1Teipa Moisés inihuaya nopa huehue tacame ten israelitame quinnahuatijque nopa masehualme huan quinilhuijque: “Xijtoquilica nochi ni tanahuatilme cati ama nimechnahuatía.
2Ipan nopa tonali quema anquiixcotonase nopa hueyat Jordán huan ancalaquise ipan nopa tali cati amoTECO Dios amechmacas, monequi xiquinquejquetzaca teme cati huejhueyi huan xiquinchipahualtica ica nexti.
3Huan ipan nopa teme xiquijcuiloca nochi camanali ten ni tanahuatilme cati nimechnahuatijtoc xijchihuaca. Ya ni anquichihuase quema achtohui anajsitij ipan nopa tali cati nochi temaca hasta mocahua cati amoTECO Dios amechmactilis quej quiijtojtoc quichihuas.
4Huajca quema ya anquipanotose nopa hueyat Jordán, monequi xiquinquetzaca ipan tepet Ebal nopa teme cati ya nimechilhuijtoc, huan xiquinchipahualtica ica nexti.
5Nojquiya monequi xijchihuaca se taixpamit ica teme para amoTECO Dios, huan amo xiquintejtequica nopa teme ica yon se teposti.
6Xiquintequihuica teme cati yajyajmaxtic huan amo tatecti para anquichijchihuase nopa taixpamit. Huan nopona ipan nopa taixpamit xijmactilica amoTECO Dios tacajcahualisti tatatili.
7Xijmacaca tacajcahualisti para tasehuilisti huan nopona iixpa amoTECO Dios xijcuaca ten nopa tacajcahualisti huan xiilhuichihuaca.
8Ipan nopa teme xiquijcuiloca para ma nesi cuali nochi ni camanali ten ni tanahuatilme.”
9Teipa Moisés ihuaya nopa levita totajtzitzi quinilhuijque nopa israelitame: “Israelitame, amo ximolinica. San xijtacaquilica. Ama amojuanti anmocuectoque imasehualhua amoTECO Dios.
10Huajca monequi xijneltoquilica amoTECO Dios huan xijchihuaca nochi itanahuatilhua huan itamachtilhua cati ama timechnahuatijtoque xijchihuaca.”
11Huan nojquiya ipan nopa tonali Moisés quinilhui nochi nopa masehualme:
12“Quema ya anquipanotose nopa hueyat Jordán, nopa huejhueyi familias ten Simeón, Leví, Judá, Isacar, José huan Benjamín moquetzase ipan nopa tepet Gerizim para tayolmelahuase taya tatiochihualisti anisraelitame anquipantise sinta anquineltocase TOTECO.
13Huan nopa huejhueyi familias ten Rubén, Gad, Aser, Zabulón, Dan huan Neftalí moquetzase ipan tepet Ebal para tayolmelahuase taya tatelchihualisti anquiselise sinta amo anquineltocase TOTECO.
14Huan nopa levitame tananquilise ica inintoscac cati chicahuac para nochi anisraelitame anquicaquise huan quiijtose ni camanali:
15“Tatelchihuali ma eli cati quichijchihuas se taixcopincayot ica teposti taatiltili, o cati ica imax quinchijchihuas teteyome, huan ixtacatzi quintalis canajya campa amo aqui quimatis para quinhueyitalis. Ya nopa TOTECO amo quinequi quiitas. Huan nochi anisraelitame anquiijtose: ‘Quej nopa ma eli.’
16Tatelchihuali ma eli cati amo quitepanitas itata o inana. Huan nochi anisraelitame anquiijtose: ‘Quej nopa ma eli.’
17Tatelchihuali ma eli cati quiijcuenis nopa tet cati quinextía se nepamit para quiichtequilis seyoc ital. Huan nochi anisraelitame anquiijtose: ‘Quej nopa ma eli.’
18Tatelchihuali ma eli cati quicuapolos ipan ojti se cati popoyotzi. Huan nochi anisraelitame anquiijtose: ‘Quej nopa ma eli.’
19Tatelchihuali ma eli cati quichihuilis cati amo xitahuac se seyoc tali ejquet, o se cahualtzi o se icnotzi. Huan nochi anisraelitame anquiijtose: ‘Quej nopa ma eli.’
20Tatelchihuali ma eli cati ihuaya motecas isihua itata pampa quiixpano itata. Huan nochi anisraelitame anquiijtose: ‘Quej nopa ma eli.’
21Tatelchihuali ma eli cati quichihuas ten hueli ica se tapiyali. Huan nochi anisraelitame anquiijtose: ‘Quej nopa ma eli.’
22Tatelchihuali ma eli cati ihuaya motecas isihua icni o se cati icone itata o inana. Huan nochi anisraelitame anquiijtose: ‘Quej nopa ma eli.’
23Tatelchihuali ma eli cati ihuaya motecas imona. Huan nochi anisraelitame anquiijtose: ‘Quej nopa ma eli.’
24Tatelchihuali ma eli cati quimictis seyoc ixtacatzi. Huan nochi anisraelitame anquiijtose: ‘Quej nopa ma eli.’
25Tatelchihuali ma eli cati quiselis tomi para quimictis seyoc cati amo teno quichijtoc. Huan nochi anisraelitame anquiijtose: ‘Quej nopa ma eli.’
26Tatelchihuali ma eli cati amo quintepanitas ni tanahuatilme huan amo quinneltocas. Huan nochi anisraelitame anquiijtose: ‘Quej nopa ma eli.’
