DEUTERONOMI 27

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

¹Bena Mose bona Israel tau-badadia ese Israel taudia e haḡanidia, eto: Hari dina ai na henimuimu haheḡanidia ba badinadia.

²Ioridane sinavaina ba hanaia, Iehova, emui Dirava, ese baine henimui tanona ai ba raka vareai, dinana ai, huro nadidia badadia ba hagini, bona taba-taba ḡaunaamo bae tabaia ahu.

³Ina taravatu herevadia iboudiai na latadiai ba tore, ba hanai negana ai. Unu amo Iehova, emui Dirava, ese baine henimui tanona bavabia, rata bona bada-ranuna e arumu tanona, Iehova, senemuiedia Dirava, ese vada e gwau henimui hamata heḡereḡerena.

⁴Ioridane sinavaina ba hanaia, bena hari na haḡanilaimuimu nadidia ba haginidia, Ebal ororona ai; bena taba-taba ḡauna amo ba tabaia ahu.

⁵Bona Iehova, emui Dirava, ena ihaboulaina patana nadi amo ba larebaia unuseni ai; auri amo asie utudia nadidia.

⁶Asie utu nadidia amo Iehova, emui Dirava, ena ihaboulaina patana ba larebaia; bena una pata latanai ḡole-oho bouboudiaba hahelaḡadia, Iehova, emui Dirava, ena.

⁷Herohemaino bouboudia danu ba hahelaḡadia. Unuseni ai danu bavaniani bona ba moale hebou, Iehova, emui Dirava, vairanai.

⁸Huro nadidia ai ina taravatu herevadia iboudiai ba tore hedinarai.

⁹Bena Mose bona hahelaḡa taudia Levi iduhuna amo ese Israel taudia iboudiai e hereva henidia, eto: Israel taumui e, eremui. A hakala. Hari dina ai umui na Iehova, emui Dirava, ena bese ai vada ola.

¹⁰Taunabunai, Iehova, emui Dirava, gadona ba kamonai; ena haheḡani bona ena taravatu hari ina dina ai na henimuimu vada ba badinadia.

¹¹Una dina ai danu Mose ese Israel taudia e hamaorodia, eto:

¹²Ioridane sinavaina ba hanaia, bena ini na Gerisim ororona ai bae gini, taunimanima bae hanamodia: Simeon bona Levi bona Iuda bona Isakara bona Iosef bona Beniamina.

¹³Ma iduhu ikwaradia bini Ebal ororona ai bae gini, heuduguirai herevadia bae gwaurai: Ruben bona Gad bona Asere bona Sebulun bona Dan bona Napatali.

¹⁴Bena Levi taudia na bae hereva badabada, Israel taudia iboudiai bae hamaorodia, baeto:

¹⁵Laulau ta au amo eiava nadi amo eiava auri amo e koroamu tauna na.bae uduguiraia. Unuhetomana, taunimanima imadia amo e karaiamu bona gabu hehunina ai e haginiamu, be Iehova ese e dadaraiamu. (Bena taunimanima iboudiai bae haere, baeto “Amen”.)

¹⁶Tamana bona sinana se matauraidiamu tauna na bae uduguiraia. (Bena taunimanima iboudiai baeto “Amen”.)

¹⁷Dekena tauna ena tano hetoana e raḡaiamu tauna na bae uduguiraia. (Bena taunimanima iboudiai baeto “Amen”.)

¹⁸Matakepulu tauna e koiamu, dala amo e hakaua sirimu, tauna bae uduguiraia. (Bena taunimanima iboudiai baeto “Amen”.)

¹⁹Idau tauna enai eiava ihareha enai eiava vabu enai hahemaoro e hagagevaiamu tauna na bae uduguiraia. (Bena taunimanima iboudiai baeto “Amen”.)

²⁰Tamana adavana ida e eno boumu tauna na bae uduguiraia, badina be ia ese tamana vada e haida hahemaraia. (Bena taunimanima; iboudiai baeto “Amen”.)

²¹Mauri ḡauna idauna ta ida e eno boumu tauna a na bae uduguirai. (Bena taunimanima iboudiai baeto “Amen”.)

²²Taihuna, tamana natuna eiava sinana natuna, ida e eno boumu tauna na bae uduguiraia. (Bena taunimanima iboudiai baeto “Amen”.)

²³Rava bada hahinena ida e eno boumu tauna na bae uduguiraia. (Bena taunimanima iboudiai baeto “Amen”.)

²⁴Dekena tauna e alaia mase hehunimu tauna na bae uduguriaia. (Bena taunimanima iboudiai baeto “Amen”.)

²⁵Dava e abiamu, asi ena kerere tauna baine alaia mase totona, tauna na bae uduguiraia. (Bena taunimanima iboudiai baeto “Amen”.)

²⁶Ini taravatu herevadia se abi daemu bona se badinamu tauna na bae uduguiraia. (Bena taunimanima iboudiai baeto “Amen”.)