक ताम्बुम राप्शा बाक्ताक्स।
15मिनु परमप्रभु यावे ग्रुम्तीक ताम्बुम गोस्स के थामम ग्रूत। मिनु गोस्स के थाम ताम्बु आ ओव़तीकेमी बाक्त। प्रस्थान ३२:९
16मिनु परमप्रभु यावेमी मोसा कली “गे इ किकी पिपी नु बाक्चा चिक्शो बाक्नेवे। गे बेक्ङे नोले मेको मुर आन लशो रागीम जाक्दीश्शा, मेको रागी ङा आन मतुइश्शो देवी देवता आन कली खोइक्नीम। आं कली प्रोंइशा, गो नु पशो कबल क्याम्नीम।
17मिनु गो मेको नाक्त मेको आन पर्बम शुश गाइक्नुङ। मिनु गो मेको आन कली प्रोंइशा, मेको आन कली वारच मपाइनुङ। मेकोपुकी रोइक्चा पुंइसीनीम। मिनु मेकोपुकीमी शुश मरिम्शो दुम्शा, ठेयब श्येत जाइनीम। मिनु मेको नाक्त मेकोपुकीमी ‘इं परमप्रभु गोपुकी नु मबाक्तीके इं कली मोदेंशो दुम्शो बाक्ब’ देंनीम।
18मिनु मेकोपुकी शुश मरिम्शो पा, देवी देवता आन नोले खोइक्ब दुम्नीम। मोपतीके गो मेको आन कली वारच मपाइनुङ।
19एको कुम्सो ब्रेक्तो। मिनु इस्राएली आन कली शेंदो। मेको रिम्शो तुइक्पतो। मारदे हना मेको कुम्सो इस्राएली आन पर्बम आं सांकछी दुम्चा माल्ब। ब्यवस्था ३२:१-४३
20गो मेको आन किकी पिपी आन कली गेनुङ, दे कसम जशो दूध नु खुदो शुश बाक्शो रागी मेको आन कली गेनुङ। मिनु मेकोपुकी जशा ब्वशा, रूशा दोम्नीम। मिनु मेकोपुकीमी देवी देवता खोइश्शा, मेको आन गेय पाइनीम। आं कली चहिं आइक्च सेल्नीम गो नु आं कबल क्याम्नीम।
21मिनु मेको मरिम्शो दुम्शा, शुश श्येत जाम्तेक्म हना, मेको कुम्सो मेको आन पशो आ पर्बम आं सांकछी दुम्ब। मारदे हना आन चच युइ मेको कुम्सो शेंसीशा, तुइश्शो बाक्नीम। ‘मेको आन कली गेनुङ’ दे कसम जशो रागीम चाक्चा क्येङा ङोंइती आन मिम्तीके दूली बाक्ब, दे तुइक्नुङ” दे परमप्रभु यावेमी मोसा कली देंत। भजन संग्रह १३९:२
22मिनु मेको नाक्ती मोसामी एको कुम्सो ब्रेक्शा, इस्राएली आन कली शेंताक्मी।
23मिनु परमप्रभु यावेमी नून आ तौ यहोसु कली अरेशा “बोल्यो नु महिंब दुमो। मारदे हना ‘मेको आन कली गेनुङ’ देंशो रागीम गे इस्राएली आन कली चाक्दीत्चा माल्नेवे। मिनु गो गे नु बाक्नुङ” देंत।
24मिनु मोसामी मेको अरेशो लोव़ किताबम ब्रेक्ने थुम्शा नोले
25मेकोमी परमप्रभु यावे आ सल्ला पतीक सन्दोस कुरब लेवी आ थर ङा मुर आन कली
26“एको अरेशो लोव़ ङा किताब लाइश्शा, परमप्रभु यावे, इन परमप्रभु आ सल्ला पतीक सन्दोस आ नेक्था वोतीन। मोदेंशो पा मेको आन पर्बम सांकछी दुम्शा बाक्ब। यूहन्ना ५:४५
27मारदे हना गो इन मरिम्शो पतीक नु इन मटितीके तुइक्नुङ। गो मुल सम्म गेपुकी नु बाक्शा यो, गेपुकी परमप्रभु यावे कली गन गन पा मटीब बाक्तीनी। गो बेक्ङा नोले दोशो मरिम्शो पाइनीनी?
28मिनु गे इन थर थर ङा खाल्पा नु ठेयब मुर नेल्ल आं बाक्तीकेम ब्रेश्शा खुम्सीन। मिनु गो मेको आन कली एको लोव़ नेंपाइक्नुङमी। मिनु मेको गो सरीङ नु रागी आन पर्बम सांकछी वोइक्नुङ। ब्यवस्था ३२:१
29मारदे हना गो बेक्ङा नोले गेपुकी थमा पा दूली पाइब दुम्नीनी। मेको गो तुइक्नुङ। मिनु गेपुकी आं अरेशो लां रे ङोन लाइनीनी। मिनु गेपुकीमी परमप्रभु यावे आ ङोंइती मरिम्शो पाइनीनी। मिनु मेको इन पतीकेमी मेको कली गाइक्पाइक्नीनी। नोले ङा नाक्तीमी इन कली शुश श्येत दुम्ब” देंत।
30मिनु मोसामी इस्राएली नेल्ल आन ङोंइती एको कुम्सो थुम्चा सम्म नेंपाइक्तीमी।
