1Ne mibmenduan ni Moises wey te ebpemendumala te Israel is menge etew, ke sikandin te: “Tumana niw is langun he suǥù he ibeǥey ku keniyu ǥuntaan.
2Emun ebpekelayun kew en te Jordan ne ziyè kew en te tanà he ibeǥey keniyu te Nengazen he Megbevayè niw, ne tambù kew te zezekelà he vatu ne lupita niw heini te apug.
3Ne isurat niw zutun te menge vatu is langun he kesuǥuan emun ebpekeseled kew en duen te meupiya wey selebpeten he tanà he ibeǥey keniyu te Nengazen he Megbevayè niw, kes Megbevayà te menge kepuun niw, iyan heini impenaad din keniyu.
4Emun ebpekelayun kew en te Jordan, diyè niw venguna heini is menge vatu te Buntud he Ebal, sumalà is inmandù ku keniyu ǥuntaan, ne lupita niw heini te apug.
5Ne vaal kew zutun te pemuhatà he vatu he para te Nengazen he Megbevayè niw. Kenè niw vesbasi is menge vatu he egemiten niw.
6Kinahanglan he kenà egkesepsapan is menge vatu he ebeelan niw he pemuhatà. Ne pemuhat kew kayi te menge pemuhat he edtutungen para te Nengazen he Megbevayè niw.
7Pemuhat kew zaan te pemuhat he para te meupiya he kedepità, ne keena niw haazà dutun, ne medlipey kew ziyà te etuvangan te Nengazen he Megbevayè niw.
8Kinahanglan he keladu is kedsurata niw kayi te menge kesuǥuan te Megbevayà duen te menge vatu he mibpintalan niw te apug.”
9Ne mid-uman pa megkaǥi si Moises wey sikan is menge memumuhat he menge kevuwazan ni Levi ziyà te langun he menge Israilihanen te, “Pemineg kew is menge etew te Israel! Guntaan he andew nehimu kew en he menge etew te Nengazen he Megbevayè niw.
10Sunuza niw is Nengazen he Megbevayè niw ne tumana niw is menge suǥù din wey menge sulunuzen he ibeǥey ku keniyu ǥuntaan.”
11Dutun daan he andew mibmenduan ni Moises is menge etew:
12“Emun ebpekelayun kew en te Jordan, iyan heini menge tribu he edhitindeg diyà te Buntud he Gerizim te kebpenuvadtuvad te menge etew: is tribu ni Simeon, Levi, Juda, Isacar, Jose, wey Benjamin.
13Ne iyan maan heini menge tribu he edhitindeg diyà te Buntud he Ebal te kedrawak te menge etew: is tribu ni Reuben, Gad, Asher, Zebulun, Dan, wey Naftali.
14“Ne zutun edhabet ebensag is menge kevuwazan ni Levi ziyà te langun he menge Israilihanen te:
15“Rinewakan is etew he ebaal te minsan hengkey he ledawan he ed-ezapen, batu etawa kayu etawa brunsi minsan meeles dà is ked-ezapa zin kayi. Su heini he menge ed-ezapen is bineelan dà te etew, utew egkeepesi te Nengazen.” Ne edtavak is langun te, “Amen!”
16“Rinewakan is etew he wazà medtahud te menge ǥinikanan din.” Ne edtavak is langun te, “Amen!”
17“Rinewakan is etew he idhalin din is simintu te tanà te zuma zin su para metakew zin haazà is tanà.” Ne edtavak is langun te, “Amen!”
18“Rinewakan is etew he edtezinen din diyà te zalan is lakap.” Ne edtavak is langun te, “Amen!”
19“Rinewakan is etew he kenà ebeǥey te hustu he kukuman diyà te kenà menge Israilihanen, diyà te menge ilu wey menge valu he vahi.” Ne edtavak is langun te, “Amen!”
20“Rinewakan is etew he edhilavet te esawa ta amey zin, su ebpeel-elezan din is amey zin.” Ne edtavak is langun te, “Amen!”
21“Rinewakan is etew he edtambid te minsan hengkey he langgam.” Ne edtavak is langun te, “Amen!”
22“Rinewakan is etew he edhilavet te etevey zin, etevey zin diyà te amey zin etawa ziyà te iney zin.” Ne edtavak is langun te, “Amen!”
23“Rinewakan is etew he edhilavet te enuǥang din he vahi.” Ne edtavak is langun te, “Amen!”
24“Rinewakan is etew he edhimatey te zuma zin minsan meeles is kebeeli zin kayi.” Ne edtavak is langun te, “Amen!”
25“Rinewakan is etew he edawat te suhul para himetayi zin is wazà mekesalà he etew.” Ne edtavak is langun te, “Amen!”
26“Rinewakan is etew he kenà edsunud etawa kenà edtuman te langun kayi he menge suǥù.” Ne edtavak is langun te, “Amen!”
