1मिनु परमप्रभु यावे, इन परमप्रभुमी इन कली गेशो इन के सेल्चा चिक्शो रागी ङा दिंम मेर बेक्शो मुर का थित्तीनी नु मेको साइक्ब मुर मतुंइसाक्व हना,
2इन खाल्पा नु निसाफ पाइबपुकी लशा, मेको साइश्शो मुर तेको एर ओंथ ङा सहर क्येङा नेक्था बाक्बा, पुक्चा माल्नीम।
3मिनु मेको आ नेल्ल क्येङा नेक्था ङा सहर आ खाल्पापुकीमी गेय मपपाइश्शो नु हलो मवाक्शो बी बाछा का चाक्चा माल्नीम।
4मिनु मेको खाल्पापुकीमी मवाक्शो नु वांचेर मशोक्शो रू नु गेना हना यो ब्वाक्कु बाक्शो खोला आ नेक्था लाइश्शा, मेको बाछा आ शुर रोप्चा माल्नीम।
5मिनु चढ़ेब, लेवी आ तौपुकी मेको आ नेक्था जाक्चा माल्नीम। मारदे हना परमप्रभु यावे, इन परमप्रभु आ गेय पचा नु आ नेंमी आसीक गेचा कली योव़तु। मिनु जिशो खेशो बाक्त हना, मेको आन देंशो पचा माल्नीम। ब्यवस्था १७:८-९
6मिनु मेको साइश्शो मुर आ सहर नेक्था ङा खाल्पापुकी मेको शुर रोप्शा साइश्शो खोला ङा बी तार आन गुइ चिक्सीमल। मत्ती २७:२४
7मिनु मेकोपुकीमी “गोपुकी आंइ गुइमी हुश ख्राक्श मपोक्शो। सुम पवा मेको यो मतुइश्शो।
8मोपतीके परमप्रभु यावे इन श्येत रे प्रोंइशो इन मुर इस्राएली आंइ पाप क्याम्दीन। इन मुर इस्राएली आन दातेमी एको दोस मतशो मुर कली पोक्शो हुश ख्राक्श आ पाप गो आंइ दातेमी मलील” दे पुंइचा माल्नीम। मिनु मेको हुश ख्राक्श पोक्तीके पाप क्याम्सीब।
9मोपा गेपुकीमी दोस मतशो मुर कली साइक्चा पुंइसीतीके इन दाते रे ग्रुंइचा माल्नीनी। मारदे हना गेपुकीमी परमप्रभु यावे आ ङोंइती ठीक पचा माल्नीनी। गन्ती ३५:३३
10मिनु गेपुकीमी लडाइम लनीनु, परमप्रभु यावे, इन परमप्रभुमी इन जोरी सत्रु आन कली इन गुइमी गेवानु,
11मिनु फ्रेंशा लाइश्शो आन दातेमी दारशो मीश आल का ताइतीनी नु मेको नु ग्युंबे पचा दाक्ताक्नी हना,
12मेको कली इन खिंम लतीन। मिनु मेको मीश आलम आ चां फ्रेंचा नु आ ग्ये ख्रोइक्चा माल्ब।
13मिनु नोले मेकोमी आ माइत वा प्रुइश्शा नक वा फेक्चा माल्ब। मेको इन खिंम बाक्शा, महिना का सम्म आ आंम आफ आन पर्बम रोंका पचा माल्ब। मिनु नोले मेको कली ग्युंबे पा मेको निक्शी मीश वोंइश दुम्ने चाप्नीम।
14मिनु गे मेको कली तशा ब्रीताक्नी हना, मेको कली तिल्चा दाक्ताक्नी हना, मेको कली प्रोंइशा लचा गेन। गे मेको कली लेयचा मताइनीनी। मिनु वाइलीम कली खोदेंशो पचा मताइनीनी। मारदे हना मेको इन मीश बाक्त।
15मिनु वोंइश मुर का के मीश निक्शी बाक्शा, का आ दाक्शो नु का आ मदाक्शो मीश बाक्त हना, मेको निक्शीमी तौ का थिशा, आ मदाक्शो मीशेम चहिं ङोंइती तौ थिशो बाक्त हना, उत्पत्ती २९:३०-३२
16अङस पशोनु, आ दाक्शो मीश आ तौ, मदाक्शो आ तौ प्रोंइशा, ङोंइती जरमेशो तौ सेल्ने मचाप्ब।
17मेकोमी आ मदाक्शो मीश आ तौ “ङोंइती जरमेशो तौ बाक्ब” दे आ शोंप ङा भाग निक्शी गेचा माल्ब। मारदे हना मेको आ ङोंइती ङा सक्तिम थिशो बाक्ब। ङोंइती जरमेशो तौ आ अधिकार मेको केन बाक्ब। उत्पत्ती ४९:३
18मिनु मुर का हेंथे गाक्ब मटीब तौ का बाक्त हना, मेको आ आम आफ आस देंशो काइ मटीब बाक्त हना, तुप्शा, शेंशा यो मेको आस देंशो मटिप्तु हना, ब्यवस्था २७:१६; प्रस्थान २०:१२
19मेको आ आंम आफोम मेको कली ग्याइश्शा, सहर ङा खाल्पा आन ङोंइती सहर ङा लाप्चो आ नेक्था चाक्चा माल्नीम।
20मिनु नोले मेको निक्शीमी सहर ङा खाल्पा आन कली “एको आंस तौ हेंथे गाक्ब नु मटीब बाक्ब। एकोमी आंस अरेशो मटीब। एको शुश जाइब नु रकसी शांबु तूब बाक्ब” देंसल।
21मिनु मेको सहर ङा मुर नेल्लेमी मेको कली फुल्लु आप्शा साइक्चा माल्नीम। मिनु गेपुकीमी इन दाते ङा मरिम्शो क्याम्चा माल्नीनी। मिनु इस्राएली नेल्लेमी मेको नेंशा, हिंचा माल्नीम।
22मिनु मुर कामी बेक्चा माल्शो सजाइ तशा, गेपुकीमी मेको कली रवाम क्युक्तीनी हना, गन्ती २५:४; यहोसु ८:२९; यहोसु १०:२६-२७; १सामुएल ३१:१०; २सामुएल ४:१२; २सामुएल २१:६,९
23मेको आ लास आ दीसा सुनी सम्म रवाम क्युक्शा, वोइक्चा मदुम्ब। मेको नाक्तीन मेको कली थिम्चा माल्नीनी। मारदे हना क्युक्शा साइश्शो मुर परमप्रभुम पशो सराप चीले बाक्ब। परमप्रभु यावे, इन परमप्रभुमी गेशो रागी कली ग्रांग्रा दिशो मसेलीन। यहोसु ८:१९; यहोसु १०:२७; यूहन्ना १९:३१; गलाती ३:१३
